Antû ba Isiraeri bakîrûa na antû ba Benjameni
20
1 Rîru antû ba Isiraeri bonthe beethîrana. Antû babu bonthe beethîranire barî gîntû kîmwe. Baumire bwa nthîgûrû ya Ndani mwanka Beeriseba na kinya bwa nthîgûrû ya Ngiriandi, na baakomana mbere ya Mwathani naagu Misipa. 2 Na atongoria ba mîîrîga yonthe ya antû ba Isiraeri baarî mûceemanioni ûyu wa antû ba Ngai. Kwarî na acikaarî ngiri magana mana bara baathiîte na magûrû bakîrûaga na mpiû. 3 Warîo, ntheto ciakinyîra antû ba nthîgûrû ya Benjameni ikiugaga antû bara bangî ba mîîrîga ya Isiraeri i baarî bakwîthîrana Misipa. Rîru barî mûceemanioni Aisiraeri bauga, “Ta twîreeni bûra mantû ta mama mathûûkîîte ûûgû maakarîkangire.” 4 Na Mûrawi ûyu, ûra mûka wake wa kwaiga aûragirwe aacookia auga, “Niû na mûka ûyû wakwa twathiire twakinya Ngibea nthîgûrû ya Benjameni tûraara noogo. 5 Antû ba Ngibea baaya kûmbithûkîra ûtugû baacîgîîria nyomba înu bakîendaga kûûngwata; bantû bambûraga baagwata mûka ûyu wakwa wa kwaiga kîa inya na kwoogu aakua. 6 Rîru ndaathûkia mwîrî wake ndaugiitanga icuncî îkûmi na biîrî, na ndacooka ndaatûmîra bio mîîrîga îra îkûmi na îîrî ya Isiraeri, gîcuncî kîmwe wa kîra mwîrîga. Antû babu baarûthîîte mantû maathûûku na marî îgi Isiraeri. 7 Kwoogu biû antû ba Isiraeri, bwinthe, ta Tweeni ûkûrû.”8 Bonthe baarûngama barî na ngwatanîro îmwe bauga, “Twinthe bara tûrî aaga, gûtirî nwa ûmwe wacietû agaacooka îremaani rîake kana eenûka gwake. 9 Ûûgû i bu tûkaarûtha: Tûkaaringa kuura tûthuure antû bara bakaithûkîra antû ba Ngibea. 10 Na tûkaathuura antû îkûmi kuuma kîrî antû îgana, na antû îgana kuuma kîrî antû ngiri, na antû ngiri kuuma kîrî antû ngiri îkûmi mîîrîgaani ya Isiraeri yonthe beeyane irio n'ûntû bwa acikaarî ba ndûa. Na bara bangî nabo barîie ûthûûku bûra antû ba Ngibea ya Benjameni barûthîrîîte antû ba Isiraeri.” 11 Kwoogu antû ba Isiraeri beethîrana amwe barî na mworooto ûmwe akî ta uu wa kuithûkîra taûni înu ya Ngibea.
12 Aisiraeri baatûmire atûmwa kîrî antû bonthe ba mwîrîga wa Benjameni bauga, “N'ûthûûku bûbi bûbû bûrûthîkîîte gatîgatîîni keenu? 13 Kwoogu îîndî tûnenkereeni athûûkia babu barî Ngibea kaingo tûbaûraga na ûthûûku bûbû buuma Isiraeri.” Îndî amwe na ûgu antû ba mwîrîga wa Benjameni i baaregire kûthikîîria aruagina Aisiraeri bara bangî. 14 Îndî antû ba mwîrîga wa Benjameni baumire taûniini ciao, beethîrana bathi Ngibea kûrûa na Aisiraeri bara bangî. 15 Antû ba mwîrîga wa Benjameni beethîrania acikaarî ngiri mîrongo îîrî na ithanthatû baarî na mpiû, baayire beeringanîra na bara bangî magana mûgwanja ba kuuma Ngibea. 16 Gatîgatî ga acikaarî babu i kwarî na acikaarî magana mûgwanja ba njara ya kîmotho bara baataarîîtwe. Kîra ûmwe waciao aarî aûmba kûgera nkomango ya gîkûtha bwega akathima rûtundu na atarubîtie. 17 Na antû bara bangî ba mîîrîga ya Isiraeri tatiga ba mwîrîga wa Benjameni beethîraniirie acikaarî ngiri magana mana bara baarî ncamba cia ndûa.
18 Antû ba Isiraeri baûkîîra baathi beetia Betheri, na baûria Ngai aboonie mwîrîga ûra ûkanjîîria ndûa na antû ba Benjameni.
Mwathani abacookeria abeera, “Njunda n'we agaatongoria.” 19 Rîru antû ba Isiraeri baûkîîra rûkîîrî baamba marema maao akubî na taûni ya Ngibea. 20 Antû babu ba Isiraeri baumire baathi kûrûa na antû ba Benjameni; na baabanga acikaarî baao baraithîîte taûni ya Ngibea. 21 Antû ba mwîrîga wa Benjameni baumire taûni ya Ngibea, baûraga antû ba Isiraeri ngiri mîrongo îîrî na ciîrî ntugû wa înu. 22 Îndî amwe na ûgu, antû ba Isiraeri bataakua nkoro, baarûthire ûgu, beethîrana amwe bantû wa ara baarwîrîîte îgorooni. 23 Rîru antû ba Isiraeri bauma agu beetia baathi bantû a kûgongera Ngaiabaarîrîra Mwathani mwanka ûgoro. Baûria Mwathani, “Nwaka tûkaathi kaîrî kûrûa na aruayia antû ba Benjameni?” Mwathani abacookeria abeera, “Îthiini bûkarûe nabo.”
24 Kwoogu antû babu ba Isiraeri i baumire baathi kûrûa na antû ba mwîrîga wa Benjameni ntugû ya ciîrî. 25 Na antû ba mwîrîga wa Benjameni i baumire Ngibea ntugû ya ciîrî, na baûraga acikaarî ba Isiraeri kaîrî ngiri îkûmi na inyanya nabo bonthe baarûaga na mpiû. 26 Rîru antû bonthe ba Isiraeri, njûûrî yonthe ya ndûa, bauma agu baathi mwanka Betheri na baarîra. Baakara nthî mbere ya Mwathani na baatîîrîra kûrîa ntugû înu mwanka ûgoro. Na baarutîra Mwathani igongwana bia kûbîîthua na bia ûkiri. 27 Antû ba Isiraeri baûria mantû kîrî Mwathani n'ûntû îgiitaani rîru Îthandûkû rîa kîrîîkanîro kîa Ngai rîarî Betheri, 28 na Finiasi mwana wa Eriasari, mwana wa Arûni, n'we aarî mûthînjîri ûra mûnene wa Ngai îgiitaani rîru. Antû babu ba Isiraeri baûriirie Mwathani ata rî, “I tûkaathi kûrûa na antû beetû ba kuuma kîrî antû ba Benjameni kaîrî kana tûkare?” Mwathani abacookeria abeera, “Îthiini n'ûntû rûû nkabanenkanîra njaraani cienu.”
29 Kwoogu Aisiraeri baiga acikaarî ba kûgiitîra bathiûrûkîîrîîte taûni înu ya Ngibea. 30 Antû ba Isiraeri baathi kûrûa kaîrî na antû ba mwîrîga wa Benjameni îrî ntugû ya ithatû, baabanga acikaarî baao baraithîîte Ngibea wa ta bûra baarûthîîte agu mbereeni. 31 Nabo antû ba Benjameni bauma kaingo bathi kûrûa nabo, beeneerua na baathi kûûraaya na taûni înu îndî banjîîria kûûraga Aisiraeri ta mbere bamwe bara baarî njîraani ya kûthi Betheri, ya kûthi bwa Ngibea na mîndaani. Baûragire Aisiraeri ta mîrongo îthatû. 32 Antû babu ba Benjameni bauga, “Tûkûbatura kaîrî wata bûra twabaturîîte agu mbereeni.” Îndî Aisiraeri bauga, “Tûcookacooke nyuma kaîrî tûbeeneerie baume taûni bathi barabaraani.” 33 Antû bonthe ba Isiraeri baûkîîra bauma ara baarî, na baathi beebangania bwega naagu Mbaari-Tamari. Rîru Aisiraeri bara beebithîîte Maari-Ngebab bauma ara beebithîîte. 34 Antû ba Isiraeri ngiri îkûmi bara bathuurîîtwe barî ncamba cia ndûa baatongoria kûrûa na antû ba taûni ya Ngibea, na ndûa yaarûra mûno. Amwe na ûgu antû ba mwîrîga wa Benjameni bataamenyaga bûra mûthiro warî akubî nabo. 35 Mwathani aapa antû ba Isiraeri inya ya gûtura antû ba mwîrîga wa Benjameni. Ntugû înu, Aisiraeri baûragire antû ngiri mîrongo îîrî na itaano na îgana rîmwe ba mwîrîga ûyu wa Benjameni. Babu bonthe i bara baarûaga na mpiû. 36 Kwoogu antû ba mwîrîga ûyu wa Benjameni boona bagûturwa. Antû ba Isiraeri i baacookacookire nyuma taka baakuthûkîîte antû ba Benjameni n'ûntû beerîgîîrîîte antû bara beebithîîte bagiitîrîîte kaingo barûa na antû ba taûni ya Ngibea. 37 Na antû babu beebithîîte baabatîîrue baugia rwîro na mpwî baathi Ngibea. Baanyagaara taûni înu baûraga antû ku bonthe cwe. 38 Îîndî kîonanîîria gatîgatî ga antû ba Isiraeri na antû bara baithîîtwe bagiitîra kîarî baatoogia ntoogo îînene, îgîîtagia yumîîte taûniini înu, 39 rîru antû ba Isiraeri nwa bagarûkire bakarûe ndûa. Mwanka agu antû ba Benjameni baarî bakûûraga Aisiraeri mîrongo îthatû. Beerana ata rî, “Îî, twabatura wa ta bûra twabaturire agu mbereeni.” 40 Rîru kîoneeria kîonekana; karongorongo ga ntoogo kaanjîîria gwîtia îgûrû gakiumaga bwa taûni înu. Antû ba mwîrîga wa Benjameni bakûûndûka nyuma, baarigara mûno bakwona taûni înu yonthe nwa ntoogo îgûûka. 41 Rîru antû ba Isiraeri baûndûkania nabo, na antû babu ba Benjameni baagwatwa n'ûguaya n'ûntû baarî bakwona barî akubî kûthirua. 42 Kwoogu baakuthûka Aisiraeri bathiîte bwa rwanda îndî bataabuka. Na antû ba Isiraeri bara baumire taûniini babathirîria agu. 43 Aisiraeri baakîîmbire antû ba mwîrîga wa Benjameni nteere cionthe na babeengatia kuuma Nuuc mwanka bantû uumîîroni bwa riûa bwa Ngibea, bakîbaûragaga wabathiîte. 44 Antû ngiri îkûmi na inyanya ba mwîrîga wa Benjameni, i baûragirwe. Na bonthe baarî ncamba cia ndûa ira mbega nkûrûki. 45 Na baûndûka baugia batarîîte bwa rwanda mwanka rwaraani rwa iiga rwa Rimumoni. Antû ngiri itaano baûragîîrwe barabaraani. Aisiraeri baathi na mbere na kuugania nabo babeengatîîtie mwanka Ngindomu, baûraga antû bangî ngiri ciîrî. 46 Antû ba mwîrîga wa Benjameni bara baûragirwe ntugû înu bonthe baarî ngiri mîrongo îîrî na itaano. Na bonthe baarî ncamba cia ndûa. 47 Îndî antû magana mathanthatû baagarûkire baakuthûka beerekereete bwa rwanda baakinya iigaani rîa Rimumoni, na baakara oogo bantû a mîeri îna. 48 Na antû babu ba Isiraeri i baacookire kîrî antû ba Benjameni bara baatigarîîte. Baathiria gîntû kîonthe kîrî mwoyo taûniini ta antû, nyamû na kîonthe kîra boonaga. Taûni cionthe cia noogo ira beethagîra, i baibîîthagia na mwanki.