Tora Mûgiiti Magamba Isiraeri
10
1 Nyuma ya Abimereki agûkua, Tora n'we aayire gûkûûra antû ba Isiraeri. Tora aarî mwana wa Pua, na Pua aarî mwana wa Ndondo. Aarî wa kuuma mwîrîgaani wa Isakaari na aatwîre Samiri nthî ya irîma ya Eburaimu. 2 Aarî mûgiiti magamba wa Isiraeri bantû a mîanka mîrongo îîrî na îthatû. Rîru aakua na aathikwa naagu Samiri.Njairi
3 Nyumaani Tora agûkua, muntû ûngî wa kuuma Ngiriandi eetagwa Njairi aatuîka mûgiiti magamba wa Isiraeri bantû a mîanka mîrongo îîrî na îîrî. 4 Njairi aarî na nthaka mîrongo îthatû, nabo baakamatagwa i mang'ooi mîrongo îthatû woogu. Na baarî na taûni mîrongo îthatû naagu Ngiriandi, ira wana îmunthî tûrî ciîtagwa taûni cia Njairi. 5 Njairi agûkua, aathikirwe Kamoni.
6 Na kaîrî Aisiraeri i baarûthire mantû mathûûku Mwathani akîonaga. Baarûthire ûgu, baatua gûtûmîkîra mîbuanaano ya Mbaari na Asitorethi, na ngai cia Aramu, Sindoni, Moabu, Amoni, na cia Afirisiti. Na baatiganîria Mwathani na baatiga kûmûtûmîkîra. 7 Kwoogu Mwathani aankana ta mwanki i mûthûûro n'ûntû bwa Aisiraeri, abaneenkanîra njaraani cia Afirisiti na Amoni. 8 Kwoogu mwankaani ûyu njûûrî ya ndûa ya Isiraeri n'yanyamaariirue na yainyîîrua i mîgongo înu irî îîrî. Bantû a mîanka îkûmi na înaana i bainyîîrie antû ba Isiraeri bara baatûîre rûgoongo rwa muuro wa Njorondani nthîgûrû ya Amori, ndeeni ya Ngiriandi. 9 Antû babu ba Amoni i baaringire kinya muuro wa Njorondani kaingo barûa na antû ba Njunda na ba Benjameni na ba Eburaimu na antû babu ba Isiraeri batûûra bathaangîkîîte mûno.
10 Rîru antû ba Isiraeri baarîrîra Mwathani, bakiugaga, “Itûkwîyîrîîtie, woû Ngai wetû, n'ûntû itwagûtigire na twatûmîkîra Mbaari.” 11 Na Mwathani akîbacookeria abaûria, “Anga ntaabûtuunyûkiirie kuuma kîrî antû ba Miisiri, ba Amori, ba Amoni na ba Afirisiti? 12 Na kinya antû ba Sindoni, na ba Amareki, na ba Amaoni, i baabuinyîrîîtie, na bwandîrîra, naani i ndabûtuunyûkiirie kuuma kîrî bo. 13 Îndî amwe na ûgu bwantiganîîrie bwatûmîkîra ngai ciingî, kwoogu niû îîndî ntibûteethia kaîrî. 14 Îîndî, îthiini bûkarîrîre ngai ira bwethuurîîre, na i bûteethie rîra bûkûnyamaara.” 15 Îndî antû babu ba Isiraeri beereka Mwathani na bamwîra, “Itwîyîîtie. T'wee îkaanûkia rîra ûkwenda, îndî itû bunka tûkûûre kînyamaaraani gîkî îmunthî.” 16 Kwoogu baateeyanîria ngai inu ngeni na bacooka gûtûmîkîra Mwathani; na Mwathani aatua kwîgua bûthûûku n'ûntû bwa bûra Aisiraeri baanyamaarîîte.
17 Rîru njûûrî ya ndûa ya Amoni yeethuuranîra n'ûntû bwa ndûa na yaarûtha kambî yao Ngiriandi. Antû ba Isiraeri beethîrana amwe wana bo baabanga kambî yao Misipa naagu Ngiriandi. 18 Rîru antû na atongoria ba Ngiriandi baûrania, “N'ûû agaatongoria kûthi kûrûa na antû ba Amoni? Ûra akaarûtha ûgu, n'we agaatuîka mûtongoria wa antû bonthe bara batûîre Ngiriandi.”