Njebutha Mûgiiti Magamba Isiraeri
11
1 Njebutha wa kuuma Ngiriandi, aarî ncamba ya ndûa, na gina aarî mûka mûmaraaya. Ngiriandi aarî îthe wa Njebutha. 2 Na mwekûrû wa Ngiriandi kinya we n'aamûciarîîre aana ba antû arûme. Na aana babu ba mwekûrû ûyu wake bagûkûra, i beengatiirie Njebutha mûciî. Bamwîra, “Woû gûtirî rûgai ûkoona kuuma kwa baaba n'ûntû, ûrî mwana wa mûka ûngî.” 3 Rîru aakuthûka auma kîrî aruagina babu, aathi gûtûûra nthîgûrû ya Tobu. Ari naagu aatuma ûcoore na makanga na baatua kûriûnganagia namo.4 Nyuma ya îgiita rîgana ûna antû ba Amoni baithûkîra antû ba Isiraeri. 5 Na antû babu ba Amoni bakuithûkîra antû ba Isiraeri, akûrû ba Ngiriandi i baathiire kûgîîra Njebutha kuuma nthîgûrû ya Tobu. 6 Nabo beera Njebutha “Ncû ûtuîke mûtongoria wetû, kaingo tûthi kûrûa na antû ba Amoni.” 7 Îndî Njebutha n'we abaûria, “Anga twa biû bwamenire, na bwambîngatia ndauma kwa baaba? I mbi îndî n'ûntû bwaya kîrî niû bwagîa na thîîna?” 8 Akûrû babu ba Ngiriandi bamwîra, “Gîku i kîo gîtûmi gîatûma tûûya kîrî woû îîndî, tûthi naawe na tûrûe na antû ba Amoni, na tûgûtuîkithie mûtongoria wa antû ba Ngiriandi bonthe.” 9 Njebutha abeera, “Wegua bûrîncookia mûciî tûkarûe na antû ba Amoni, Mwathani anteethie tûbature, n'ûmma bûgaantuîkithia mûtongoria wenu?” 10 Akûrû babu ba Ngiriandi bamwîra, “Mwathani i mûnkûûyî wetû, tûkaarûtha wata ûgu ûkuuga.” 11 Kwoogu Njebutha aathiiyania na akûrû babu ba Ngiriandi na antû bamûtuîkithia mûnene na mûtongoria wao. Na Njebutha aathiîtia mbere ya Mwathani arî Misipa.
12 Rîru Njebutha aatûma atûmwa kîrî mûnene wa antû ba Amoni amûûria, “N'ûthû bûbi ûrî nabu naani kaingo ûûya kwithûkîra nthîgûrû yetû?” 13 Nwe mûnene ûyu wa Amoni aacookeria atûmwa babu abeera, “N'ûntû rîra Aisiraeri baumire Miisiri i baathûkiirie nthîgûrû yakwa, kuuma muurooni wa Arinoni kûthi muurooni wa Njaboku mwanka gûkinya muurooni wa Njorondani. Îîndî wegua nakwenda bwega, namîcookie na ûkiri.” 14 Njebutha aacooka aatûma atûmwa kaîrî kîrî mûnene wooyu wa Amoni, 15 na ntûmwa îkuuga,
“Njebutha ariuga ûûgû: Gûtirî nthîgûrû Isiraeri baathûkia ya antû ba Moabu kana ba Amoni. 16 Gwakarîkire ûûgû, Aisiraeri bakuuma Miisiri, baakûrûkîîre rwanda baaringa Îria Rîtuune mwanka baakinya Kandesi.a 17 Rîru baatûma atûmwa kîrî mûnene wa Endomu baromba rûûtha rwa kûbeetîgîîria bakûrûkîîra nthîgûrû yake. Îndî mûnene ûyu wa Endomu n'we aarega. Bacooka baûria mûnene wa Moabu wan'we aarega bakûrûkîîra gwake. Kwoogu Aisiraeri baakara Kandesi. 18 Rîru baathi baakûrûkîîra rwanda, baathiûrûûka nthîgûrû ya Endomu na ya Moabu mwanka baakinya uumîîroni bwa riûa bwa nthîgûrû ya Moabu, rûgoongo rûra rûûngî rwa muuro wa Arinoni. Baamba marema maao agu, îndî bataaringa muuro wa Arinoni n'ûntû n'uu warî mwanka wa Moabu. 19 Rîru Aisiraeri baatûma atûmwa kîrî Sioni Mûnene wa Amori ûra aathanaga akiumaga Esiboni, bakîmûrombaga rûûtha baakûrûkîîra nthîgûrû yake bakinya kwao. 20 Îndî mûnene Sioni ateetîgagia Aisiraeri bagîkûrûkîîra gwake; kwoogu Sioni eethîrania antû baake bonthe amwe, na baarûtha kambî bantû eetagwa Njaasa na baarûa na Aisiraeri. 21 Mwathani, Ngai wa Isiraeri, aanenkanîra Sioni na antû baake bonthe njarani cia Isiraeri na babatura. Kwoogu Aisiraeri baathûkia nthîgûrû yonthe îra antû ba Amori baatûûraga yaatuîka yao. 22 Baathûkia nthîgûrû ya Amori yonthe kuuma muurooni wa Arinoni kûthi muurooni wa Njaboku na kuuma rwanda rûru mwanka gûkinya muuro wa Njorondani. 23 Kwoogu i Mwathani Ngai wa Isiraeri, aatuunyanire nthîgûrû înu kuuma kîrî Amori, n'ûntû bwa Aisiraeri antû baake. 24 Woû thûkia kîra ngai yaku Kemosi îgaakwa gîtuîke gîaku. Naati tûthûkie kîonthe kîra Mwathani Ngai wetû agatwa gîtuîke gîetû. 25 N'ûkûthûgaania woû ta ka ûrî ûmwega nkûrûki ya Mbaraki mwana wa Sipori, mûnene wa Moabu? We gûtirî rîo aatheta na antû ba Isiraeri n'ûntû bwa nthîgûrû yao, kana aûkia ndûa nabo n'ûntû bwa nthîgûrû îno. 26 Bantû a mîanka magana mathatû îmunthî, Aisiraeri baatûûraga Esiboni na ntûûra ciayo, na Aroeri na ntûûra ciayo, na taûniini cionthe ira irî rûteere rwa Arinoni, I mbi yo yaagiriirie bûcithûkia kuuma îgiita rîru rîonthe? 27 Niû ntikwîyîîtie, îndî woû nûkûmbîtîria ûgîceria kûrûa naani; Mwathani, mûgiiti magamba, îtua îmunthî gatîgatî ga antû ba Isiraeri na ba Amoni.” 28 Îndî mûnene wa Amoni ataatindanîra na ntûmwa ya Njebutha îra aatûmanîîte kîr'we.
29 Rîru Kîrundu wa Mwathani aayîîra Njebutha. Aakûrûkîîra Ngiriandi na Manase, na mwanka aakinya Misipe ndeeni ya Ngiriandi. Na kuuma Misipa ya Ngiriandi aakûrûka mwanka aakinya nthîgûrû ya Amoni. 30 Na Njebutha aathiîtîria Mwathani. Auga, “Wegua ûkaanenkera Amoni njarani ciakwa, 31 nkaanenkanîra kîrî Mwathani gîntû kîra gîkaumagarûka nyomba yakwa kûûya gûnkeethia rîra ngacooka mbumîîte gûtura antû ba Amoni. Gîntû gîku ngakîruta kîrî kîgongwana gîa kûbîîthia.” 32 Rîru Njebutha aaringa muuro aathi kûrûa na antû ba Amoni, na Mwathani abanenkanîra njaraani ciake. 33 Abatura mûno kuuma Aroeri gûkinya Minithi, cionthe ciarî taûni mîrongo îîrî, na mwanka gûkinya Abeeri-Keramimu. Antû ba Amoni na tikûûragwa baûragîîtwe n'antû ba Isiraeri. Na kwoogu Amoni baaturwa n'antû ba Isiraeri.
34 Njebutha agûcooka mûciî wake Misipa, mwarî wake wa kîmoomwe, aumagarûkire ome na rwîro amûthagaanîîte na tamburini na agîcûngaga. Kwoogu ataarî na kaana kangî. 35 Akûmwona, aatembûranga nguo ciake arî na kîeba auga, mwan'wakwa ûkûndinga nthî mûno na wanthûûria, i kî n'ûntû gûgûtuîka nwa woû ûkûûnthûria? N'ûntû kûrî wîrane ndaigire na Mwathani na kanyua gaakwa ningwa na gûtirî bu ndûtha ngarûka. 36 Mwarî ûyu n'we amwîra, “Baaba, n'ûntû n'waigire wîrane na Mwathani na kanyua gaaku wengwa, ndûthîra wa bûra weranire na Mwathani n'ûntû narakûrîîrie Amoni anthû baaku.” 37 Îndî ndekeeria bantû a mîeri îîrî ûgu mbîtie irîmaani nkariûnge ku nkîrîragîra warî bwakwa na acoore baakwa, n'ûntû ntiigûrwa. 38 Îthe n'we amwîra, “Na ûkathi.” Na amûrekeeria aathi mîeri înu îîrî. We na aarî bara baarî acoore baake beetia irîmaani na baarîra n'ûntû agaakua atarî mûgûre. 39 Nyuma ya mîeri înu îîrî mwarî ûyu n'aacookire kwa îthe. Îthe n'we aingia wîrane bwake wa ta bûra eerîîte Mwathani. Mwarî ûyu aakuire, ataaro amaama na muntû mûrûme. Kwoogu bûbu bwatuîka wîthîre kîrî Aisiraeri, 40 atî aarî bonthe ba Isiraeri wa kîra mwanka bakathiiyaga kûrîrîra mwarî wa Njebutha wa kuuma Ngiriandi bantû a ntugû inya wa mwanka.