Ndiboora na Mbaraki bainîra Mwathani
5
1 Ntugû înu, ndûa îkûthira, Ndiboora na Mbaraki mwana wa Abinoamu baina rwîmbo rûrû:2 “N'ûntû atongoria ba Isiraeri ibatongoreetie antû,
na antû beepeyana bakîendaga,
kumagiani Mwathani.
3 Thikîîriani, biû anene!
Thikîîriani, biû aathani!
Nkainîra Mwathani,
nkaina ngîkumia Mwathani,
Ngai wa Isiraeri.
4 Mwathani, rîra waumire irîmaani bia Seiri,
rîra wathiire kuuma nthîgûrû ya Endomu, a
nthîgûrû nîanainire,
na îgûrû rîaura mbura
îî, ma rûûyî naru
rwetîga kuuma matuuni.
5 Irîma bibi nabio,
i biainainire mbere ya Mwathani.
Namma, kîrîma gîkî gîa Sinai
i kîainainire mbere ya Mwathani,
Ngai wa Isiraeri.
6 Ntugûûni cia Samigari mwana wa Anathi,
na ntugûûni cia Njaeri,
barabara itaarî antû;
wana athii ba ngendo
bagendagîîra tûyîraani twa nteere.
7 Antû baathira ntûûrani, baathira,
mwanka rîra niû Ndiboora,
ndaûkîîre ndaatuîka gina ndeeni ya Isiraeri.
8 Rîra antû ba Isiraeri beethuurîrîîte ngai ciingî,
i rîo ndûa yaûkire wagu mîîrîgaani ya taûni.
Gatîgatî ga antû ngiri mîrongo înna ba Isiraeri
i kwonekire rong'o kana îtumo?
9 Nkoro yakwa n'yerekereete aathani ba Isiraeri,
bara beerutire
gatîgatî ga antû na nkoro ya kwîbendera.
Kumiani Mwathani.
10 Tûmîîriani mantû mamu,
biû bûkamatagwa i mang'ooi maayerû,
biû bara bûkaragîra matandîko ma goro ma îng'ooi,
biû bara bûthiiyaga na njîra.
11 Thikîîriani kayû ka aini gûntû kûra gûkaraga rûûyî.b
Barîtûmîîria mantû ma wagiru
mara Mwathani arûthîîte,
mantû maagîru ma antû baake ba ntûûra ba Isiraeri.
Rîru i rîo antû ba Mwathani beendamire
baathi mîîrîgaani ya taûni.
12 Ûkîîra, ûkîîra Ndiboora!
Ûkîîra, ûkîîra,
wine rwîmbo!
Ûkîîra na woû Mbaraki,
gwata mîgwate yaku,
woû mwana wa Abinoamu.
13 Rîru antû bara baatigarire beendama kîrî antû ba gîtîîyo;
antû ba Mwathani beendama kîrî niû,
amwe na antû bara ncamba.
14 Antû bamwe baayire baumîîte kîrî antû ba Eburaimu,
bara barî na mîri yao kwa Amareki.c
Bara bangî baumîîte kîrî antû ba mwîrîga wa Benjameni,
kuuma kîrî Makiri kwîndama aathani baumîîte ku,
wana kinya gwa Seburuni atongoria ba ndûa i baumire ku,
bara baakamataga ncûgûma ya mûtongoria wa njûûrî.
15 Atongoria ba Isakaari baarî amwe na Ndiboora,
na Isakaari aarî mwîtîgua wa ta Mbaraki;
Nabo beendamire na rwîro baakinya kiurooni,
bamûkinyîte itende.
Gatîgatî ga antû ba Rubeni
i kwarî na mîbango îmînene.
16 Woû Rubeni rî, i mbi n'ûntû wakarire biugûûni bia ng'ondu,
ûthikîîrîîtie arîîthi
bagîîta ng'ondu ciao na ithiene?
Gatîgatî ga antû ba Rubeni
i kwarî na gûtirikama kûûnene.
17 Antû ba Ngiriandi
baatwîre rûgoongo rûra rûngî rwa Njorondani;
na antû ba mwîrîga wa Ndani,
i mbi n'ûntû baatûûrire bakari meeriini.
Antû ba mwîrîga wa Aseri nabo baakaraga îkumbo,
baakaraga ara meeri ikinyûkagîria mîrigo,
18 Îndî antû ba Seburuni,
i bo antû bara beebîkîîre ûgwatiini bwa gîkuû.
Wa ta bûra antû ba Nabutarî baarûthire
baithûkîra anthû bantû aarî aûkîîru.
19 Anene baayire baarûa,
anene ba Kanaani baarwîra
naagu Taanaki, akubî na inyaka bia Megindo.
Îndî batataa fetha bathi n'yo.
20 Kuuma îgûrû nthata i ciarûaga,
irî njîraani cia cio, ciarûa na Sisera.
21 Mûguû wa muuro wa Kisoni waikondoria,
muuro ûyu wa tene, muuro wa Kisoni.
Nkoro yakwa,
îthi na mbere,
îgîa na inya!
22 Rîru ncûûga cia mbaraathi ciakinyaga nthî nainya,
n'ûntû bwa kûthûngûthathûngûtha kûra mbaraathi irî na inya
ciathûngûthathûngûthaga.
23 Rumaani taûni ya Merosi,
ûgu i bu Mûraîka wa Mwathani augire.
Wana antû ba noogo
barume ûbagûmbîîrie,
n'ûntû bataaya gûteetheeria Mwathani,
gûtetheeria Mwathani
akîrûa na ncamba inu cia antû.
24 Njaeri mwekûrû wa Eberi ûyu Mûkeni,
n'ûmûthaarime nkûrûki ya aka bonthe.
Aroothaarimwa nkûrûki ya aka bara bangî bonthe,
bara batûûraga maremaani.
25 Sisera akûromba rûûyî,
Njaeri amûkundiirie îria.
Amûretera maguta ma rûthuko marî mbakûriini ya ageni ba gîtîîyo.
26 Aatambûrûkia njara ya ûmotho,
aagwata rwambo rwa kwamba îrema,
njara yake ya ûrîo yaagwata kîria,
aathandûra Sisera na kîria gîku,
kîongo kîabebenjûka.
Aamûringîîre rwambo rûru rwa îrema
mbûrûgûtûûni rwaungurukana.
27 N'we aakurumana magûrûûni ma Njaeri,
aagwa nthî aamaama waagu
aagwa, aakua.
28 Gina wa Sisera araithîîria ndîrîcaani.
Arî ndîrîcaani augîîria akiugaga,
‘I mbi n'ûntû nkaarî yake yaakara na inya ûgu
îtakinyîîte?
I mbi n'ûntû tûtakwîgua
mûrurumo wa nkaarî ciake cia ndûa ciiyîîte?’
29 Aka baûme bara aarî nabo bamûcookeria,
n'we agacookera mîgambo wenu wengwa:
30 Anga tika booneete,
bakûgaa into bia gûtaa?
Wa muntû nooneete mwarî ûmwe kana baîrî
batuîke baake,
na nguo cia rangi ya mîthemba îmiingî,
kinya aataa îtaa rîa nguo inthongi
igemeetue na rangi mwanya mwanya.
Tûguo tûtu twataîtwe tûrî twîrî,
twagemeetue tûrî
twa nkingo twataîgwa.
31 Kwoogu anthû baaku bonthe baroothira,
woû Mwathani!
Îndî bara bakwendeete
barookara ta riûa rîkiuma na inya yaarîo.”
Rîru kwagîa na ûkiri nthîgûrû înu bantû a mîanka mîrongo înna.