Ngindioni aûraga Seba na Sarumuna
8
1 Rîru antû ba Eburaimu baûria Ngindioni, “N'ata ûrûthire, warega gûtûîta ûkîthi kûrûa na Amindiani?” Baakararania na Ngindioni na inya îmbîî. 2 Na Ngindioni n'we eera antû ba Eburaimu, “Bûra bûrûthîrîîte antû ba Amindiani i bûnene nkûrûki ya bûra tiû antû ba Abieseri tûbarûthîrîîte.a 3 Ngai neeyanire anene baîrî ba Mindiani, Orebu na Seebu njaraani cienu. I bûrîkû ndûthîîte bûganeene na bûbu?” Akuuga ûgu, mûthûûro wao wagwîrîîra.4 Rîru Ngindioni aaringa muuro wa Njorondani arî na antû bara baake magana mathatû, îndî wana kinya ûkeegua i baarî bakûnoga, i baathiîte na mbere na kwîngatia maitha maao. 5 Bagûkinya Sukothi, eera antû ba taûni înu, “Itû aba ndûmîriani antû baba baakwa mîgaate. I baanogu mûno, naani nthingatane na Seba na Sarumuna, anene ba Mindiani.”
6 Na atongoria babu ba Sukothi nabo bamûûria, “Seba na Sarumuna batirî njaraani cienu, i kî îîndî n'ûntû tûkaa acikaarî baaku mîgaate?” 7 Kwoogu Ngindioni auga, “Rîra Mwathani akaanenkanîra Seba na Sarumuna njaraani ciakwa, nkaabûûrûûra nyama cia mîîrî yenu na mîîgua ya rwanda.” 8 Na akuuma agu eetia aathi bwa Penueri eera antû ba noogo wa bûra eerîîte antû ba Sukothi. Antû babu ba Penueri nabo bamûcookeria wa ta bûra aacookeerue n'antû ba Sukothi. 9 Eera antû ba Penueri ûûgû, “Ndacooka kaîrî kûrî na thîîrî, Nkoomoranga mûnaara ûyû.”
10 Îgiita rîru Seba na Sarumuna baarî Karikori barî amwe na njûûrî yao ya antû ngiri îkûmi na itaano bara baatigeere kuuma njûûrîîni ya antû ba kuuma uumîîro bwa riûa, n'ûntû acikaarî ngiri îgana na mîrongo îîrî i baarî bakûûragwa. 11 Ngindioni n'we eetiirie na barabara ya bara baatûûraga maremaani mbarî ya uumîîro bwa riûa bwa Noba na Njogibea, na aithûkîra njûûrî înu ya ndûa batarî na wîrîgîîro kana nwa baithûkîrwe. 12 Anene babu baîrî ba Mindiani, Seba na Sarumuna, baugia rwîro baakuthûka îndî amwe na ûgu eenganire nabo abagwata na aamakia njûûrî înu yonthe.
13 Rîru i rîo Ngindioni mwana wa Njoasi aacookeere mwîtioni wa Eresi naara aarûagîra ndûa. 14 Na aagwata mûthaka ûmwe wa kuuma Sukothi na amûûria biûria. Mûthaka ûyu aandîkîra Ngindioni mariîtwa mîrongo mûgwanja na mûgwanja ma atongoria na akûrû ba Sukothi. 15 Rîru Ngindioni aathi kîrî antû babu ba Sukothi abeera, “Bwanaanûkîîre bûkiugaga, ‘Ûtirî na Seba na Sarumuna njaraani ciaku, i kî îîndî n'ûntû tûkaa antû baaku baba banogu mîgaate? Ta raithaani îîndî bwone i baaba aaga.’ ” 16 Rîru Ngindioni aathûkia atongoria ba taûni inu ya Sukothi abaa îkaanûkia rîa kûbatandanga na mîîgua ya rwanda. 17 Aacooka oomborania mûnaara ûra warî Penueri na aûraga antû ba taûni înu. 18 Rîru Ngindioni aûria Seba na Sarumuna, “N'antû bakari ata bwaûragîîre Tabori?” Bamûcookeria bamwîra, “Baakari ta woû. Kîra ûmwe waciao aakari ta mwana wa mûnene.” 19 Ngindioni abacookeria abeera, “Bo baarî aruayia, na tûrî bagina ûmwe. Kwaria mma wa ta bûra Mwathani atûûraga mwoyo, ûkeegua bûtaabaûraga, wana niû ntikîbûûraga.” 20 Rîru eera Njetheri kîîmbere gîake, “Baûrage, îndî amwe na ûgu, Njetheri ataageria gûkûûra rûûyiû rwake n'ûntû kaarî kaana na igaakuthûkaga.” 21 Rîru Seba na Sarumuna beera Ngindioni, “Tûûrage wengwa, n'ûntû îno i ngûgî ya muntû ûmûnene.” Kwoogu Ngindioni wengwa abaûraga barî baîrî na aathûkia maburo mara maarî nkingo cia nkamîîra ciao aathi namo.
22 Nyuma ya ûgu Isiraeri beera Ngindioni, “Twathage, woû amwe na nciarwa ciaku ira ikaaya nyuma yaku. N'ûntû i woû watûkûûra twauma thîînaani ya antû ba Mindiani.” 23 Îndî Ngindioni abeera, “Ntibwatha kana mwana wakwa abwatha. Mwathani n'we akaabwatha.” 24 Ngindioni abeera, “Nkabûromba ûntû bûmwe akî. Wa muntû n'ampe mina cia matû ira bûtaire.” Antû ba Mindiani i beekagîra mina cia matû cia thaabu n'ûntû baarî antû ba Isumairi. 25 Antû bamûcookeria bamwîra, “Tûgakûneenkera cio.” Baathûkia nguo bamîara nthîgûrû, na muntû wonthe aagera mina ciake cia thaabu ira aataîte. 26 Ûrito bwa mina inu cia matû cia thaabu ira Ngindioni eetiirie ciarî akubî kiro mîrongo îîrî, atagûtara maburo, mînyoro ya nkingo, na nguo cia rangi ya ûkûyû ira anene ba Mindiani beekagîra, kana mîbûûrî îra yeegagua îîkîrîîtwe nkingooni cia nkamîîra ciao. 27 Ngindioni aitûmîra kûrûtha ebondi amîaiga Obura taûni yao. Aisiraeri bonthe beegua t'etîgua kîrî Ngai na baathi noogo kûgonga mûbuanaano ûyû. Na Efondi înu yaatuîka mûtego kîrî Ngindioni na mûciî wake. 28 Kwoogu Mindiani yaturwa n'antû ba Isiraeri na kuuma rîru Amindiani bataacooka gûkîîria biongo biao kaîrî. Kwagîa ûkiri nthîgûrû înu bantû a mîanka mîrongo înna ntugûûni cia Ngindioni.
Gûkua kwa Ngindioni
29 Njerubu-Mbaari mwana wa Njoasi aacooka kwao na aatûûra noogo. 30 Njerubu-Mbaari aarî na nthaka ciake ciagûciara mîrongo mûgwanja n'ûntû aarî na eekûrû baingî. 31 N'aarî na mûka ûngî wa kwaiga naagu Sekemu. Nwe amûciarîra kaana ga kaîyî ageeta Abimereki.b 32 Ngindioni mwana wa Njoasi aakuire arî ûmûkûûrûkûrû, na aathikirwe nthikooni ya îthe Njoasi, naara Obura, taûni ya antû ba Abieseri. 33 Nyumaani Ngindioni agûkua, antû ba Isiraeri baatuîka t'eetîgua kîrî Ngai na baacooka kûgonga Mbaari. Na baatuîkithia Mbaari-Berithi ngai wao. 34 Na antû babu ba Isiraeri bataaririkana Mwathani Ngai wao, ûra aaboonokeetie kuuma kîrî anthû baao bonthe. 35 Na kinya bataagîta nkuma kîrî mûciî wa Njerubu-Mbaari t'we Ngindioni na kûra kûrûthîra antû ba Isiraeri mantû meega.