Agiiti Magamba 3

Mîgoongo îra yatigirwe Kanaani

1 Îno n'yo mîgongo îra Mwathani aatigariirie ya kûthima n'yo antû ba Aisiraeri, bonthe bara bataaro rûa ndûa nwa îrîkû nthîgûrû ya Kanaani. 2 Aarûthire ûûgû n'ûntû bwa kûrutana nciarwa cia Isiraeri ira itaaro îgua irî ndûani kaîrî mantû ma ndûa. 3 Bara baatigirwe nthîgûrû înu baarî anene bataano ba Afirisiti, Akanaani bonthe, Asindoni na Aibi bara baatûîre irîmaani bia Rebanoni kuuma kîrîmaani kîa Mbaari-Erimoni mwanka mûthûngîîrooni wa Amathi.

4 Babu baatigarîîtue barî ta kîthimi gîa kûthima nakîo Aisiraeri oona wegua Aisiraeri bakaathîkîra maathana ma Mwathani, mara aapeere biûyûûyû biao gûkûrûkîîra Musa. 5 Kwoogu antû ba Isiraeri baatûûranîîra na antû ba Kanaani, Aiti, Amori, Aperisi Aibi na Anjebusi. 6 Aisiraeri baagûra aarî ba antû babu na aarî ba Isiraeri nabo baagûrwa i nthaka cia antû babu. Na Aisiraeri baatûmîkîra ngai cia antû babu.

Othinieri

7 Antû ba Isiraeri i baarûthire mantû mathûûku mbere ya Mwathani, baariganîrua i Mwathani Ngai wao na baatûmîkîra Mbaari na Asera. 8 Kwoogu mûthûûro wa Mwathani wankana n'ûntû bwa antû ba Isiraeri na abanenkanîra njaraani cia mûnene Kusani-Risathaimu wa Mesopotamia, na antû ba Isiraeri bamûtûmîkîra bantû a mîanka înaana. 9 Rîru antû ba Isiraeri baakayîra Mwathani, n'we abatûmîra muntû wa kûboonokia, Othinieri mwana wa Kenasi mûruna wa Karebu. 10 Kîrundu wa Mwathani aayîîra Othinieri, na aatuîka mûgiiti magamba wa antû ba Isiraeri. Auma aathi ndûani, na Mwathani aanenkanîra Kusani-risathaimu mûnene wa Mesopotamia njaraani ciake amûtura. 11 Nthîgûrû înu yaagea na ûkiri bantû a mîanka mîrongo înna. Rîru Othinieri mwana wa Kenasi aakua.

Eundi

12 Kaîrî Aisiraeri baarûtha mantû mathûûku mbere ya Mwathani. Na n'ûntû bwoogu Mwathani eekîra Egironi mûnene wa Moabu inya ya gûcinda Aisiraeri. 13 Mûnene Egironi eethîrania njûûrî yake ya ndûa na ya Amoni na Amareki; baathi kûrûa na Aisiraeri na baagwata Njeriko taûni ya mîkîndû. 14 Na antû babu ba Isiraeri baatûmîkîra Egironi mûnene wa Moabu bantû a mîanka îkûmi na înaana.

15 Îndî antû ba Isiraeri bakûrîrîra Mwathani abateethia, Mwathani n'aabatûmîîre muntû wa kûbateethia. Muntû ûyu eetagwa Eundi, muntû aarî wa njara ya kîmotho, ûra aarî mûthaka wa Gera kuuma mwîrîgaani wa antû ba Benjameni. Antû ba Isiraeri i baatûmîîre Egironi mûnene wa Moabu ûgooti, nabu bwairirwe ni Eundi woyu. 16 Eundi n'eeturîîre rûûyiû rwarî rûûgî mbarî cionthe rwa ûraaya bwa biiti îmwe na nucu, na arûcinîka mûthiori rûteere rwa ûrîo nguoni ndeeni. 17 Rîru aathûkia ûgooti bûbu airîra Egironi mûnene wa Moabu muntû aarî ûmûnoru mûno. 18 Eundi akûrîîkia kweyana biewa bibu kîrî mûnene Egironi, eera antû bara baabikamatîîte beenûke kwao. 19 Îndî Eundi agûkinya ara mîbuanaano yarî akubî na Girigari aûndûka, aathi kîrî mûnene Egironi amwîra, “Ndî na ntûmwa yaku ya witho.” Kwoogu mûnene eera aruti ngûgî baake bara baarî n'we bakire na baume nja. Bonthe baumagarûka. 20 Rîru Eundi aathi kîrî we eethîra akari nthî wenka kanyomba gaake ka îgûrû gataarî na îrûngû amwîra, “Ndî na ntûmwa yaku kuuma kîrî Ngai.” Mûnene aûkîîra gîtîîni gîake kîa ûnene aarûngama. 21 Na rîru Eundi aatambûrûkia njara yake ya kîmotho aakûûra rûûyiû rwake rûra rwarî kauna rûteere rwa ûrîo aamunta mûnene ûyu nda. 22 Rûûyiû rûru na ntumbî mbene, rwathirîra nda ya mûnene na rwakunîkwa i mathuunya n'ûntû ataamûkûûra ru. Na into bia nda biauma na thunthuna. 23 Rîru Eundi aumagarûka nja, aacookia mîrango ya kanyomba gaku ka îgûrû na amiinga.

24 Akûthi aruti ngûgî ba mûnene baaya beethîra mîrango ya kanyomba gaku keegûrû îrî miinge. Bauga, “Nwa mwanka wîgue mûnene n'agwîteethia gûku kanyomba gaku gatarî na îrûûngû ka ndeeni.” 25 Baakarire beeteereete mwanka baanogerwa, îndî ataarugûra mîrango, kwoogu baathûkia mbungûro baarugûra mîrango. Bakûraitha boona mûnene wao agwîte nthî akuîte.

26 Wa betereete Eundi auma aathi. Aakûrûkîîre ara kwarî na mîbuanaano aatoorooka aathi bwa Seira. 27 Rîra aakinyire nthî îra îrî ya irîma ya Eburaimu aaringa rûgoci agîîta antû ba Isiraeri bathi ndûani. Rîru abatongoreeria beendama kuuma irîmaani bia Eburaimu. 28 Abeera, “Nthingataani; n'ûntû Mwathani n'anenkanîrîîte anthû beenu Amoabu njaraani cienu.” Kwoogu baathingata Eundi beendama na baathi baagwata mariûko mara antû baaringagîra Njorondani bakathi Moabu; bataarekeeria muntû nwa ûmwe aringa muuro ûyu. 29 Na ntugû înu baûragire antû arûme ba Moabu ta ngiri îkûmi, bara bonthe baarî na inya mûno na ncamba imbîî cia ndûa; na gûtirî nwa ûmwe aamonyoka. 30 Ntugû înu n'yo antû ba Isiraeri baaturire Amoabu, na kwagîa ûkiri nthîgûrû înu bantû a mîanka mîrongo înaana.

Samigari

31 Nyuma ya Eundi, Samigari mwana wa Anathi n'we wonokiirie antû ba Isiraeri. Aûragire Afirisiti magana mathanthatû agîtûmagîra mûtî ûmûthongoku.