Njosua 23

Njosua aaria biugo bia mûthia kîrî atongoria ba Isiraeri

1 Îgiita rîîraaya i rîakûrûkîîte nyuma ya Mwathani kûnenkera antû ba Isiraeri kûnogoka kuumania na anthû baao bonthe bara baabacîgîîrîîtie nteere cionthe. Kagiitani gaku Njosua n'aarî agûkûra mûno, 2 kwoogu eeta antû ba Isiraeri bonthe, akûrû, atongoria, agiiti magamba, na arûngamîîri ba antû, abeera, “Îîndî ndî ûmûkûrû mûno. 3 I bwoneete mantû monthe mara Mwathani Ngai wenu arûthîîte mîgongo îno îîngî yonthe n'ûntû bwenu. Na nwa we aabûrwîrîîre. 4 Raithani bwone, ingaîrîîte antû ba mîîrîga yenu nthîgûrû yonthe kuuma bwa muuro wa Njorondani îra îrî uumîîrooni bwa riûa mwanka îriani rîa Menditarîniani ûthwîro bwa riûa. Na indabwere nthîgûrû cionthe ira tûrîîkîîtie gûcinda, wana kinya ndabwaa ira tûtakûrî tûgûcinda. 5 Mwathani Ngai wenu n'we akeengatia antû babu baume mbere yenu. Nthîgûrû ciao îgatuîka cienu, wa ta bûra Mwathani Ngai wenu aabwathire.

6 “Kwoogu îgîani inya na bwîmenyeere mûno bwathîkîre na bûrûthe bunthe bûra bwandîkîîtwe îbukuuni rîa watho bwa Musa. Bûtigaakûrûkane nwa na bûmwe bwa bu na njîra nwa îrîkû. 7 Bûtikengîrane na mîgongo îra îtigeere gatîgatîîni keenu. Wana tatiga ûgu îndî, kinya kûgweta bûtikaagwete mariîtwa ma ngai ciao, kana bûthiîtia nacio kana bûcigoonga. 8 Îndî îguani bûrî eetîgua kîrî Mwathani Ngai wenu wa ta bûra bwîthîrîtwe mwanka îmunthî tûrî.

9 “N'ûntû Mwathani n'abwîngatîrîtie antû ba mîgongo îmînene na îrî inya, na gûtirî nwa ûmwe waro rûngama mbere yenu mwanka îmunthî tûrî. 10 Ûmwe wa cienu aûmba kûrûa na anthû ngiri îmwe na akabatura, n'ûntû Mwathani Ngai wenu n'abûrûagîîra, wa ta bûra aigire wîrane bwake. 11 Kwoogu, menyagîîraani mûno, bwendage Mwathani Ngai wenu.

12 “Bûkaaya kûrega kwathîka, bûkagwatanîra na bara baatigirwe ba mîgongo înu bara bangî bakîîngatua bara bûtwîre amwe nabo, bûkagûranîra nabo, 13 bûmenye na mma Mwathani Ngai wenu atibwîngatîria mîgongo înu kaîrî. Bagaacooka batuîke ûgwati na mûtego kîrî biû, na ta mûthanju mbaruuni cienu, na ta mîîgua meethooni meenu, na bûgaaciatwa cwe buume nthîgûrû îno mbega ûûgû îra Mwathani Ngai wenu abûnenkereete.

14 “Îîndî kagiita gaakwa ga gûkua Gagûkinya. Kîra ûmwe wa cienu n'aiyî nkorooni yake na mwoyoni wake atî Mwathani Ngai wenu n'abwete into biega bionthe bira aathanîîte. Wîrane bunthe bûra eeyanîîte n'aabwingiirie; gûtirî nwa bûmwe bwarema. 15 Îndî wa ta bûra Mwathani Ngai wenu aigire wîrane bwake abwaa into bionthe biega bira augîîte, nwa ta bu akaabûthiria bwarega kûmwathîkîra. Akaabûciata cwe buume nthîgûrû îno mbega ûûgû îra abûnenkereete. 16 Bwauna kîrîîkanîro kîra Mwathani Ngai wenu aabwathire bwaige na bwatûmîkîra kana bwagonga ngai ciingî, akabwaa îkaanûkia athûûri mûno, na nthûti îmwe gûtirî nwa ûmwe wa cienu agaatigwa nthîgûrû îno îthongamîîte ûûgû îra Mwathani aabûnenkeere.”