AGIITI MAGAMBA
Agiiti magamba ba Mîîrîga ya antû ba Njunda na ba Simioni baarûa na Akanaani
1
1 Gwakarîkire ata rî, nyuma ya Njosua agûkua, antû ba Isiraeri baûria Mwathani ata rî, “N'ûû akaamba gwîtia Kanaani akarûe nabo n'ûntû bwetû?” 2 Mwathani abacookeria abeera, “Antû ba mwîrîga wa Njunda i bo bakaathi barî ba mbere. I nnenkanîrîîte nthîgûrû înu îtuîke yao.” 3 N'we Njunda eera mûruagina Simioni ata rî, “Ncû twîtie naawe gûntû kûra gwatuîkire mbûrago yakwa, kaingo tûthi kûrwîra na antû ba Kanaani noogo. Naani ngaacooka nthi naawe gûntû kûra gwatuîkire mbûrago yaku.” Kwoogu Simioni aathiiyania n'we. 4 Antû ba Njunda bakuithûka, Mwathani aanenkanîra antû ba Kanaani na ba Aperisi njaraani ciao. Na baûragîra antû ngiri îkûmi bantû eetagwa Beseki. 5 Wa barî Beseki i baakomanire na Andoni-Besekia baarûa n'we, na baatura Akanaani na Aperisi. 6 Andoni-Beseki augia aakuthûka; îndî amwe na ûgu beengana n'we bamûgwatagwata, na bamûgitaanga biara bira binene bia njara na bia magûrû. 7 Rîru Andoni-Beseki auga ata rî, “I kwarî na anene mîrongo mûgwanja baagiitîîtwe biara bira binene bia njara na bia magûrû, booyaga tûng'enyûrû twa irio tûra twagwîyaga ruungu rwa meetha yakwa bakîrîîyaga. Kwoogu wa bûra ndaarûthire, nwabu Ngai akûndîyia.” Nabo bamûthûkia bamwira Njerusaremu, aakuîra noogo.8 Rîru antû ba Njunda baithûkîra Njerusaremu na bamîgwata. Baathiria antû na rûûyiû na bamîbîîthia. 9 Na nyuma yoogu antû ba Njunda baathi kûrûa na Akanaani bara baatûîre nthî îra ya irîma, na nthî ya Negebu, na bara baatûîre mîaranthî ya irîma mbarî ya ûthwîro bwa riûa. 10 Nyuma yoogu baithûkîra Akanaani bara baatûîre taûni ya Eburoni, îra mbereeni yetagwa Kiriathi-Ariba; na baatura Sesai, Aimani na Tarumai. 11 Kuuma agu baataambîîra antû bara baatûûraga taûni ya Ndebiri îra agu mbereeni yeetagwa Kiriathi-Seferi. 12 Rîru Karebu n'we auga, “Muntû ûra agaatura taûni ya Kiriathi-Seferi na amîtae, n'we nkaanenkera mwarî wakwa Akisa amûgûre atuîke mwekûrû wake.” 13 Na Othinieri mwana wa Kenasi, mûruagina wa Karebu ûra mûniini n'we aamîgwatire. Kwoogu Karebu amwaa mwar'wake Akisa amûgûra.
14 Akisa akûgûrwa n'Othinieri, Akisa eerire Othinieri eere mûthonuue amwongeere kîthaka. Na aakinyûka auma mûgongooni wa îng'ooi rîake; Karebu amûûria, “N'ata ûkwenda nkûrûthîra?” 15 Akisa n'we amûcookeria amwîra, “Inkwenda ûnthaarima. Na n'ûntû n'ûnenkerete nthîgûrû ya Negebu, îîndî ûkeegua wenda, nwa ûnenkere kinya gûntû kûrî na inyaka.” Kwoogu Karebu amwaa gûntû kwarî na inyaka mbarî ya îgûrû na mbarî ya iti.
16 Na antû ba rûrîîyo rwa mûthonuue wa Musa, Akeni, bauma taûni ya mîkîndûb barî amwe na antû ba Njunda baakinya rwanda rwa Njunda rûra rûrî Negebu akubî na Arandi, na baathi baatûûranîra na antû babu. 17 Antû ba Njunda na ba mûruagina Simioni baathi baarûa na antû ba Kanaani bara baatûîre taûni ya Sefathi, bamîînyangia cwe. Kwoogu taûni înu yeetwa Orima.c 18 Nyuma ya ûgu, Njunda aatuunyana Gasa amwe na mîanka yayo, na Asikeroni na mîanka yayo, na Ekironi na mîanka yayo. 19 Na Mwathani n'aarî amwe na Njunda. Na antû ba Njunda i baatuunyanire nthî îra yarî na irîma. Îndî bataûmba kwîngatia antû bara baatwîre mwaranthî, n'ûntû bo i baarî na nkaarî cia mbaraathi cia ndûa cia îthaga ira ikururagua i mbaraathi. 20 Nabo baanenkera Karebu taûni ya Eburoni wa ta bûra Musa augîîte. Karebu eengatia aana bathatû ba Anaki bauma ku. 21 Îndî antû ba Benjameni bateengatia antû ba Anjebusi bara baatûîre Njerusaremu; kwoogu wana îmunthî tûrî, antû ba Ayebusi batûûranîrîîte na antû ba Benjameni ndeeni ya Njerusaremu.
22 Antû ba mûciî wa Njosebu wana bod i baathiire kûrûa na antû ba taûni ya Betheri; na Mwathani n'aarî amwe nabo. 23 Na antû ba mûciî wa Njosebu i baatûmire antû baathi kûthigaana taûni ya Betheri. Mbereeni taûni înu yeetagwa Rusi. 24 Athigaani babu boona muntû aumagarûkîîte taûniini înu, bamwîra, “Tatwonie njîra ya kûthûngîra taûni, na mantû maaku matiithûûka.” 25 Na muntû ûyu n'we aboonia mûthûngîîro wa taûni înu. Bakûthûngîra ku, baathiria antû na mpiû, îndî muntû ûra aabooniirie njîra amwe na antû ba mûciî wake bonthe bataûrua. 26 Nyuma yoogu, muntû ûyu auma agu aathi nthîgûrû ya Aiti, aaka taûni noogo na amîîta Rusi; na rîru i rîo riîtwa rîayo mwanka îmunthî tûrî.
27 Antû ba mwîrîga wa Manase bateengatia antû bara baatûîre Bethi-Sani na ntûûra ciayo, wana bara baatûîre Taanaki, Ndori, Ibureamu na ntûûra cia cio, kinya bara baatûîre Megindo na ntûûra ciayo. Îndî Akanaani bo i baaregeere nthîgûrû înu. 28 Gwakarîkire ûgu, Aisiraeri bakwongeereka na baagîa inya, i rîo baanjîîrie kûrutithia Akanaani ngûgî cia taka, îndî amwe na ûgu bataabakûûra ku cwe.
29 Wana kinya antû ba mwîrîga wa Eburaimu bateengatia Akanaani bara baatûîre Ngeseri; îndî Akanaani babu baathi na mbere gûtûûranîîra na antû ba Eburaimu naagu Ngeseri.
30 Wana kinya antû ba mwîrîga wa Saburoni bateengatia Akanaani bara baatûîre Kitironi, kana bara baatûûraga Naarori; îndî Akanaani babu nwa gûtûûra baatûûraniirie nabo, na antû babu ba Seburuni baatua kûbarutithia ngûgî cia taka.
31 Antû ba mwîrîga wa Aseri bateengatia antû bara baatûîre Ako, kana beengatia bara baatûûraga Sindoni, Aarabu, Akisibu, Eriba, Afiki kana beengatia bara baatûûraga Reobu. 32 Antû babu ba Aseri baarûthire ûgu, baatûûranîra na Akanaani bara baatûûraga nthîgûrû inu; n'ûntû bataabengatia.
33 Antû ba mwîrîga wa Nabutarî bateengatia antû bara baatûûraga taûniini cia Bethi-Semesi na Bethi-Anathi. Bathiire na mbere gûtûûranîra na Akanaani babu bakîbarutithagia ngûgî cia taka.
34 Na Amori nabo, baarigîîria antû ba mwîrîga wa Ndani nthî îrî irîma; na batabeetîgîîria bakinyûka mwaranthî. 35 Nabo Amori baaregeere kîrîmaani kîa Eresi, Aiyaroni na Saaribimu, îndî antû ba mwîrîga wa Njosebu baagîa inya nkûrûki yabo na mwanka baatua kûbarutithagia ngûgî cia taka. 36 Nau mwanka wa Amori wanjîrîîtie mwîtioni wa Akirabimu,e wakinya Sera na wathi na mbere gwîtia kuuma agu.