Abimereki
9
1 Abimereki mwana wa Njerubu-Mbaari n'aathiire Sekemu kwa ba abuue, na kîrî antû bonthe ba mwîrîga wa bagina. Abeera, 2 “Ta ûriani antû bonthe ba Sekemu ‘I bûrîkû bwega, i kwathwa n'aana ba Ngindioni bonthe barî mîrongo mûgwanja kana i muntû ûmwe?’ Kinya bûririkane, ndî nthakame yenu yongwa.” 3 Kwoogu ba abuue baaria na antû ba Sekemu mantû mama monthe. Na antû babu ba Sekemu baabanga kûthingata Abimereki n'ûntû i mwana wao. 4 Baamûnenkeere sekeri mîrongo mûgwanja cia fetha kuuma nyomba ya Mbaari-Berithi, ira Abimereki aatûmîîre gûkombora nacio makanga mara maamûthiingatire. 5 Aathiire kwa îthe naagu Obura, na aûraga aruagina, nthaka mîrongo mûgwanja cia Njerubu-Mbaari, abaûragîra iigaani rîmwe. Îndî Njothamu, kîremangita kîa Njerubu-Mbaari, n'eebithire na ataûragwa. 6 Rîru antû bonthe ba Sekemu na ba Bethi-Miro beethîrana amwe mûpuruuni na baatuîkithia Abimereki mûnene.7 Rîra Njothamu eerirwe ûgu, aathiire aatwa kîrîmaani kîa Ngerisimu kûra îgûrû, na augîîria na inya akîbeeraga, “Nthikîîriani, biû antû ba Sekemu kaingo naabi Ngai abwîgua. 8 Kagiita kamwe mîtî n'yathiire kwîthuurîra mûnene. Yeera mûceituuni, ‘Tuîka mûnene wetû.’ 9 Mûceituuni wamîcookeria wamîîra, ‘Kaingo mbatha mîtî îra îngî rî, ka ngaatiga kûruta maguta mara ndutaga, mara makumagua i Ngai na antû?’ 10 Mîtî yeera mûkûyû, ‘Ncû ûtuîke mûnene wetû.’ 11 Mûkûyû na uu wamîcookeria, ‘Kaingo mbatha mîtî îra îngî rî, ka ngaatiga gûciara matunda maakwa meega mara nciaraga marî mûrîo.’ 12 Rîru mîtî yeera mûcabiibû, ‘Ncû ûtuîke mûnene wetû.’ 13 Îndî mûcabiibû nau wacookia, ‘Kaingo ntuîka mûnene wenu, ka ngaatiga kûruta ndibei yakwa, îra îtûmaga Ngai na antû bakena.’ 14 Rîru mîtî yonthe yacooka yeera mûtî ûrî mîîgua, ‘Ncû ûtuîke mûnene wetû.’ 15 Mûgaa wamîcookeria wamîîra, ‘Wegua waabu i bûkwenda ntuîka mûnene wenu, ncûûni bûnogoke mûgunyeeni wakwa. Wegua t'ûgu, rûrîrîmbî rwa mwanki rûgaûka mpong'iini ciakwa irî mîîgua na ibîîthie mîthithinda ya Rebanoni.’ ”
16 Njothamu n'we, aathi na mbere kûbaûria, “Îîndî waabu rî, i bwarî eetîgua bûkîthuura Abimereki atuîka mûnene wenu? I bwarûthîîre Njerubu-Mbaari na mûciî wake bwega? I bwamûrûthîîre ta bûra aabûrûthîîre? 17 N'ûntû n'we wabûrûîrîîre na eebîkîra ûgwatiini akîbûtuunyûkia kuuma kîrî Amindiani. 18 Îndî îmunthî i bûûkîîrîîte mûciî wa baaba. I bûraûragîîre nthaka ciake mîrongo mûgwanja iigaani rîmwe. Na bwathuura mwana wake wa mwarî nkombo, Abimereki, bwamûtuîkithia mûnene wa Sekemu n'ûntû i mwana wenu. 19 Ûkaaya kwîgua bûra bwarûthîîre Ngindioni na mûciî wake i bwîtîgîîtie i bwega na bwa gîtîîyo, rîru nwa bûgwîrue n'we na n'we nwa agwîrue i biû. 20 Îndî ûkeegua t'ûgu, mwanki ûrootumûka kuuma kîrî Abimereki ûkabîîthia antû ba Sekemu na ba Bethi-Miro; na mwanki uume kîrî antû ba Sekemu na ba Bethi-Miro ûrûngûrie Abimereki.” 21 Rîru n'ûntû Njothamu n'aakuthûkaga mûruagina Abimereki, aumire agu aathi gûkara bantû eetagwa Beeri.
22 Abimereki aathire Isiraeri bantû a mîanka îthatû. 23 Rîru Ngai aatûma kîrundu kîîthûûku gatîgatî ka Abimereki na antû ba Sekemu; na antû babu ba Sekemu baatiga gûtuîka eetîgua kîrî Abimereki. 24 Bûbu bwakarîkire kaingo Abimereki na antû ba Sekemu, bara baamwîngagîîra aûraga aana bara ba Ngindioni mîrongo mûgwanja, barîua ûthûûku bûbu baarûthire. 25 N'ûntû bwa kûregana na Abimereki antû babu ba Sekemu baiga antû ba kûgiitîra antû njîraani tûrîmaani kûra îgûrû, na i baatunyaga antû bonthe into bara baakûrûkagîîra njîraani înu yarî akubî nabo. Na Abimereki eerwa mantû mamu.
26 Îgiitani warîru Gaari mwana wa Ebendi bauma baathi Sekemu barî na aruagina, na antû ba Sekemu beegua barî na wîtîgio n'we. 27 Nabo baumagarûka baathi mîndaani yao ya mîcabiibû, gûketha ncabiibû ira ciarî ku. Baabiba ncabiibû inu baarûtha ndibei na baaruga kîatho. Baathi nyomba ya ngai wao, baarîa na baanyua na baarumanîra Abimereki. 28 Gaari mwana wa Ebendi aûria, “Ka Abimereki arî ûû? I ka tiû antû ba Sekemu tûrî antû ba mûthemba ûrîkû, tûkûmûrutîra ngûgî? I ka arî ûû? Anga ti mwana wa Njerubu-Mbaari? Anga Seburi ti mûniini wake? Ka antû ba Sekemu barutîre antû ba Amori ngûgî n'ûntû we i kîûyûûyû gîa Sekemu.a I kî îndî gîgaatûma tûtûmîkîra Abimereki? 29 Ta ûkeegua antû baba i njaraani ciakwa barî, i mbîîngatia Abimereki. Nwaka mmwîra, ‘Ongeera acikaarî baaku tuumagarûke tûrûe!’ ”
30 Seburi mûtongoria wa taûni înu akwîgua bûra Gaari mwana wa Ebendi augîîte, n'aathûûrire mûno. 31 Aatûma atûmwa na witho kîrî Abimereki naagu Aruma. Baarî na ntûmwa yaugaga, “Gaari mwana wa Ebendi na aruagina bakûûya Sekemu, na i bakwîngîîra antû bakûreetera thîîna. 32 Rîru îîndî, woû na antû baaku nwa mwanka bûthi na ûtugû bûkeebithe mîndaani. 33 Ûkîîra rûû rûkîîrî riûa rîkiuma, woû na njûûrî yaku ya ndûa, bwithûkîre taûni înu. Rîru Gaari na antû baake bakaaya kuumagarûka bayîîte kûrûa naabi, ûkaûmba kûbarûtha wa bûra ûkeenda.” 34 Kwoogu Abimereki na antû baake bonthe bara aarî nabo baûkîîra ûtugû, beebangania ikundi binna rîru beebitha beteereete antû babu ba Sekemu. 35 Gaari mwana wa Ebendi aumagara aathi aarûngama mwîrîgaani wa taûni rîru Abimereki na acikaarî baake bauma naara beebithîîte. 36 Na Gaari akwona antû, eera Seburi, “Raitha wone i baara antû bakûgûrûka bakiumaga irîmaani kûra îgûrû!” Seburi n'we amwîra, “Woû ûrîona irundu bia irîma ûkoona ta antû.” 37 Gaari aaria kaîrî auga, “Raitha, wone i baara antû bagûrûkîîte kîrîmaanib na gîkundi kîmwe kîîyîîte na barabara baumîîte bwa mûpuru wa antû bara baringagîria antû.” 38 Rîru Seburi amûûria, “I kû wîkumia bwaku îîndî bûrî? Anga twa woû waûragia, ‘Abimereki n'ûû, tûmûrutagîra ngûgî?’ Anga antû wa baba twabo bwabûthagîîria? Umaani îîndî bûkarûe nabo.” 39 Gaari aatongoreeria antû ba Sekemu bauma baathi kûrûa na Abimereki. 40 Gaari aaturwa na augia rwîro aakuthûka. Abimereki n'we amwîngatia. Antû baingî baagwîre nthî baguraarîîtue, mwanka mwîrîgaani wa taûni înu. 41 Na Abimereki aatûûra Aruma, na Seburi eengatia Gaari na aruagina, bauma Sekemu. 42 Rûûni antû ba Sekemu baumagarûka baathi kîthakaani. Na Abimereki eerwa mantû mamu. 43 Kwoogu aathûkia antû baake abagaania icuncî bithatû, na beebitha kîthakaani, beeteereete. Akwona antû baayîîte kuuma taûniini înu, aumîra kîthakaani naara eebithîîte, aumbuthûkania nabo abaûraga. 44 Abimereki na gîkundi gîake kîra aarî nakîo baathi na mpwî kûrigîîria mwîrîga wa taûni înu, na ikundi bira bingî biîrî biathûnganîîria na antû bara bangî beebithîîte kîthakaani na babaûraga bonthe. 45 Abimereki aarûa na antû na taûni înu ntugû yonthe. Aagwata taûni înu, aathiria antû bonthe bara baarî ku, amîomoranga na aanyagaaria mwonyo ku. 46 Antû bara baatûîre Kîbayooni gîku gîa Sekemu bakwîgua bûra gwakarîkire, baathûûngîra wîbithooni ndeeni ya nyomba ya ngai ya Baarî Berithi. 47 Kûrî muntû werîîte Abimereki antû babu ba Kîbayo gîa Sekemu bonthe i beethîreene bantû amwe nyomba ya ngai ya Baarî Berithi. 48 Kwoogu Abimereki aathi eetia kîrîmaani kîa Sarumoni, we na bonthe bara aarî nabo. Na Abimereki aakamata kathoka, aatema rwong'i rwa mûtî aruîkîra gîturo arukamata. Eera antû baake, “Rûthaani bwa mpwî! Bûrûthe woogu bwona ndaarûtha.” 49 Kwoogu wora muntû aatema rwong'i rwake mûtîîni, baathingata Abimereki baûmbîîra nkû inu cionthe rûthingooni rûru baigerekanîîtie bwega. Bakûrîîkia ûgu baciîkîra mwanki, na antû barî bwa ndeeni. Kwoogu antû bonthe bara baarî rûthingooni rûru rwa Kîbayo gîa Sekemu baakua, bonthe baarî ta antû ngiri îmwe, arûme na aka. 50 Rîru Abimereki auma agu aathi taûni ya Thebesi, amîcîgîîria, na amîthûkia. 51 Îndî waagu taûni gatî, i kwarî na mûnaara warî na inya, na antû ba taûni înu bonthe, arûme na aka, i noogo baakuthûkîîre. Baathiire beebingîra ndeeni, na beetia mûnaaraani kûra îgûrû. 52 Abimereki akûûya kuithûka mûnaaraani ûyu, aathi mwanka mwîrangooni kaingo amuuntia mûnaara ûyu mwanki. 53 Mwekûrû ûmwe akwona ûgu, aathûkia nthio ya kûthia aarûkîria Abimereki ya kîongo, na rîamûbebenja. 54 Rîru, warîo Abimereki eeta mûthaka ûra aamûkamatagîra mîrigo ya ndûa amwîra, “Kûûra rûûyiû rwaku ûmbûrage. Ntikwenda antû bauga i mûka ûrambûragire.” Kwoogu mûthaka ûyu aakûûra rûûyiû aamunta Abimereki naru, na aakua. 55 Aisiraeri bakwona Abimereki n'ûmûkuû, bonthe beenûka wa muntû gwake. 56 Kwa njîra înu, Ngai aarîithia Abimereki mantû mathûûku mara aarûthîrîîte îthe, rîra aûragire aruagina mîrongo mûgwanja. 57 Ngai n'arîthiirie kinya antû ba Sekemu mantû mathûûku mara baarûthîîte. Kwoogu kîrumi kîra Njothamu mwana wa Ngindioni aabarumîîte, i kîabagwatire.