Mûraîka wa Mwathani aaria na Aisiraeri naagu Bokimu
2
1 Mûraîka wa Mwathani eetia aumîîte Girigari aathi Bokimu arî na ntûmwa kîrî antû ba Isiraeri. Abeera, “Ndaabûrutire nthî ya Miisiri ndabûreeta nthî îra ndaathiîtiirie ndauga nkaanekera biûyûûyû bienu yo. Na ndauga, ‘Ntikooro mbînyangia kîrîîkanîro gîakwa nabo.’ 2 Na ndaabwathire ndabwîra, ‘Bûtikaarûthe kîrîîkanîro na antû bara batwîre nthîgûrû inu, îndî bwomboranie ithînjîro biao.’ Îndî bwarega kûthikîîria kayû gaakwa. I kî n'ûntû bûrûthîîte ûûgû? 3 Kwoogu îîndî naani ndiuga ûûgû, ‘Ntibeengatia bathi bauma kîrî biû. Îndî bakeegua bakari ta mîîgua îbûmuntîîte mbaruuni cienu, na ngai ciao ikeegua irî mîtego kîrî biû.’ ” 4 Mûraîka wa Mwathani akûrîîkia kwîra antû ba Isiraeri bonthe mantû mamu, i rîo antû babu baûkire na irîro bakiugagîîria na inya. 5 Na beeta bantû agu Bokimu.a Nabo baarutîra Mwathani igongwana oogo.6 Njosua akwaa antû ba Isiraeri rûûtha rwa kûthi, wa muntû aathiire kwîgwatîra bantû aake ara aagaîrîîtwe. 7 Na antû babu baatûmîkîra Mwathani ntugû cionthe cia Njosua na akûrû bara baatigirwe Njosua agûkua. Na bara booneete mantû maanene monthe mara Mwathani aarûthîrîîte antû ba Isiraeri. 8 Rîru Njosua mwana wa Nuni, mûruti ngûgî wa Mwathani, aakua arî na ûkûrû bwa mîanka îgana na îkûmi. 9 Nabo baamûthikire nthîgûrû yake îra aagaîrîîtwe naagu Timunathi-Eresi nthî îra yarî ya irîma ya Eburaimu mbarî ya îgûrû ya kîrîma gîa Gaasi. 10 Nthuke înu yonthe n'yarî gûkua, na nthuke yîîngî yaaya îtaiyî Mwathani kana îmenya mantû mara Mwathani aarûthîrîîte antû ba Isiraeri.
11 Rîru antû ba Isiraeri baarûtha mantû mathûûku Mwathani akîonaga na banjîîria gûtûmîkîra ngai cia Mbaari. 12 Baatiganîria Mwathani, Ngai wa biûyûûyû biao, Ngai ûra aabarutire nthî ya Miisiri, baathingata ngai ciingî, ngai imwe cia antû bara baatûûranîîre nabo. Baiturîria maru, baathûûria Mwathani. 13 Baatiganîîrie Mwathani na baatua kûgonga Mbaari na Asitorethi. 14 Kwoogu Mwathani aankanwa i mûthûûro n'ûntû bwa Aisiraeri, n'we abarekanîria kîrî atuunyani bara baabatuunyire into biao. Aacooka abaneenkanîra kîrî anthû baao bara baabathiûrûkîrîîte, na wegua batikîûmba kwîrigîîria gûturwa i bo. 15 Kagiita konthe kara antû ba Isiraeri baathiyaga ndûani, Mwathani n'arûaga nabo, wa ta bûra aabathiîtîrîîtie. Nabo baanyamaara mûno.
16 Rîru Mwathani eeyana agiiti magamba bara boonokiirie antû ba Isiraeri kuuma kîrî antû bara baabatuunyaga into biao. 17 Îndî amwe na ûgu bataathîkîra agiiti magamba babu baao. Antû ba Isiraeri bataarî eetîgua kîrî Ngai, baathingataga ngai cia mîbuanaano bagîcituragîria maru. Biûyûûyû biao i biathîkagîra watho bwa Mwathani, îndî bo warîo baatiga kûrûtha ûgu. 18 Warîonthe rîra Mwathani eeyaga antû ba Isiraeri mûgiiti magamba, Mwathani n'anteethagia mûgiiti magamba ûyu n'we akoonokia antû kuumania na anthû baao bunka rîra mûgiiti magamba ûyu arî mwoyo. Mwathani n'abeegîîrue kîao n'ûntû bwa gûkaya kûra baakayaga n'ûntû bwa bara baabainyagîîria na kûbanyamaaria. 19 Îndî mûgiiti magamba ûyu aarîîkia gûkua, bagacooka wa ara akûrû. Bakarûtha mantû maathûûku nkûrûki ya bûra biûyûûyû biao biarûthaga. Baathingataga ngai ciingî na njîra ya gûciathîkîra na guiturîria maru. Na bataatigana na mîtugo yao îmîthûûku na njîra ciao cia ûremu. 20 Kwoogu Mwathani aankanwa i mûthûûro n'ûntû bwa antû ba Isiraeri na auga, “N'ûntû antû ba mûgongo ûyû bakwîyia na beenyangia kîrîîkanîro kîra ndaigire na biûyûûyû biao, na baarega kûthikîîria kayû gaakwa, 21 wana niû ntibeengatîria mûgongo nwa ûmwe wa îra yaatigirwe i Njosua agîkua yuuma kîrî bo kaîrî. 22 Ngaatûmîra antû babu kûthima mbona wegua antû ba Isiraeri bakaathingata njîra ya Mwathani ta bûra biûyûûyû biao biarûthire kana batiirûtha bu.” 23 Kwoogu Mwathani aatigaria mîgongo înu ataabengatia warîmwe na ataabanenkanîra njaraani cia Njosua.