Mika na mwîrîga wa antû ba Ndani
18
1 Îgiitaani rîru gûtaarî na mûnene nthîgûrû ya Isiraeri. Na îgiitaani warîru antû ba mwîrîga wa Ndani i baacwaga bantû ao a gûtûûra, n'ûntû bo bataarî bakûgaîrwa bantû a gûtûûra gatîgatî ka mîîrîga ya Isiraeri. 2 Kwoogu antû ba mwîrîga wa antû ba Ndani baathuura antû bataano bara ncamba kuuma mîciî ya mîîrîga yao yonthe na babatûma kuuma taûni ya Sora na ya Esitaori, kûthigaana mantû ma nthîgûrû înu na bamîraithîîria. Bagûkinya nthî înu ya irîma ya Eburaimu, baakinya mûciî kwa Mika na baaraara noogo. 3 Barî wagu kwa Mika, baamenya rwaria rwa mûthaka ûyu Mûrawi, baathi kîrî we bamûûria, “N'ûû aakûreetire aaga? I ngûgî mbi ûkûruta aaga? I mbi ûkwenda aaga?” 4 Mûthaka ûyu abacookeria abeera, “Kûrî mûbango ndî nau na Mika, ûra ambandîkîîte mûrutîra ngûgî ndî mûthînjîri wa ngai.” 5 Nabo bamwîra, “Ta ûria Ngai kaingo tûmenya wegua rûgendo rwetû rûkaabua.” 6 Mûthînjîri ûyu wa ngai wake abeera, “Îthiini na ûkiri. Rûgendo rûrû bûthiîte, bûkaamenyeerwa i Mwathani.” 7 Kwoogu antû babu bataano bauma agu baathi bwa taûni ya Raisi. Bakûthi beethîra bûra antû baatûûraga bataatindanagîra na antû, nwa ta antû ba Sindoni. Baarî na ûkiri, antû baakirîîru, gûtarî we warûaga na ûngî; gûtirî kîo baagaga na baarî na bionthe bira biendekanaga. Bo baatûîre aaraaya na antû ba Sindoni na bataarî na thîîna na muntû kinya ûrîkû. 8 Athigaani babu bagûcooka Sora na Esitaori, antû baao i beendire kûmenya bûra boonire. 9 Nabo bauga, “Tûthiini tûkarûe na antû ba Raisi; n'ûntû tûkûraitha twona i nthîgûrû înoru mûno. I ka biû bûgaakara gûtarî bu bûkûrûtha? Bûtigaate kaanya bûtathiîte kûmîthûkia îtuîka yenu. 10 Bwakinya, bûkeethîra antû naagu i bamaamîrîte maanda kûnora. I nthîgûrû înene, na gûtirî kîo muntû acwaa ku kîûra, na Ngai akûbwaa yoo.”11 Kwoogu antû magana mathanthatû kuuma mwîrîgaani wa Ndani bauma Sora na Esitaori barî na mathaga ma ndûa beethuuranîrîîte kûrûa. 12 Nabo Beetiirie baamba marema rûteere rwa ûthwîro bwa riûa bantû eetagwa Kiriathi-Njearimu naagu nthîgûrû ya Njunda. Gîku i kîo gîtûmi gûntû gûku gwîtagwa kambî ya Ndani wana îmunthî tûrî. 13 Kuuma agu baakûrûka mwanka baakinya nthî ya irîma ya Eburaimu, na baathi kwa Mika mûciî.
14 Bagûkinya agu, antû bara bataano baatûmîîtwe bathi kûthigaana nthîgûrû ya Raisi babeera, “I bûkûmenya kana mûciî ûyû kûrî na mîbuanaano ya ebondi na terapimu, na kinya mûbuanaano wa gûcaa na ûngî ûrûthîîtwe na into bia gûkanjûkua? Kwoogu îîndî thûgaaniani bûra tûkûrûtha.” 15 Nabo baathûkîra nyomba ya mûthaka ûyu mûciî wa Mika, beethîra mûthaka ûyu Mûrawi aakaraga oogo bamûkeethia. 16 Na antû bara magana mathanthatû ba kuuma mwîrîgaani wa antû ba Ndani, bara beebogeete mathaga ma ndûa, baarûngama mwîrîgaani wa mûciî wake. 17 Athigaani bara bataano baathi baathûngîra nyomba na baathûkia mûbuanano ûyu wa ngai ya gûcaa, wakandîîtwe na fetha îrî nkanjûkie, na baathûkia mûbuanaano wa ebondi na terapimu; mûthînjîri ûyu wa ngai n'we aarûngama mwîrîgaani barî amwe na antû bara magana mathanthatû bara beebogeete mathaga ma ndûa. 18 Rîra antû babu baathûngîîre nyomba kwa Mika na baathûkia mûbuanaano ûyu wa gûcaa, ebondi, wa terapimu, na mûbuanaano ûra wakandîîtwe na fetha înkaanjûkie, mûthînjîri woyu abaûria “N'ata bûkûrûtha?” 19 Nabo bamwîra, “Kira ki. Ûtikaarie nwa ata. Ncû tûthi na i woû ûkeegua ûrî ta baaba wetû na mûthînjîri wa ngai wetû. Woû i bûrîkû ûkwona bûrî bwega nkûrûki, i kwîgua ûrî mûthînjîri wa ngai mûciî wa muntû ûmwe kana i kwîgua ûrî mûthînjîri wa ngai wa mwîrîga wa antû ba Isiraeri?” 20 Bûbu i bwakeniirie mûthînjîri mûno, na aathûkia mîbuanaano ya ebondi, na terapimu amwe na mûbuanaano wa gûcaa, aathiiyania nabo.
21 Rîru baûndûka baathi barî nyuma ya twana tûra tûniini, nyamû ciao cia ndîîthia na mîrigo. 22 Bakûthi gataaria mma baarûûkîra mûciî wa Mika, atûûri baake beethîranua amwe, babathiingata baagwatagwata antû babu ba mwîrîga wa Ndani. 23 Na baugîîria antû babu ba mwîrîga wa Ndani. Antû babu nabo baûndûka baûria Mika, “N'ata bûkwenda? I mbi n'ûntû wethîrania kîrîndî gîkî kîonthe kîgana ûûgû gîtûthingata?” 24 Mika abacookeria abaûria, “N'ata bûkuuga rîra bûkûmbûûria n'ata nkwenda? I bûthûkiirie ngai ciakwa cionthe ira ndaarûthire bwathi nacio amwe na mûthînjîri wa ngai wakwa, na gûtirî kîo ntigeerie!” 25 Antû babu ba mwîrîga wa Ndani bamwîra, “Menyeera mûno bûra ûkuuga! Bamwe beetû barî mûthûûro mûno, na nwa bathûûre bagakûthiria amwe na mûciî waku.” 26 Antû babu ba mwîrîga wa Ndani baathi. Mika akûraitha oona antû babu barî na inya nkûrûki yake na gûtirî bu akaabarûtha, aûndûka eenûka gwake.
27 Nyuma ya antû babu ba mwîrîga wa Ndani bakûthûkia mîbuanaano îra Mika eerûthîrîîte, na baathûkia mûthînjîri wa ngai wake, baathiire baithûkîra taûni ya Raisi, taûni ya antû ba ûkiri na bataatindanagîra na antû. Babaûraga na mpiû, na baabîîthia taûni înu yao na mwanki. 28 Gûtirî antû bakîûmba kûbateethia n'ûntû kwao kwarî kûûraaya na taûni ya Sindoni na gûtirî muntû baarî ngwatanîro n'we. Taûni înu yarî kîbondeeni akubî na Bethi-Reobu. Rîru antû babu ba mwîrîga wa antû ba Ndani baaka taûni înu kaîrî na baatûûra ku. 29 Bamîîta Ndani, kuumania na riîtwa rîa kîûyûûyû wao Ndani, ûra aacierwe n'Isiraeri, îndî taûni înu agu mbereeni yetagwa Raisi. 30 Na antû babu ba Ndani beerûngamîria mûbuanaano ûyu wa gûcaa watuîka n'wao barî bongwa. Na Njonathani, mwana wa Ngerisomu, mwana wa Musa na aana baake baatuîka athînjîri ba ngai cia antû ba mwîrîga wa Ndani, mwanka rîra antû babu baatairwe baarutwa kwao. 31 Kwoogu i beerûngamîrîîtie mûbuanaano wa gûcaa ûra Mika aarûthîîte, kagiita konthe kara Nyomba ya Ngai yarî Siro.