Gûciarwa gwa Samusoni
13
1 Antû ba Isiraeri i baarûthire mantû mathûûku kaîrî Mwathani akîonaga, kwoogu Mwathani abanenkanîra wathooni bwa Afirisiti mîanka mîrongo îna. 2 I kwarî na muntû wa kuuma taûni ya Sora wa mwîrîga wa antû ba Ndani. Riîtwa rîake eetagwa Manoa na mwekûrû wake aarî nthaata. 3 Mûraîka wa Mwathani aayîîra mwekûrû ûyu amwîra, “Wana kinya ûkeegua ûrî nthaata, ûkaagea nda ûciare kaîyî. 4 Kwoogu ûmenyeere ûtikaanyue ndibei kana ûnyua gîntû kinya kîrîkû gîtogoonagia kana ûrîa gîntû kîrî na mûgiro. 5 Ûkaagea nda na ûciare kaîyî, na ntundu ciako itikooro cienjwa. N'ûntû kaana gaku gakeegua kanenkanîrîîtwe kîrî Ngai ta Mûnasiria kuuma nda ya gina. I ko gakanjîîria gûkûûra Isiraeri kuuma njarani cia Afirisiti.” 6 Rîru mwekûrû ûyu aathi eera mûrûme, “Kûrî muntû wa Ngai aaya ara nkûrî, na mwonekere wake arîkari ta Mûraîka wa Ngai, na i bwakûmakia mûno. Ntiramûûria naara akuumîîte, na atirambîîra riîtwa rîake. 7 Îndî ambîîra nkaagîa nda na nciare kaîyî. Na ambîîra ntikanyue ndibei kana gîntû nwa kîrîkû gîtogoonagia, kana ndîa irio biri na mûgiro, n'ûntû kaana gaka ûkeethîrwa karî Mûnasiri wa kuuma kwa Ngai kuuma gûciarwa mwanka gûkua.”8 Rîru Manoa aaromba Mwathani, amwîra, “Itû Mwathani rekeeria mûruti ngûgî wa Ngai ûra ûgûtûmîîte aaye kîrî tiû kaîrî atûrutane bûra tûbatîîrue tûrûthana na kaana gaku gaaciarwa.” 9 Ngai n'eegiirue maromba ma Manoa, na aatûma mûraîka wake aaya kaîrî kîrî mwekûrû ûyu amwîthîra akari nthî mûndaani. Na bataarî na Manoa mûkûrû wake. 10 Kwoogu mwekûrû ûyu aûkîîra na mpwî aathi eera mwene, “Muntû ûra aambûyîîrîîte ntugû îra akûûmbûyîîra kaîrî.” 11 Manoa aûkîîra athingata mwekûrû wake. Aathi kîrî muntû ûyu amûûria, “I woû waragia na mwekûrû wakwa ntugû îra?” Muntû ûyu amwîra, “Îî i niû.” 12 Manoa amûûria, “Gûgaakarîka ûgu ûkuuga rî, kaana gaaku kabatîîrue gatûûra mûtûûrîre ûkari ata? Na i ngûgî mbi kabatîîrue karuta?” 13 Mûraîka ûyu wa Mwathani aacookeria Manoa amwîra, “Mwekûrû waku abatîîrue amenyeera bwega mantû monthe mara ndamwîra. 14 Atikaarîe gîntû nwa kîmwe kiumîîte mûcabiibûûni kana anyua ndibei kana gîntû gîtogoonagia, kana arîa gîntû nwa kîrîkû kîrî na mûgiro. Nwa mwanka arûthe mantû monthe mara ndaamwîra.”
15 Manoa eera Mûraîka ûyu wa Mwathani, “Itû aba, eteera tûkûûragîre kabûri ûrûme ûkîthi.” 16 Îndî Mûraîka wa Mwathani eera Manoa, “Ngeeteera îndî ntiirîa nwambi. Îndî thuuranîra kîo kîrî kîgongwana gîa kûbîîthia ûrutîre Mwathani. Manoa ataamenya ûyu aarî Mûraîka wa Mwathani.” 17 Rîru Manoa eera Mûraîka ûyu wa Mwathani, “Tatwîre riîtwa rîaku, kaingo mantû mama maakarîka tûgaagûkumia.” 18 Mûraîka ûyu wa Mwathani n'we amûûria, “I mbi n'ûntû ûkwenda kûmenya riîtwa rîakwa? I riîtwa rîa kûrigaria.” 19 Kwoogu Manoa aathûkia kabûri na mûtu wa kîgongwana, na aarutîra Mwathani ûyu ûrûthaga mantû ma kûrigaria kîgongwana agu rwaraani rwa iiga. Manoa na mwekûrû wake i baaraithîîte. 20 Na rîra ndîrîmbî cia mwanki cietagia îgûrû kuuma kîthînjîrooni, Mûraîka wa Mwathani eetîîria rûrîrîmbîîni rûru rwaumaga kîthînjîrooni Manoa na mwekûrû wa baraithîîrîîtie na beegwîthia batiirithîîtie moothiû maao nthîgûrû.
21 Mûraîka ûyu wa Mwathani ateebonania kaîrî kîrî Manoa na mwekûrû wake. Rîru i rîo Manoa aamenyire aarî Mûraîka wa Mwathani. 22 Manoa eera mwekûrû wake, “Na mma tûgaakua, n'ûntû tûkwona Ngai na meetho.” 23 Îndî mwekûrû wake n'we amwîra, “Ûkeegua Mwathani akwendaga gûtûûraga, atigîîtîgîîria kîgongwana gîetû gîa kûbîîthia na kîewa kîa irio, atigîtwonia mantû mama monthe kana atwîra mo.” 24 Mwekûrû aagea na kaana ga kaîyî na ageeta Samusoni. Kaana gaku gaakûra, na Mwathani akathaarima. 25 Na Kîrundu wa Mwathani aanjîîria kûmwinyîka arî Maane-Ndanib gatîgatî ga Sora na Esitaori.