Njosua 22

Antû ba mîîrîga ya uumîîrooni bwa riûa bacooka nthîgûrû yao

1 Rîru Njosua eeta antû ba Rubeni, ba Ngandi, na nucu ya antû ba mwîrîga wa Manase. 2 Na abeera, “I bûrûthîîte bunthe bûra Musa mûruti ngûgî wa Ngai aabwîrire, na bwathîkîra maathana makwa monthe. 3 Îgiita rîru rîonthe bûtaro bûrûkîra antû beenu ba Isiraeri. I bûmenyereete mûno kwathîkîra maathana ma Mwathani Ngai wenu. 4 Na îîndî Mwathani Ngai wenu n'anenkereete antû bara bangî ba Isiraeri kînogoko, wa ta bûra aigire wîrane nabo. Kwoogu îîndî, cookaani kwenu, nthîgûrû îra Musa mûruti ngûgî wa Ngai aabwere, îra îrî ûthwîrooni bwa riûa bwa muuro wa Njorondani. 5 Bûmenyeere kwathîkîra maathana monthe na mawatho mara Musa mûruti ngûgî wa Mwathani aabwere: Kwendaga Mwathani Ngai wenu, rûthagaani kwenda gwake, athîkagîraani maathana maake, îgaguani bûrî eetîgua kîrî we, na bûmûrutagîre ngûgî na nkoro cienu cionthe na mwoyo wenu unthe.”

6 Kwoogu Njosua abathaarima na abaa rûûtha beenûka; nabo beenûka kwao mîciî. 7 (Musa n'we aarî akûgaîra nucu ya mwîrîga wa antû ba Manase nthîgûrû ya Mbasani, uumîîrooni bwa riûa bwa muuro wa Njorondani. Na nucu îra îîngî ya antû wa babu n'yo Njosua amîgaîra nthîgûrû îra yarî ûthwîrooni bwa riûa bwa muuro wa ûyu wa Njorondani.) Nyuma ya ûgu Njosua abathaarima na abarekeeria beenûka. 8 Na abeera, “Înûkaani na ûtonga bwenu bunthe bûra bûrataire kuuma kwa anthû beenu. Bûthi na ng'ombe, fetha cienu na thaabu, na nthuku na cuuma, na kinya nguo; na bwakinya kwenu, bûgaîre antû beenu kinya bo into bira bûrataire.”

9 Kwoogu antû ba nthîgûrû ya Rubeni, ya Ngandi, na nucu ya mwîrîga wa antû ba Manase baacooka kwao. Baatigire antû bara bangî ba Isiraeri Siro naagu nthîgûrû ya Kanaani kaingo babu nabo bauma agu bathi kwao, nthîgûrû ya Ngiriandi îra baagaîrîîrwe kûringana na watho bwa Mwathani gûkûrûkîîra Musa.

10 Rîra baakinyire Gerirothi akubî na Njorondani nthîgûrû ya Kanaani, antû ba Rubeni, ba Ngandi, na nucu ya antû ba Manase i baakire kîthînjîro kîînene mûno. 11 Na Aisiraeri babu bangî bakwîgua antû ba Rubeni, ba Ngandi, na nucu ya antû ba Manase bagwaka kîthînjîro Gerirothi ûthwîrooni bwa riûa bwa muuro wa Njorondani, ndeeni ya nthîgûrû ya Kanaani, 12 beethîrana amwe naagu Siro na beethuuranîra kûthi kûrûa na Aisiraeri bara baatwîre uumîîrooni bwa riûa.

13 Rîru Aisiraeri baatûma Finiasi, mwana wa Eriasari mûthînjîri wa Ngai, kîrî antû ba mîîrîga ya Rubeni, Ngandi, na kîrî nucu ya antû ba Manase bara baarî nthîgûrû ya Ngiriandi. 14 Finiasi baathiire na atongoria îkûmi bara banene ba Isiraeri. Wa kîra mwîrîga waumaga mûtongoria ûmwe. Na mûtongoria ûyu n'ûûra eegagua arî mûtongoria wa mûciî mwîrîgaani wao.

15 Baathi nthîgûrû ya Ngiriandi, baaria na antû ba Rubeni, ba Ngandi, na nucu ya antû ba Manase. 16 Babeera, “Kîgoomano gîa antû ba Mwathani bonthe barîûria, ‘I kî n'ûntû bûregeete kwathîkîra Ngai wa Isiraeri bwebakîra kîthînjîro gîkî? 17 I ka wîyia bwetû bûra twarûthire tûrî Peori bûtaarî bûûganu? Wana mwanka îmunthî tûtaaro twîtheria bu, wana kinya nyuma ya kûringwa i mûrimo ûra wagwatire kîgoomano kîa Mwathani kîonthe? 18 Ka îmunthî bûkûrega kûthingata Mwathani? Bwarega kûthingata Mwathani îmunthî, akaathûûra n'antû ba Isiraeri bonthe rûû. 19 Ûkeegua nthîgûrû yenu ti ntheru ya kûgongera Mwathani, ringanîriani bûûye bûthûngîre nthîgûrû ya Mwathani, ara Îrema rîa Kûrîîkanaga rîrî. Na buuge i bûkwenda tûbûgaîra nthîgûrû yetû bûtûûranîre naati. Îndî bûtikebakîre kîthînjîro kîngî bûtûma Mwathani athûûra i tiû twinthe na atûkaanûkia. 20 Bûtikaariganîrue bûra gwakarîkire kîrî Akani mwana wa Sera! Mwathani aatwîrire, “Înyangiani into bionthe taûniini ya Njeriko.” Îndî Akani we ataathîkîra mawatho ma Mwathani, na kwoogu Mwathani atûnenkera îkaanûkia twinthe. Akani aakuire n'ûntû bwa bûra aarûthire, na Aisiraeri baingî baakua n'ûntû bwa meeyia ma Akani.’ ” 21 Na rîru antû ba nthîgûrû ya Rubeni, ba Ngandi, na ba nucu ya mwîrîga wa Manase baacookeria atongoria ba mîîrîga înu ya Isiraeri babeera, 22 “Ngai Mwene Inya i Mwathani! Ngai Mwene Inya i Mwathani! N'we Mwathani! N'aiyî gîtûmi gîa tûrûtha ûûgû, kinya biû itûkwenda bûmenya! Ûkeegua kwarûthîkire ûgu na taka kana kûrega kwathîkîra Mwathani, bûtikaareke tûtûûra mwoyo kuuma îmunthî. 23 Ûkeegua i twaregire kwathîkîra Mwathani, na twebakîra kîthînjîro twingwa gîa kûrutagîra igongwana bia kûbîîthua, kana n'ûntû bwa biewa bia irio kana n'ûntû bwa biewa bia ngwatanîro, ka Mwathani wengwa atûnenkere îkaanûkia. 24 Arî! Twarûthire ûgu n'ûntû i twakuthûkaga kagiita gakaaya nciarwa cienu ciûria cietû, ‘I ka bûkarani ata na Mwathani, Ngai wa Isiraeri? 25 N'ûntû biû, antû ba Rubeni na ba Ngandi, Mwathani aatuîkithiirie muuro wa Njorondani mwanka wetû na biû. Kwoogu bûtirî oogo nwa aniini mantûûni ma Mwathani.’ Na bûbu nwa bûtûme nciarwa cienu igiria cietû itua kûgongaga Mwathani. 26 Kwoogu gîku i kîo gîatûmire twaka kîthînjîro, na t'ûntû bwa igongwana bia kûbîîthua kana n'ûntû bwa igongwana bia mûthemba ûngî nwa ûrîkû. 27 Twagîakire kaingo bûtuîka ûkûûyî n'ûntû bwa antû beetû na beenu, na n'ûntû bwa nthuke ira ikaaya nyuma yetû, atî tûkaagonga Mwathani akîonaga, na biewa bietû bia kûbîîthua na igongwana na biewa bia ûkiri, kaingo aana beenu batikooro beera beetû, ‘Bûtirî na rûgai kîrî Mwathani.’ 28 Rîarî îthûgaania rîetû atî, bakaaya gûtwîra kana bakeera nciarwa cietû ûgu îgiita rîkaaya, tûbatîîrue tuuga, ‘Ta raithani! biûyûyû bietû biakire kîthînjîro wa ta bûra kîa Mwathani gîakari. Gîtaarî gîa kûrutîra biewa bia kûbîîthia, kana n'ûntû bwa kîgongwana, îndî kîîgue kîrî ûkûûyî gatîgatî geetû na biû.’ 29 Tûtirega kwathîkîra Mwathani, na twaka kîthînjîro kîngî n'ûntû bwa igongwana bia kûbîîthua, igongwana bîa irio, kana igongwana bingî nwa birîkû, tatiga kîthînjîro kîa Mwathani Ngai wetû kîra kîrî mbere ya gîkaro gîake.”

30 Rîra Finiasi mûthînjîri wa Ngai na atongoria ba mîîrîga ya antû ba Isiraeri beegiirue bûra antû ba Rubeni, ba Ngandi, na nucu ya antû ba mwîrîga wa Manase baugire, i baakenire. 31 Finiasi mwana wa Eriasari mûthînjîri wa Ngai, aacookeria Rubeni, Ngandi na Manase, “Îmunthî tûkûmenya Mwathani arî amwe naati n'ûntû bûtimûtiganîrîîtie ta bûra tûkûthûgaanagia. Îîndî bûgûkûûra antû ba Isiraeri batikeewe îkaanûkia i Mwathani.” 32 Rîru Finiasi mwana wa Eriasari mûthînjîri wa Ngai, na atongoria bara îkûmi bauma kîrî antû ba Rubeni na Ngandi ndeeni ya Ngiriandi baacooka nthîgûrû ya Kanaani kwîra antû ba Isiraeri bûra gwakarîkire. 33 Antû ba Isiraeri i bakeneere kwîgua mantû mamu, baaganîrwa na baakumia Ngai. Na bataagweta mantû ma kûrûa na antû ba Rubeni na ba Ngandi kaîrî kana beenyangia nthîgûrû ira antû ba Rubeni na ba Ngandi baatwîre.

34 Antû ba Rubeni na ba Ngandi baugire, “Kîthînjîro gîkî n'ûkûûyî kîrî tiû twinthe atî Mwathani i Ngai.” Na kwoogu, bagîîta, “Ûkûûyî.”