Eekûrû ba antû ba mwîrîga wa Benjameni
21
1 Antû ba Isiraeri baarî bagûkomana Misipa baanyua muuma baathiîtia bauga, “Gûtikaagîte muntû ageetîgîîria mwarî wake agûrûa mwîrîgaani wa antû ba Benjameni.” 2 Na antû ba Isiraeri baathi Betheri baakara agu barî mbere ya Ngai mwanka ûgoro, bakiugagîîria na inya na bakîrîraga mûno. 3 Baarîraga bakîûragia, “Îî Mwathani Ngai wa Isiraeri, i mbi n'ûntû gwakarîka ûûgû Isiraeri? I mbi n'ûntû mwîrîga ûmwe ûkûûra Isiraeri?” 4 Rûûni rûkîîrî antû babu baûkîîra baaka kîthînjîro agu, na baaruta igongwana bia kûbîîthua na bia ûkiri. 5 Rîru Aisiraeri baûria, “Kuumania na mîîrîga îno ya Isiraeri yonthe rî, i mwîrîga ûrîkû ûtiraaya aaga mûceemanioni wa kûthengeera Mwathani aaga Misipa?” Kagiitaani gaku i baarî bakûnyua muuma ûmûûî mbere ya Mwathani, bakiugaga muntû wonthe ûra akaarega kûûya n'akaûragwa. 6 Antû ba Isiraeri i beegiirue barî na kîîthikîîro mûno n'ûntû bwa aruagina, antû ba Benjameni na bauga, “Îmunthî tûgûta mwîrîga ûmwe wa antû beetû ba Isiraeri. 7 N'ata îîndî tûkaarûthana na antû ba Benjameni bara baatigara kaingo boona aarî ba kûgûra? N'ûntû twathiîtiirie mbere ya Mwathani twauga tûtikoorobaa mwarî wetû nwa ûmwe.”8 Kwoogu baûria, “I mwîrîga ûrîkû wa Isiraeri ûtakûrî oogo rîra tûkûrî Misipa tûkîîbonania mbere ya Mwathani?” Na baamenya antû ba kuuma Njabesi-Ngiriandi bonthe bataaya mûceemanioni ûyu. 9 N'ûntû nyuma ya gûtara antû bonthe, gûtirî we wa kuuma Njabesi-Ngiriandi warî oogo. 10 Kwoogu baatûma antû ngiri îkûmi na ciîrî bara baarî ncamba cia ndûa na watho bûkûbeera, “Îthiini Njabesi-Ngiriandi bûkaûrage antû bonthe bara barî ku na mpiû, kinya eekûrû na twana.” 11 Babeera, “Ûûgû i bu bûkaarûtha, bûûrage antû arûme bonthe, na aka bonthe bara baaromaama na muntû mûrûme.” 12 Kîrî antû bara baatwîre Njabesi-Ngiriandi i boonire aarî magana manna bara bataaromaama na muntû mûrûme. Na babathûkia baathi nabo kambîîni naagu Siro, îra yarî nthî ya Kanaani.
13 Rîru kîrîndî kîonthe gîatûmana kîrî antû ba Benjameni bara baarî iigaani rîa Rimumoni bakîbeeraga ndûa îkûthira. 14 Rîru antû ba mwîrîga wa Benjameni baacooka, na Aisiraeri bara bangî babaa aarî bara ba kuuma Njabesi-Ngiriandi bara batigirwe batarî baûrage. Îndî baarî baakai bataabagana. 15 Antû ba Isiraeri i beegîîrue barî na kîîthikîîro îgûrû rîa antû ba mwîrîga wa Benjameni n'ûntû bwa bûra Mwathani aatûmire kûgîa na mwathûkano gatîgatî ka mîîrîga ya Isiraeri.
16 Rîru akûrû bara baatongoreetie mûcemanio ûyu baûria ata rî, “Baba baatigara î, tûkaabarutîra aarî ba kûgûra kû, na aka ba mwîrîga wa antû ba Benjameni i baathiriirue cwe?” 17 Gûtirî mwîrîga nwa ûmwe wa antû ba Isiraeri ûbatîîrue ûûra. Nwa mwanka tûcerie njîra ya gûtûma mwîrîga wa Benjameni ûriûka. 18 Na gûtirî bu kûûmbîka bagûra aarî beetû. N'ûntû antû ba Isiraeri baanyuire muuma bauga, “Muntû ûra ageetîgîîria muntû wa mwîrîga wa Benjameni agûra mwarî wake aroogwatwa i kîrumi kîa Ngai.” 19 Rîru bauga ûûgû, “Rîonthe i kwîthagîrwa na kîatho kîa Mwathani woora mwanka naagu Siro, îra îrî mbarî ya bwegûrû ya Betheri uumîîroni bwa riûa bwa barabara îra îthiîte kuuma Betheri mwanka Sekemu, naiti ya Rebona.” 20 Kwoogu beera antû arûme babu ba mwîrîga wa Benjameni ata rî, “Îthiini bûkeebithe mîndaani ya mîcabiibû bûgiitîre, 21 na bûcûûbîre. Bwona aarî ba Siro baumagarûkîîte bathi kwina nyîmbo ira ikainwa kîathooni gîku, bûthitimûke buumîre mîndaani ya mîcabiibû, buumbuthûkanie nabo wa muntû eegwatîre mwarî ûmwe eenûke n'we atuîke mwekûrû wake. Rîru bûcooke nthî ya Benjameni. 22 Rîru beethe kana aruagina bakaaya kûûya kûtheta gwetû, tûkabeera, ‘Itû aba îtîgîîriani bûtûnenkere bo na wega, n'ûntû tûtaûmba kûboonera aka ba kûbagana bonthe ndûani. Na kaîrî ti biû bwa banenkanîîre kîrî bo. Na gûkari ûgu, gûtirî mabîtia bûrî namo na bûticookwa i muuma îra bwanyuire.’ ” 23 Kwoogu antû ba Benjameni baarûthire wa bûra beerirwe. Bakûraitha boona aarî bonthe i bagûcûnga, wora ûmwe waciao aagwatire mwarî ûmwe aathi n'we atuîka mwekûrû wake. Rîru bacooka mwanka kwao n'ara bagaîrîîtwe kûrî rûgai rwao, baaka taûni ciao kaîrî, na baatûûra ku. 24 Kagiitaani wa gaku Aisiraeri bara bangî bauma agu bacooka woora muntû mwîrîgaani wao na mûciî wake, naara bagaîrîîtwe kûrî rûgai rwao.
25 Îgiitani rîru gûtaarî mûnene ndeeni ya Isiraeri; woora muntû aarûthaga bûra oonaga bwagîrîte kîrî we.