15
1 Nyuma ya kagiita kagana ûna, îgiita rîa gûketha ngano, Samusoni n'aathiire kûriûngîra mwekûrû ûyu wake arî na kabûri amuirîrîîte ko karî kîewa. Eera mûthonuue, “Inkwenda kwona mwekûrû wakwa nyomba yake,” îndî mûthonuue aarega Samusoni athûûngîra ku. 2 Mûthonuue amwîra, “Na mma niû ndaathûgaaniirie i ka wamûmenire, kwoogu ndamweyanire kîrî mûcoore waku. Îndî mwaragina ûra mûniini n'we mûthongi nkûrûki nwa ûmûgûre arî we.” 3 Samusoni auga, “Îgiita rîrî ntiîgua ndî na mabîtia kîrî Afirisiti wana kinya nkabarûthîra mantû mathûûku.” 4 Kwoogu Samusoni aathiire aagwata mbwe magana mathatû. Na aathûkia iciinka, na agerekania mîtiro ya mbwe ciîrî ciîrî amîkuundîkanîîria amwe na oogeera gîcinka gatîgatî ka mîtiro înu. 5 Rîru aamuntia icinka bibu na kûrekia mbwe inu cionthe mîndaani înu ya ngano ya Afirisiti. Ngano ira ciarî mîndaani înu itaarî nkethe, na ira ciarî nkethe ciaûmbwa ithûmba cionthe ciabîa. Kinya mînda ya mîcabiibû na mîceituuni yao n'yenyangiirue cwe. 6 Afirisiti baûria, “N'ûû ûrarûthire ûûgû?” bauga “I Samusoni mûthonuue, wa muntû ûra wa kuuma Timuna, n'ûntû mûthonuue naramûtuunyire mwekûrû eeyana kîrî mûrûngamîîri wa Samusoni wooyu amûgûra.” Afirisiti baathi babîîthia mwekûrû wa Samusoni na mûthonuue mwene baakua. 7 Na Samusoni abeera, “Wegua ûgu i bu bwarûtha! nwa nkaarîia, na ntiitiga mwanka mbone nkuingia bûra nkwenda.” 8 Kwoogu aithûkîra Afirisiti na marûrû maaî na aûraga baingî mûno. Rîru endama aathi eebitha îkurunguuni rwaraani rwa iiga rwa Etamu.Samusoni aatura afirisiti
9 Rîru Afirisiti beetia baamba marema maao Njunda, na baakîîmba taûni ya Rei. 10 Antû ba Njunda babaûria, “I mbi n'ûntû bwatûreetera ûgîti?”
Bakîbacookeria bauga, “Twaya kûgwata Samusoni, tûmûrûtha wa ta bûra wana n'we aratûrûthire.” 11 Kwoogu antû ngiri ithatû ba Njunda baathi îkurunguuni rîra rîarî rwaraani rwa iiga rwa Etamu. Baûria Samusoni, “N'ûtaiyî kana Afirisiti i bo batwathaga? N'ata ûtûrûthîîte îîndî?”
Abacookeria abeera, “Ndarabarûthîîre wa bûra barandûthîîre!” 12 Na bauga, “Twaya aaga gûkûthaîka, kaingo tûkûnenkanîra njarani cia Afirisiti.”
Samusoni n'we abeera, “Thiîtiani bûmbîîre bûtimbûraga bûrî biû.” 13 Bamwîra, “Arî tûtikûûraga, nwa kûthaîka tûgaakûthaîka wite tûkûnenkanîre kîrî Afirisiti. Tûtikûûraga.” Kwoogu bamûthaîka na mîkanda îîrî yaimbia, bamûruta îkurunguuni rîru rîa iiga.
14 Agûkinya taûni ya Rei, Afirisiti baamûthagaanire bakîmuugagîra mbu. Nthûti îmwe Kîrundu wa Mwathani amûûyîîra na inya înene, aatuîkangia makanda mara maamûthaîkîîte njara maakara ta ndigi cia nguo irî mbîîthie i mwanki, na magwa nthî kuuma njaraani ciake. 15 Oona kîîndî kîa rûthea rwa îng'ooi gîtaakarakarîîte mûno. Aakuamîîria ooya ru, na aûraga antû ngiri îmwe naru.
16 Kwoogu Samusoni auga ûûgû,
“Na rûthea rwa îng'ooi,
kîthûmba îgûrû ya kîthûmba kîngî,
Na rûthea rwa îng'ooi
Nkûûraga antû ngiri îmwe!”
17 Akûrîîkia kwaria, aathûkia rûthea rûru aruta, eeta bantû agu Ramathi-Rei.a
18 Samusoni aagwatwa i bûûta îmbîî, na aakayîra Mwathani amwîra, “I woû weyanîîte wonokio bûbû bûnene ûûgû na njara yakwa, niû mûruti ngûgî waku. Îndî îîndî, i ka ngakuîra aaga i bûûta na mbîgue ndî njaraani cia antû baba batarî bataane?” 19 Rîru Ngai aatûra mûrinya bantû aarî na kîguruma naagu Rei, na rûûyî rwauma ku. Samusoni arûnyua na aanjîîria kûgîa na inya kaîrî na akara taka aariûka. Kwoogu kînyaka gîku gîetwa Eni-Akore.b 20 Samusoni n'we aarî mûgiiti magamba Isiraeri bantû a mîanka mîrongo îîrî îgiitaani rîra baathagwa n'Afirisiti.