Ndiboora na Mbaraki
4
1 Nyumaani Eundi agûkua, antû ba Isiraeri kaîrî baarûtha mantû maathûûku mbere ya Mwathani. 2 Na Mwathani n'we abanenkanîra kîrî Njabini mûnene wa Kanaani ûra aathanaga taûniini ya Asori. Mûnene wa njûûrî yake ya ndûa eetagwa Sisera na aatûûraga Arosethi-Agoimu. 3 Rîru antû ba Isiraeri baarîrîra Mwathani kaingo abateethia; n'ûntû Sisera n'aarî na nkaarî cia mbaraathi cia ndûa cia îthaga magana kenda, na aakarîîte akînyamaaragia antû ba Isiraeri mûno bantû a mîanka mîrongo îîrî.4 Îîndî kîroria kîa mûka Ndiboora, mwekûrû wa Rapindothi, n'we warî mûgiiti magamba wa antû ba Isiraeri kagiitaani gaku. 5 N'we aagiitagîra magamba ruungu rwa mûrûgûyû wa Ndiboora, gatîgatî ka Rama na Betheri nthîgûrû îra îrî irîma ya Eburaimu. Na noogo antû ba Isiraeri baayaga kûgiitîrwa magamba. 6 N'aatûmire muntû kîrî Mbaraki mwana wa Abinoamu wa kuuma Kendesi nthîgûrû ya Nabutarî, rîru eera Mbaraki ûûgû, “Mwathani Ngai wa Isiraeri aaruta watho akwîra, ‘Îthi bwa kîrîma gîa Tabori wîthîranie antû ngiri îkûmi kuuma mwîrîgaani wa antû ba Nabutarî na ba Seburuni ûthi nabo. 7 Naani ngakûretera Sisera mûtongoreeria wa njûûrî ya ndûa ya Njabini, arûe naawe agu muurooni wa Kisoni. Akeegua arî na nkaarî ciake cia mbaraathi cia ndûa amwe na acikaarî, îndî nkabwaa inya ya kûbacinda.’ ” 8 Mbaraki n'we eera Ndiboora ata rî, “Wegua tûkaathi naawe, nkaathi; îndî warega tûthiiyania, wana niû ntiithi.” 9 Ndiboora amûcookeria amwîra, “Na mma nkaathiyania naawe. Îndî gûtirî gîtîîyo ûkoona kuumania na ûntû bûbû. N'ûntû Mwathani akeeyana Sisera njaraani cia mûka.” Kwoogu Ndiboora auma baathiiyania na Mbaraki bwa Kendesi. 10 Mbaraki n'we eethîrania antû ba mwîrîga wa Seburuni na ba mwîrîga wa Nabutarî naagu Kendesi. Antû babu baamûthiingatire baarî ngiri îkûmi. Wana Ndiboora n'aathiyaniirie nabo.
11 Îîndî Eberi ûra aarî Mûkeni eebathûrana na Akeni bara bangî, nciarwa cia Obabu mûthonuue wa Musa. Na aambîîte îrema rîake naagu mûpuruuni ûra warî Saananimu, akubî na Kendesi.
12 Rîra Sisera egiirue Mbaraki mwana wa Abinoamu n'aathiîte aakinya kîrîmaani gîa Tabori, 13 eethîrania nkaarî ira ciake cionthe cia mbaraathi cia ndûa cia îthaga magana kenda, amwe na antû bonthe bara aarî nabo baathi bauma Arosethi-Agoimu mwanka baakinya muurooni wa Kisoni. 14 Ndiboora eera Mbaraki ata rî, “Îthi n'ûntû îmunthî n'yo ntugû îra Mwathani abangîîte kweyana Sisera njaraani ciaku ûmûtura. N'ûntû Mwathani nagûtongoreetie.” Kwoogu Mbaraki aatongoreeria njûûrî yake ya ndûa ya antû ngiri îkûmi baagûrûka kîrîma gîku gîa Tabori. 15 Mwathani aamakia Sisera na antû baake bonthe bara baarî nkaarîîni ciake cia mbaraathi cia ndûa na njûûrî yake yonthe rîra Mbaraki aabaithûkîîre na rûûyiû. Sisera aakinyûka nkaarîîni yake ya ndûa augia na magûrû. 16 Mbaraki eengana na nkaarî cia mbaraathi cia ndûa na njûûrî înu kuuma agu mwanka Arosethi-Agoimu, akîbaûragaga bonthe na rûûyiû. Na gûtirî nwa ûmwe wa njûûrî ya Sisera aatigara arî mwoyo.
17 Îndî Sisera augiirie rwîro aakuthûka atarîîte bwa îrema rîa Njaeri, mwekûrû wa Eberi ûra aarî Mûkeni; n'ûntû i kwarî na ûkiri gatîgatîîni ka Njabini mûnene wa Asori na antû ba Eberi, Mûkeni. 18 Njaeri aumagarûka kûthagaana Sisera amwîra, “Thûngîra aba, ûtikaamake.” Kwoogu Sisera aathûngîra îremaani rîake na Njaeri amûguîka. 19 Aacooka amwîra, “Itû nkundia rûûyî nyue, ndî na bûûta.” Kwoogu amûkundia îria na aacooka amûguîka kaîrî. 20 Sisera eera Njaeri, “Rûngama mwîrangooni wa îrema muntû akaaya kûûya agakûûria, ‘Kûrî muntû arî aaga,’ ûmûcookerie ûmwîre, ‘Gûtirî we.’ ” 21 Îndî Sisera akûmaama n'ûntû bwa kûnoga, Njaeri mwekûrû wa Eberi aaciemeeria mpoora agwete kîria na rwambo rwa kwamba îrema aathi ara Sisera aarî. Rîru aathûkia rwambo rûru na kûmûringîra ru wagu gatîgatî ka riitho na gûtû na rwabuura rwamuunta nthî, Sisera aakua. 22 Mbaraki akûûya agîcwaga Sisera, Njaeri aumagarûka aakomana n'we. Amwîra, “Ncû nkwonie muntû ûra ûgûcwaa.” Akîthi na kwîthîra Sisera amaami nthîgûrû arî mûkuû, na rwambo rwa îrema rûrûûngi kîongo gîake.