Antû ba Isiraeri beerûyia kîrîîkanîro barî Sekemu
24
1 Njosua eethîrania antû ba mîîrîga yonthe ya Isiraeri Sekemu. Eetire akûrû, atongoria, agiiti magamba, na arûngamîîri ba Isiraeri baaya baarûngama mbere ya Ngai.2 Njosua eera antû bonthe, “Ûûgû i bu Mwathani, Ngai wa Isiraeri augîîte, ‘Karaaya mûno, biûyûyû bienu biatûûraga rûgongo rûra rûûngî rwa muuro wa Yufîrîti na i noo baatûmîkagîra ngai ciingî. Ûmwe wa biûyûyû bibu eetagwa Tera, îthe wa Îburaîmu na wa Naori. 3 Îndî ndaathûkiirie Îburaîmu kîûyûûyû kîenu kuuma rûgongo rwa muuro ûyu na ndamûtongoreeria mwanka nthîgûrû yonthe ya Kanaani. I ndaatûmire rûciaro rwake rûthagaya, gûkûrûkîîra kîrî mwana wake Isaka. 4 Kîrî Isaka ndamûnenkeere Njakubu na Esaû. Kîrî Esaû ndamûnenkeere nthîgûrû ya irîma ya Seiri yatuîka yake, îndî Njakubu na aana baake nabo beendamire bwa Miisiri.
5 “ ‘Rîru ndaatûma Musa na Arûni, na ndareetera antû ba Miisiri thîîna îînene n'ûntû bwa bûra ndaarûthire ku. Na nyuma ya ûgu ndabûruta ku. 6 Rira ndarutire biûyûyû bienu kuuma Miisiri, Amiisiri babauma nyuma barî na nkaarî ciao cia mbaraathi na athiithia baacio mwanka Îria Rîtuune. 7 Barîrîra Mwathani, eekîra mwindu gatîgatî keenu na antû ba Miisiri. N'aareetire rûûyî rwa îria na rwathiria Amisiri. Biû bwingwa i bwonire na meetho meenu bûra ndaarûthire Miisiri. Rîru bwakara rwanda mîanka îmiingî.
8 “ ‘Rîru ndacooka ndabûreeta nthîgûrû ya antû ba Amori, bara baatwîre uumîîrooni bwa riûa bwa muuro wa Njorondani. Baarûa naabi, na ndabanenkanîra njaraani cienu. Ndabeenyangia na bwathûkia nthîgûrû yao yatuîka yenu. 9 Rîru Mbaraki mwana wa Sipori, mûnene wa Moabu, aanjîîria ndûa na antû ba Isiraeri. Aatûmana Mbaraamu mwana wa Mbeori kîrî biû abûruma. 10 Îndî amwe na ûgu ntaathikîîria Mbaraamu i ka ndaatûmire abûthaarima, na kwa njîra înu ndabûtuunyûkia kuuma njaraani cia Mbaraki. 11 Bwaringa muuro wa Njorondani na bwakinya Njeriko, antû ba Njeriko baarûa naabi. Bara bangî barûire nabi baarî, Amori, Aperisi, Akanaani, Aiti, Angirigasi, Aibi, na Anjebusi. I ndabaneenkanîîre njaraani cienu. 12 I ndaatûmire îgu mbere yenu rîra rîengatiirie anene bara baîrî ba Amori. Bûtaûmbana n'ûntû bwa rûûyiû kana ûta bwenu. 13 Ndabûnenkeere nthîgûrû bûtaarutîrîte ngûgî, na ndabûnenkera taûni bûtaakîîte na i ku bûtwîre îîndî ûûgû. Îîndî i matunda bûkûrîa ma mînda ya mîcabiibû na mîceituuni bûtaanda.’ ”
14 Njosua aathi na mbere kûbeera, “Tîîyagaani Mwathani na bûmûrutagîre ngûgî na nkoro cienu cionthe na bûmwîtîgîîtie. Rekanaani na ngai cia mîbuanaano cwe ira biûyûyû bienu biatûmîkagîra rûgoongo rwa muuro wa Yufîrîti, na barî Miisiri. Na rutîraani Mwathani ngûgî wenka. 15 Ûkeegua i bûthûûku gûtûmîkîra Mwathani, thuuraani îmunthî n'ûû bûgatûmîkîra. Wegua i ngai ira biûyûyû bienu biatûmîkagîra rûgongo rûra rûngî rwa muuro kana i ngai cia Aamori, eene nthîgûrû îra bûtwîre îîndî. Îndî niû na antû ba mûciî wakwa, tûgaatûmîkîra Mwathani.”
16 Antû babu nabo baacookia bauga, “Tûtikooro tûtiganîria Mwathani tûtûmîkîra ngai ciingî! 17 N'ûntû i Mwathani Ngai wetû wengwa ûra aatûrutire na biûyûyû bietû twauma ûkombooni bwa nthîgûrû ya Miisiri. Aaringire biama biinene tûkîîbonagîra na meetho meetû twingwa. N'atûrigîîrie njîraani tûkûrûkîrîîte mîgongooni îra yîngî. 18 Rîra twakinyire nthîgûrû înu, Mwathani N'engatiirie antû ba mîgongo yonthe, amwe na Amori bara baatûûraga ku. Wana kinya tiû, tûgaatûmîkîra Mwathani, Ngai wetû wenka.” 19 Rîru Njosua eera antû, “Bûtikûûmba gûtûmîkîra Mwathani, n'ûntû i Ngai ûmûtheru; na i Ngai wa rûriitho. Na atibûrekera mabîtia meenu kana meeyia meenu. 20 Bûkaaya gûtiganîria Mwathani na bûgatûmîkîra ngai ciingî, akabûtiganîria na abûthirie, wana kinya ûkeegua agu mbereeni n'arabûrûthagîra mantû meega.”
21 Na antû beera Njosua, “Arî! Tûtiirûtha ûgu, i Mwathani tûgaatûmîkîra.”
22 Njosua n'we abeera, “Biû bwingwa bûrî akûûyî îgûrû rîenu, mantûûni ma kuuga i Mwathani bwathuura bûmûtûmîkîra.” Nabo bamûcookeria, “Tiû tûrî akûûyî.”
23 N'we abeera, “Îîndî, îtaani ngai ngeni ira irî gatîgatîîni keenu, na bwerekerie nkoro cienu kîrî Mwathani Ngai wa Isiraeri.” 24 Nabo antû babu baacookeria Njosua, “Tûgaatûmîkîra Mwathani Ngai wetû na twathîkîre maathana maake.”
25 Kwoogu Njosua aarûtha kîrîîkanîro na antû babu ntugû wa înu, na abanenkera mawatho na maathana barî naagu Sekemu. 26 Na Njosua n'we aandîka mantû mama îbukuuni rîa watho bwa Ngai. Na aathûkia iiga rîînene arîrûngamia ruungu rwa mûpuru ûra warî akubî na bantû ara aarî aatheru a Mwathani.
27 Na Njosua eera antû bonthe, “Iiga rîrî i rîo nkûûyî yetû ya bûra twauga. N'ûntû rîkwîgua ntheto cionthe ira Mwathani aatwîrire. Na n'ûntû bwa ûgu, i rîo rîgaatuîka ûkûûyî kîrî biû, wegua bûgaakaana Ngai wenu.”
28 Rîru Njosua eera antû beenûke, wa muntû eenûka gwake ara aagaîrîîtwe rûrî rûgai rwake.
Gûkua kwa Njosua na Eriasari
29 Nyuma ya mantû mamu, Njosua mwana wa Nuni, mûruti ngûgî wa Mwathani, aakua arî na ûkûrû bwa mîanka îgana na îkûmi. 30 Baamûthikire kîthakaani gîake bantû eetagwa Timunathi-Sera, îra îrî ndeeni ya nthîgûrû ya irîma ya Eburaimu, rûteere rwa bwa îgûrû rwa kîrîma kîa Gaasi.
31 Antû ba Isiraeri i baatûmîkîîre Mwathani ntugû cionthe ira Njosua aarî mwoyo. Na nyuma ya gûkua gwake antû babu i baathiire na mbere kwathîkîra Mwathani ntugûûni cia atongoria bara baatigirwe nyuma ya Njosua gûkua na bara baiyî ngûgî yonthe îra Mwathani aarutîrîte Isiraeri.
32 Maîndî ma Njosebu, mara antû ba Isiraeri baakamatire bauma namo Miisiri, maathikirwe bantû eetagwa Sekemu, gacuncîîni ga kîthaka kîra Njakubu aagûrîrîte aana ba Amori, îthe wa Sekemu na icuncî îgana bia Fetha. Nakîo gîatuîka rûgai rwa nciarwa cia Njosebu.
33 Na Eriasari mwana wa Arûni n'aakuire, na bamûthika bantû eetagwa Gibea, taûni ya mwan'wake Finiasi, îra agaîrîîtwe naagu nthîgûrû ya irîma ya Eburaimu.