Ngindioni aatura Amindiani
7
1 Rîru Njerubu-Mbaari (nwa we Ngindioni) na antû baake bonthe baûkîîra rûkîîrî na baamba marema maao akubî na kînyaka kîa Arondi. Na kambî ya antû ba Mindiani yarî kiurooni mbarî ya bwa îgûrû ya antû babu baake akubî na kîrîma kîa More.2 Mwathani eera Ngindioni ata rî, “Acikaarî baba ûrî nabo i baingî mûno nkûrûki. Nkaanenkanîra Amindiani njaraani cienu bûrî baingî ûûgu, Aisiraeri bageekumia mûno bauge, ‘I tiû tûreebonokiirie na inya yetû twingwa.’ 3 Kwoogu îta antû baaku ûbeere ûûgû, ‘Wegua kûrî muntû ûkuinaina n'ûguaya n'eenûke, aume Kîrîmaani kîa Ngiriandi.’ ” Antû ngiri mîrongo îîrî na ciîrî i beenûkire, na baatigwa antû ngiri îkûmi.
4 Îndî amwe na ûgu Mwathani eera Ngindioni, “Wana îîndî ûrî na antû baingî mûno nkûrûki. Baire rûûyîîni na i niû nkabagereria noogo bantû aaku. Ndakwîra muntû ûyû nabatîîrue bûthi n'we, akathi. Na ûra nkauga bûtikaathi n'we, atiithi.” 5 Ngindioni atongoreeria njûûrî yake beendama rûûyîîni. Rîru Mwathani amwîra, “Bara bakaanyua rûûyî bagîcûnacûnaga na rûrîme ta kurû, ûbaige mwanya na bara bagaaturia maru beendamîre rûûyî barûnyue.” 6 Antû bara baataire rûûyî baacûnacûna ta kurû baarî antû magana mathatû, na bara bangî bonthe baaturiirie maru baruîndamîra baanyua. 7 Mwathani eera Ngindioni, “Ngakwonokia na nkwe inya ya gûcinda antû ba Mindiani gûkûrûkîîra antû magana mathatû bara bataire rûûyî na mpî baanyua; Îra babu bangî bonthe wa muntû eenûke gwake.” 8 Antû bara baathuurirwe, baathûkia into ta irio na ngoci cia babu bangî. Ngindioni eera Aisiraeri babu bangî bonthe beenûke, îndî atigwa na antû bara magana mathatû. Kambî ya Amindiani yarî mbarî ya bwa iti ara Aisiraeri baarî kiurooni gîku. 9 Ûtugû bwa ntugû înu, Mwathani eera Ngindioni, “Ûkîîra wîndame withûkîre kambî ya Amindiani; I mbanenkanîrîîte njaraani ciaku. 10 Îndî ûkaaya kwîgua ûgîkuthûkaga kûthi ûrî gwenka, îthiiyania na Pura mûruti ngûgî waku. 11 Warûtha ûgu, ûkeegua bûra bakuuga, na rîru i rîo ûkaagwatwa n'ûrûme bwa kûbaithûkîra.” Kwoogu Ngindioni na mûruti ngûgî wake Pura beendama mwanka mûthiani wa ara kîmaamo kîa anthû babu baao gîankîîte. 12 Antû ba mwîrîga wa Mindiani na ba mwîrîga wa Amareki, na antû bonthe ba rûteere rwa uumîîro bwa riûa baanyageere kiurooni gîku ta ngige. Na nkamîîra ciao itigîtarîka nwa ta mûthanga wa îria. 13 Ngindioni agûkinya, n'eegiirue muntû ûmwe akîîra ûra ûngî mantû ma kîrooto. Augaga ûûgû, “Ndararootire ndoona mûgaate wa mûtu wa sayiri warûkîîte waingirita kambîîni ya Amindiani na waringa îrema warîkûrûmania. Îrema rîru rîatambûrûka.” 14 Nwe muntû ûyu amûcookeria amwîra, “Gîku ti kîngî i rûûyiû rwa Ngindioni mwana wa Njoasi, muntû wa Isiraeri. Ngai n'anenkanîrîîte Amindiani na kambî yonthe njaraani ciake!” 15 Ngindioni akwîgua mantû ma kîrooto na bûra ûtaûri bwakîo bwakari, aaturia maru aagonga Mwathani. Rîru aacooka kambîîni ya Aisiraeri abeera, “Ûkîîraani! N'ûntû Mwathani n'akûnenkanîra Amindiani njaraani cienu.” 16 Aarûthire ûûgu, aagaania antû bara baake magana mathatû ikundi bithatû na aanenkera wa kîra ûmwe waciao rûgoci na kaûngû kaatheri na karî na rûmonjo ndeeni. 17 Abeera, “Ndaathi ndaakinya mûthiani wa kambî, bûncûûbe, na bûrûthe wa bûra bûkoona nkîrûtha. 18 Rîra nkaaringa rûgoci niû amwe na bara nkeegua ndî nabo, rîru bûringe ngoci cienu na biû nteere cionthe cia kambî înu na buugîîrie, bûkiugaga, ‘N'ûntû bwa Mwathani na n'ûntû bwa Ngindioni.’ ” 19 Kwoogu Ngindioni na antû baake îgana bara aarî amwe nabo baakinya mûthiani wa kambî ya anthû baao ûtugû gatîgatî, nyuma ya araaria kûgarûkana. Rîru baaringa ngoci na baûraga tûûngû tûra baagwete na njara ciao. 20 Kwoogu ikundi bionthe birî bithatû biaringanîîria ngoci na biaûraga tûûngû. Bonthe baagwata moonjo ciao na njara cia ûmotho, na ngoci nacio njaraani ciao cia ûrîo na baugîîria bakiugaga, “Rûûyiû n'ûntû bwa Mwathani na n'ûntû bwa Ngindioni!” 21 Wa muntû wonthe aarûngi bantû aake wenka kûthiûrûûka kambî înu yonthe, na acikaarî ba anthû baao bonthe baugia rwîro baakuthûka bagîkayaga. 22 Bakûringa ngoci inu magana mathatû cionthe, Mwathani naatûmire acikaarî babu bonthe baarî kambîîni baanjîîria kûrûa bongwa bagîtemanganaga na mpiû ciao. Bara bataûragwa, baakuthûkire baathi bwa Bethi-Sita beerekereete bwa Serera. Na kuuma agu baathi mwankaani wa Abeeri-Meora, akubî na Tabathi. 23 Rîru antû ba Isiraeri ba kuuma mwîrîgaani wa Nabutarî na ba kuuma mwîrîgaani wa Aseri na ba nteere cionthe cia mwîrîga wa Manase beetwa, na beengatia antû ba Mindiani. 24 Na Ngindioni aatûma atûmwa kuunthe nthîgûrû îra îrî irîma ya Eburaimu na ntûmwa îkuuga, “Îndamaani bûkarûe na antû ba Mindiani. Na bûkabe mariûko monthe na kinya ma Njorondani mwanka bûkinye Bethi-Bara.” Kwoogu antû ba kuuma mwîrîgaani wa Eburaimu i beetirwe amwe, na baarigîîria mariûko mamu mangî monthe, na kinya ma muuro wa Njorondani mwanka Bethi-Bara. 25 Na i baagwatire atongoria baîrî ba Amindiani, Orebu na Seebu; baûragîîre Orebu rwaraani rwa iiga rwa Orebu, na Seebu n'we bamûûragîra kîbibiini kîa ndibei kîa Seebu. Na baathi na mbere kwîngatia Amindiani na baareeta kîongo kîa Orebu na kîa Seebu kîrî Ngindioni rûgoongo rûra rûngî rwa Njorondani.