Ngindioni
6
1 Kaîrî antû ba Isiraeri i baarûthire mantû maathûûku mbere ya Mwathani na kwoogu abanenkanîra njaraani cia Amindiani bantû a mîanka mûgwanja. 2 Antû ba Mindiani i bo baarî na inya nkûrûki ya antû ba Isiraeri. Na n'ûntû bwa bo, antû ba Isiraeri beerûthîra bantû akwîbithaga gûku irîmaani. Beebithaga makurunguuni na marinyaani na gûntû kûngî gwa kwîbitha. 3 Antû ba Isiraeri wa baanda mbeû, Amindiani bakaaya na Aamareki na antû bangî ba kuuma bwa uumîîro bwa riûa kûbaithûkîra. 4 Baayaga bakaamba marema maao noogo bakanjîîria kwînyangia irio birî mîndaani. Kuuma agu bakeendama mwanka bagakinya Gasa. Baathûkagia into bionthe ta ng'ondu, ng'ombe, na mang'ooi, na bagatiga antû ba Isiraeri batarî nwambi ya gûtûmîra. 5 Baayaga na nyamû ciao cia ndîîthia na marema mûkwîrî ta wa ngige. Bo amwe na nkamîîra ciao baarî baingî mûno na batigîtarîka. Baithûkagîra nthîgûrû bakamîînyangia. 6 Na antû ba Isiraeri bainyîîrua mûno n'Amindiani mwanka baarîrîra Mwathani.7 Rîra antû ba Isiraeri baakayîîre Mwathani abateethia n'ûntû bwa kuinyîîrua n'Amindiani, 8 Mwathani n'aatûmire kîroria kîrî bo; na ntûmwa îkuuga, “Mwathani Ngai wa Isiraeri ariuga, ‘Ndaabûrutire bwauma Miisiri, bwauma nyomba ya ûkombo; 9 ndabûkûûra njaraani cia Amiisiri, na kuuma kîrî bara bonthe baabuinyagîîria, ndabeengatia bauma kîrî biû na ndabwaa nthî yao. 10 Na ndaabwîrire I niû Mwathani Ngai wenu na bûtibatîîrue bûkuthûka ngai cia Amori, bara bûtûîre nthîgûrû yao. Îndî amwe na ûgu bûtaathikîîria kayû gaakwa.’ ”
11 Mûraîka wa Mwathani aaya aakara nthî ruungu rwa mûpuru naagu Obura, na mwene uu eetagwa Njoasi wa mwîrîga wa Abieseri. Na mwana wake Ngindioni aabûûragîra ngano kîbibiini gîa ncabiibû, kaingo atoonwa n'Amindiani. 12 Mûraîka wa Mwathani aumîîra Ngindioni amwîra, “Mwathani arî amwe naawe, woû ncamba îrî inya.”
13 Ngindioni amûcookeria amûûria, “Mwathani wakwa, ûkaaya kwîgua Mwathani arî amwe naati rî, i kî îndî n'ûntû mantû mama matûkarîkîrîîte ûûgû? Biama biake bionthe bira biûyûûyû bietû biatûîraga n'aringaga bio, birîkû îîndî? Anga Mwathani t'we waatûrutire Miisiri? Îndî îîndî Mwathani woyu n'atûtigîîte atûrekanîria na Amindiani, anthû beetû.”
14 Mwathani amûûndûkîra amwîra, “Îthi na inya înu ûrî n'yo ûgakûûre antû ba Isiraeri ûbarute njaraani cia Amindiani. Aanga ti niû ngûgûtûma?”
15 Ngindioni amûûria, “Mwathani n'ata nkaûmba gûkûûra antû ba Isiraeri? Na antû ba mûciî wetû i bo nkîa nkûrûki ya antû bara bangî bonthe ba mwîrîga wa Manase, na kwa baaba i niû mûniini nkûrûki ya bonthe.”
16 Mwathani amwîra, “Nkeegua ndî amwe naawe. Na ûkaathiria Amindiani ûkare taka ûkûrwaga na muntû ûmwe.” 17 Ngindioni amwîra, “Wegua na mma ûganteethia, mbonia ûntû bûgaatûma menya i woû Mwathani ûkwaria naani.” 18 Ngindioni aathi na mbere kûmwîra, “Itû ûtikaume aaga mwanka rîra ngaacooka nkûreetere kîewa kîra nkwenda gûkûrutîra.” Mwathani amwîra “Ngaakara wa aaga mwanka ûcooke.”
19 Kwoogu Ngindioni aathî aathîînja kabûri gatarî gakûrû mûno, na aatûmîra ta ndebe îmwea ya mûtu aaruga mîgaate îtaarî na ndawa ya kûmiimbithia. Eekîra nyama gîkabûûni na mûthûri nau acuîkîra kaûngûûni, airîra Mûraîka wa Mwathani ruungu rwa mûpuru, na amûneenkera. 20 Mûraîka wa Ngai amwîra, “Thûkia nyama na mûgaate ûyu ûtarî na ndawa ya kwimbithia, ûciaige rwaraani rûrû, na wonorie mûthûri oogo.” Na Ngindioni aarûtha wa bûra eerirwe. 21 Rîru Mûraîka wa Mwathani aariingithia nyama inu na mîgaate na mûthia wa mûraagi ûra aarî nau njaraani yake. Rûrîrîmbî rwa mwanki rwaûka kuuma rwaraani rûru rwa iiga rwarûngûria nyama inu amwe na mîgaate îra îtaarî na ndawa ya kûmiimbithia. Rîru Mûraîka wa Mwathani aûra meethooni. 22 Ngindioni akûmenya ûyu i Mûraîka wa Mwathani aarî, augîîria akiugaga, “Irû îî nkwona thîîna Mwathani Mwene Inya, n'ûntû nkwona Mûraîka wa Mwathani meetho kwa meetho!” 23 Îndî Mwathani n'we amwîra, “Ûkiri bûrookara naawe; ûtikaamake, ûtiikua.” 24 Rîru Ngindioni aakîra Mwathani kîthînjîro agu agîîta, “Mwathani n'ûkiri.” Wana îmunthî tûrî nwa gîtwîre agu Obura gwa antû ba mwîrîga wa Abieseri.
25 Ûtugû wa bûbu Mwathani eera Ngindioni ata rî, “Thûkia ncamba ya abaagu, ya ciîrî gûciarwa ya ûkûrû bwa mîanka mûgwanja na womboranie kîthînjîro kîa Mbaari kîra abaagu arî nakîo, na ûtemange mûbuanaano wîtagwa Asera ûra ûrî akubî nakîo. 26 Rîru gwakîre Mwathani Ngai waku kîthînjîro aaga kagûrîîni gaka kûra îgûrû. Na ûgîake bwega bûra kûbatîîrue. Rîru ûthûkie ncamba îra ya ciîrî gûciarwa, ûmîrute îrî kîgongwana gîa kûbîîthia, na ûgookie na nkû cia itugî bia Asera bira uunangire.” 27 Kwoogu Ngindioni aathûkia aruti ngûgî baake îkûmi na aarûtha wa ta bûra Mwathani aamwîrîîte arûthe. Îndî n'ûntû n'aakuthûkaga antû ba mûciî wa îthe na ba taûni înu, aarûthire ûgu kûrî ûtugû atakwonwa.
28 Antû ba taûni înu bakûraûka gûkîîra rûkîîrî gacaitîrî, kîthînjîro kîa Mbaari kîarî gîkwomboranua na gîtugî kîa Asera kîra kîarî akubî nakîo gîatemangwa, na ncamba îra ya ciîrî gûciarwa yabîîthîrua kîthînjîrooni kîra kîarî gîgwakwa agu. 29 Baûrania bongwa ata rî, “N'ûû ûrarûthire ûûgû?” Na nyuma ya gûcûnkûûna mantû bwega baamenya i Ngindioni mwana wa Njoasi ûrûthîîte bu.
30 Rîru antû babu beera Njoasi, “Reete mwana waku aaga tûmûûrage, n'ûntû naromboraniirie kîthînjîro kîa Mbaari na aatemanga gîtugî kîa Asera kîra kîraarî akubî nakîo.”
31 Îndî Njoasi aagondokera bara baamwithûkîrîîte, abaûria, “I ka bûkûtheteera Mbaari? Kana i bûkûgeria kûmûteethia? Ûra ûkwenda kûmûtheteera nakûûragwa wendî rûkîîrî. Wegua Mbaari i ngai akeetheteera wengwa, n'ûntû kîthînjîro gîake i kîomboraniirue.” 32 N'ûntû bwa ûgu, kuuma ntugû înu Ngindioni aatua gwîtwa Njerubu-Mbaari. Na ûgu i ta kuuga, “Ka Mbaari etheteere,” n'ûntû n'omboraniirie kîthînjîro gîake.
33 Rîru antû bonthe ba Mindiani, ba Amareki, na antû ba uumîîroni bwa riûa beethîrana amwe, baaringa muuro wa Njorondani, na baamba marema maao kîguuruuni kîa Njesireeri. 34 Îndî Kîrundu wa Mwathani aayîîra Ngindioni, na aaringa rûgoci agîîta antû bonthe ba mwîrîga wa Abieseri bamûthingata. 35 Aatûma atûmwa kîrî antû ba mwîrîga wa Manase bonthe, na kinya bo beetwa bamûthiingata. Aacooka aatûma atûmwa kîrî antû ba mwîrîga wa Aseri, wa Seburuni, na wa Nabutarî; wana kinya bo baathi kûmûthagaana.
36 Rîru Ngindioni eera Ngai ata rî, “Wegua na mma ûgaantûmîra kwonokia Isiraeri ta bûra waigire wîrane naani, 37 nkaiga guaya ya ng'ondu rwaraani rwa kûbûûrîra ngano mbone. Wegua guaya înu n'yo îkeegua îrî na maame yonka akî na nthî yonthe îîgue îtarî na kîthithina, rîru i rîo nkaamenya ûganteethia mbonokie Aisiraeri wa bûra waugire.” 38 Na ûgu i bu gwakarîkire. Ngindioni akuuma torooni rûûni rûkîîrî, aita guaya înu, amîthiora mwanka yauma rûûyî rwaûyûra mbakûri. 39 Rîru Ngindioni eera Ngai ata rî, “Ûtikanthûûrîre; tatiga mbuge bûûngî rîmwe akî. Mbîtîgîîria itû aba nthime ûntû bûngî na guaya îno rîmwe akî. Îîndî tatiga guaya îrî yo îîgue îtarî na maame, na nthîgûrû akî îîgue n'yo îrî na maame.” 40 Na ûgu i bu Ngai aarûthire ûtugû bûbu. Rûûni rûkîîrî nthîgûrû n'yo yarî na maame na guaya yarî îmbûmo.