Njebutha na Eburaimu
12
1 Antû ba Eburaimu i beebangire kûthi kûrûa, na baaringanîria rûgoongo rûra rûûngî rwa muuro wa Njorondani baakinya Safoni na baûria Njebutha ata rî, “I mbi n'ûntû ûraringanîîrie wathi kûrûa na antû ba Amoni, na ûtiratûîta tûthiiyania naawe? Îîndî i ka tûkûmuntia nyomba yaku mwanki tûkûbîîthîrie ku.” 2 Njebutha abacookeria abeera, “Niû na antû baakwa i tûraarî na îtheto rîînene mûno na antû ba Amoni. Na nkûbûîta, bûtaaya gûûnteethia mbuuma kînyamaarani kîao. 3 Nkwona bûtigûnteethia, i rîo ndaaringire kîbara ndaringanîria ndaathi kûrûa na antû babu ba Amoni. Mwathani n'we abanenkanîra njarani ciakwa. Aabu î, i mbi n'ûntû îmunthî bwambithûkîra tûrûa naabi?” 4 Rîru Njebutha eethîrania antû ba Ngiriandi bonthe baarûa na antû ba Eburaimu na babatura. N'ûntû Kûrî rîo antû ba Eburaimu baugîîte, “Antû ba Ngiriandi twaka kûrî kîo kîrî oogo, i matigari ma kuuma kîrî antû ba Eburaimu na ba Manase.” 5 Antû ba Ngiriandi i bakabîîre mariûko ma muuro wa Njorondani gûtikeegue kûrî na ûringîro bwa kûthi Eburaimu. Na wonthe ûra aakuthûkaga kuuma Eburaimu eendaga kûringanîria muuro n'aarombaga rûûtha. Rîru Mûngiriandi akamûûria, “I ka ûrî Mwefuraimu?” akauga, “Arî,” 6 bakamwîra, “Tauga Siborethu,” n'we akauga “Ciborethu,” n'ûntû atikîûmba kûrîtamûka bwega; baamûgwataga bakamûûragîra agu îriûkooni. Kagiitaani gaku Aeburaimu ngiri mîrongo îna na ciîrî i baûragirwe.7 Njebutha aarî mûgiiti magamba Isiraeri mîanka îthanthatû. Rîru aakua na aathikwa taûniini ya kwao naagu Ngiriandi.
8 Nyuma yake, Ibisani wa kuuma Bethireemu n'aatuîkire mûgiiti magamba wa Isiraeri 9 Aarî na nthaka mîrongo îthatû na aarî mîrongo îthatû. Aarî babu baake bonthe baagûrirwe gûntû kûûngî na nthaka nacio cionthe ciagûrana gûntû kûûngî. Ibisani aarî mûgiiti magamba Isiraeri mîanka mûgwanja, 10 rîru aakua, na aathikwa Bethireemu.
11 Nyuma ya Ibisani, Eroni wa kuuma nthîgûrû ya Seburuni aatuîka mûgiiti magamba wa Isiraeri, na aakarire mîanka îkûmi akîgiitaga magamba naagu Isiraeri. 12 Rîru Eroni aakua na aathikwa bantû eetagwa Aiyaroni nthîgûrû ya Seburuni.
13 Ûra aayire nyuma ya Eroni atuîka mûgiiti magamba wa Isiraeri eetagwa Abundoni mwana wa Ireri wa kuuma Pirathoni. 14 Aarî na nthaka mîrongo îna na biûyûûyû mîrongo îthatû, na baakamatagwa i mang'ooi mîrongo mûgwanja. Abundoni aakarire mîanka înaana arî mûgiiti magamba wa Isiraeri. 15 Rîru Abundoni mwana wa Ireri aakua, na aathikwa Pirathoni nthîgûrû ya Eburaimu nthîgûrû ya irîma ya Aamareki.