Mûrawi na mûka wa kwaiga
19
1 Îgiitaani rîru, gûtaarî mûnene Isiraeri. Kûrî Mûrawi aatûîre nthîgûrû ya kûraaya ya irîma ya Eburaimu. Na n'aarî na mûka wa kwaiga wa kuuma Bethireemu nthîgûrû ya Njunda. 2 Îndî mûka ûyu wa kwaiga aathûûra n'we,a aacooka kwa îthe naagu Bethireemu nthîgûrû ya Njunda aakara noogo bantû a mîeri înna. 3 Rîru mûkûrû wake auma amûthiingata akîgeria kûmwereka bacookanîra. Baathiire na mûruti ngûgî wake barî na mang'ooi maîrî. Bagûkinya mûka ûyu aira Mûrawi kîrî mûthonuue, na mûthonuue akûmwona amûthagaana na amûthookia akeneete mûno. 4 Mûthonuue ta we îthe wa mwarî, amûgiria eenûka na mpwî, na baakara n'we ntugû ithatû. Bakîrîîyaga, bakînyuunyaga na bakîraaraga ku. 5 Ntugû ya inya rûkîîrî Mûrawi aûkîîra na eethuuranîra kûthi. Îndî mûthonuue amwîra, “Mbere mma amba ûrute mata kanyua rîru ûthi.” 6 Kwoogu barî baîrî baakara nthî baarîa na baanyua barî amwe. Rîru mûthonuue amwîra, “Itû aba raara aaga ûtugû bunthe na wîgue ûkeneete.” 7 Mûrawi aûkîîra akîendaga kûthi, îndî mûthonuue n'we amûkinyîîria araara, kwoogu aaraara noogo kaîrî. 8 Ntugû ya itaano aûka rûkîîrî athi, îndî mûthonuue amwîra, “Itû aba amba ûrûme nwambi ûkîthi. Na nyuma yoogu nwa ûthi kwarura.” Kwoogu barî baîrî baarîyanîra amwe. 9 Mûrawi ûyu, na mûk'wake wa kwaiga, na mûruti ngûgî wao kaîrî baanjîîria kûthi, mûthonuue abeera, “Ta raithaani bwone, i taka gûtugire; maama aaga, na wîgue ûkeneete nkorooni yaku, na gwakea rûû rûkîîrî ûraûke gûûka wînûke.”10 Îndî muntû ûyu ateenda kûraara noogo kaîrî; aûkîîre na aathi, aakinya bantû eetagwa Njebusi t'yo, Njerusaremu. Baathiire na mang'ooi maîrî maarûthîîtwe bantû agûkarîra barî na mûka ûyu wake wa kwaiga. 11 Barî akubî gûkinya Njebusi, wegua i kwarî gûgûtuga. Mûruti ngûgî wake amwîra, “Twathûkîre tûraare aaga taûni ya Anjebusi.” 12 Mûnene wake amûcookeria amwîra, “Tûtiathûkîra taûni ya ageni ya antû batarî ba Isiraeri, îndî tûgaakûrûka tûthi mwanka Ngibea.” 13 Mûnene ûyu auga, “Tûkaathiyanga mma nwa tûraare Ngibea kana Rama.” 14 Kwoogu baathi baakûrûkîîra Njebusi na baathi na mbere na rûgendo rwao. Na riûa irîarî rîkûthûa bagîkinya Ngibea taûni îra îrî nthîgûrû ya antû ba mwîrîga wa Benjameni. 15 Nabo baathûkîra baathi kûraarîîra naagu Ngibea. Baathûngîra taûni baakara nthî kîeniini kîayo, îndî gûtirî muntû wabathagaana abaira gwake abaa kîmaamo.
16 Wa barî waagu, mûkûrû ûmwe aayîîra agu thaa cia ûgoro aumîîte mûndaani. Muntû ûyu aarî wa kuuma nthîgûrû ya irîma ya Eburaimu, na i ka aayîîte arî mûgeni aatûûra Ngibea. Antû bara bangî baatûîre ku baarî ba mwîrîga wa antû ba Benjameni. 17 Mûkûrû ûyu akîyiûkia meetho oona muntû ûthiîte rûgendo akari nthî kîeniini taûni înu. Mûkûrû ûyu amûûria, “Wathi kû? Na i kû uumîîte?” 18 Mûrawi ûyu amûcookeria amwîra, “Twauma Bethireemu ya Njunda, na îîndî ûûgû i ka twînûkîîte nthîgûrû ya irîma ya Eburaimu, naara mbumîîte. Ndaathiire Bethireemu ya Njunda; Nyomba ya Mwathanib na gûtirî muntû ûkwenda gûtwaa bantû a kûraara. 19 Tûrî na rûûa na nyaki ya kûrîîthia mang'ooi meetû, na kûrî na mîgaate na ndibei, n'ûntû bwakwa na mwekûrû, na n'ûntû bwa mûruti ngûgî wakwa. Na gûtirî kîo tûkwaga.” 20 Mûkûrû ûyu auga, “Ûkiri bûrookara naawe; ngakwaa kîonthe kîra ûbatîîrue i kîo. Îndî wana gwakarîka ata ûtikaaraare kîeniini.” 21 Kwoogu abathûkia aathi nabo gwake, na aacooka aarûmia mang'ooi ma muntû ûyu biakûrîa. Ageni bakûthamba magûrû maao, baarîa na baanyua.
22 Warîra bagîîkenia bongwa, makanga mamwe ma taûni înu maaya maacîgîîria nyomba. Maanjîîria kûringaringa mûrango na inya makîîraga mûkûrû ûyu mwene nyomba, “Umagarûkia muntû ûyu bûthûngîîre n'we nyomba! Itûkwenda kûmaama n'we.” 23 Muntû ûyu mwene nyomba înu aumagarûka aathi kîrî bo abeera, “Itû aba, antû beetû bûtikaarûthe mantû mathûûku ûgu, mantû ma ûmaramari! Muntû ûyû i mûgeni wakwa. 24 Ta raithaani bwone! N'ûyû mwar'wakwa ataaromaama na muntû mûrûme na mûka ûra aigîîtwe i muntû ûyû. Babu i bo nkûbûretera wendî bûrûthe nabo bûra bûkeenda. Îndî bûtikaagîre muntû ûyû nthoni bûmûrûthîra mantû ma ûtaku.” 25 Amwe na ûgu bataamûthikîîria. Kwoogu Mûrawi aumagarûkia mûka ûyu wake wa kwaiga ome kîrî bo. Baamûgwatire gwa taka baamaama n'we bakîmûrumangaga ûtugû bunthe mwanka rûkîîrî bamûrekeeria aathi. 26 Warîra kwengeerie gûkîa mûka ûyu aathi aagwa mûrangooni wa nyomba ya mûkûrû ûyu îra mûkûrû wake aarî, aakara agu mwanka kwereerûka.
27 Mûkûrû wake agûûka rûkîîrî aarugûra mûrango athi, eethîra mwekûrû ûyu wake agwîte agu mwîrangooni na njara itambûrûkîîte cierekereete mûrango. Atiirithîîtie ûthiû nthî, atambûrûkîîtie njara akîgeragia kûrugûra mûrango. 28 Amwîra, “Ûkîîra tûthi,” ataamûcookeria. Rîru amûthûkia amûtwethia mûgongooni wa îng'ooi na amwînûkia mûciî. 29 Agûkinya mûciî aathûkiirie kayiû aagiitaanga mwîrî wa mûka ûyu wake wa kwaiga icuncî îkûmi na biîrî. Rîru aathûkia aatûmîra wa kîra mwîrîga wa antû ba Isiraeri gîcuncî kîmwe. 30 Muntû wonthe ûra oonire ûgu augire, “Gûtaarorûthîka kana kwonekana ûntû ta bûbû kaîrî kuuma ntugû îra antû ba Isiraeri baumire nthîgûrû ya Miisiri mwanka îmunthî. Nwa mwanka tûthûkie îtagaaria ûntûûni bûbû! Tathûgaaniani bûtwîre n'ata tûkûrûtha!”