Kûgûrana gwa Samusoni
14
1 Ntugû îmwe Samusoni arî bantû eetagwa Timuna, N'onire mwarî ûmwe wa kuuma Firisiti. 2 Agûcooka kwao, eera aciari baake, “Kûrî mwarî ûmwe Mûfirisiti ndaroonire Timuna, ngûrîraani we atuîke mwekûrû wakwa.” 3 Îthe na gina bamûûria, “Gûtirî mwarî mma ûroona gûkû mwîrîgaani wetû kana gwa antû beetû, n'ûntû wathi kûgûrana kwa Afirisiti antû batataanagwa?” Îndî Samusoni eera îthe, “Ngûrîra we n'ûntû n'we ûgûnkenia.”4 Aciari baake bataamenyaga i Mwathani aatongoragîîria Samusoni kûrûtha ûgu, n'ûntû Mwathani n'aaceragia kaanya ga kûrûa na Afirisiti. Kagiitani gaku Afirisiti i bo baathaga Isiraeri.
5 Kwoogu Samusoni eendama bwa Timuna barî na îthe na gina. Wa bakûrûkîîrîîte mîndaani ya mîcabiibû naagu, warîmwe kiunga gîa cimba kîaya naara aarî gîkîrurumaga. 6 Nthûti îmwe Kîrundu wa Mwathani amûûyîîra na inya îînene mûno, na agîtandûrania na njara ta muntû ûgûtandûrania kabûri kaniini. Îndî ateera aciari baake bûra aarûthire. 7 Samusoni agûkinya Timuna, aaria na mwarî ûyu na Samusoni aakena mûno n'we. 8 Nyumaani agûcooka Timuna kûgûrana, aathûkîra kwona cimba îra aûragîîte, na aarigara mûno akwona njûkî ndeeni ya kiimba gîku na ûkî bûrîku. 9 N'we abukomboria na njara aathi akîburîyaga na njîra wa athiîte. Na agûkinyîra aciari baake, abarûmia na baarîa. Îndî ataabeera kana arutire ûkî bûbu kiimbaani gîa cimba. 10 Îthe wa Samusoni aathi mûciî kwa ba mwarî ûyu, na Samusoni aarûtha kîatho kîa îruga noogo, n'ûntû bûbu i bu bwarî wîthîre bwa nthaka îkîgûrana. 11 Afirisiti bakûmwona, baatûmire nthaka mîrongo îthatû cia kûmûkaria. 12 Samusoni abeera, “Ka mbûgwatithieni rûtaî. Muntû ûra akaarumenya ambîîre îcookio mbere ya ntugû mûgwanja, kîatho gîkî kîthira, nkamwaa nguo cia gatani mîrongo îthatû na iingî mîrongo îthatû inthongi. 13 Îndî wegua bûtiimenya îcookio, nwa bûnenkeere nguo mîrongo îthatû cia gatani na ciingî mîrongo îthatû inthongi.” Bamwîra, “Ta tûgwatithie ru tûruîgue.” 14 N'we abeera,
“Kuuma kîrî ndîyani i kwaumire bîa kûrîa,
Wana kuuma kîrî gîntû kîrî inya mûno kwauma gîntû kîrî mûrîo.”
Nabo bataûmba kûmenya îcookio rîa rûtaî rûru na ntugû ithatû.
15 Ntugû ya mûgwanja îgûkinya beera mwekûrû wa Samusoni ata rî, “Eneeria mûrûmeegu atwîre îcookio rîa rûtaî rûrû. Wegua t'ûgu tûgeekîra nyomba ya abaagu mwanki tûkûbîîthîrie ku. I ka bûgûtûîtîîte tûûya aaga bûtûtuunya into bietû?” 16 Mwekûrû ûyu aathi kîrî mwene akîrîraga amwîra, “Woû ûtimbendeete; i kûûmena ûmeneete! wagwatithiirie antû ba gwetû rûtaî, na ûtambîîra îcookio rîaru?” Samusoni amwîra, “Ti woû gwenka wana kinya aciari baakwa ntirabeera. Abu î, i ngaakwîra i kî woû?”
17 Aakarîîte akîmûrîragîra ntugû inu mûgwanja cia kîatho gîku kîao. Îndî ntugûûni ya mûgwanja i rîo Samusoni aamûciûrîîre rûtaî rûru, n'ûntû bwa kûmûkinyîîria mûno. Rîru i rîo mwekûrû ûyu wa Samusoni aathiire eera antû babu ba kwao îcookio rîa rûtaî rûru. 18 Na ntugû înu ya mûgwanja, mbere ya riûa rîthûa, antû babu ba taûni înu baaya kîrî Samusoni barî na îcookio:
“I mbi îrî mûrîo nkûrûki ya ûkî bwa njûkî?
I mbi îrî inya nkûrûki ya cimba?”
Samusoni abacookeria abeera,
“Ûkeegua bûtirarîma na ng'ombe yakwa,
bûtikîmenya îcookio rîa rûtaî rwakwa.”
19 Na Kîrundu wa Mwathani amûyîîra na inya îînene, eendama bwa Asikeroni, naara aûragîîre antû mîrongo îthatû, abatuunya into biao na aanenkanîra nguo ciao kîrî antû bara beeyanire îcookio rîa rûtaî rwake. Nyuma ya ûgu, Samusoni eenûka, athûûri mûno i mantû mara maakarîkîîte. 20 Na mwekûrû ûyu wake aanenkanîîrwe kîrî mûcoore wake ûra aamûrûngamîrîte mûranû amûgûra.