Njosua 21

Taûni cia Arawi

1 Atongoria ba Arawi baathi kîrî Eriasari mûthînjîri wa Ngai, Njosua mwana wa Nuni, na kîrî atongoria bara bangî ba mîîrîga ya antû ba Isiraeri. 2 Baaranîîrie nabo naagu Siro nthîgûrû ya Kanaani, babeera, “Mwathani aathanire gûkûrûkîîra Musa amwîra tûnenkerwe taûni tûtûûre ku na tûcooke tûnenkerwe bantû a kûrîîthia nyamû cietû.” 3 Kwoogu antû ba Isiraeri i baagaîrîîre antû ba Rawi taûni ino amwe na kîthaka gîa kûrîîthia nyamû ciao cia ndîîthia kuumania na rûgai rwao wa ta bûra Mwathani aathanîîte.

4 Riiko rîa mbere rîra rîanenkeerwe taûni rîarî Koathi. Kwoogu Arawi bara baarî ba rûrîîyo rwa Arûni mûthînjîri wa Ngai baanenkeerwe taûni îkûmi na ithatû kuuma kîrî antû ba mîîrîga ya Njunda, Simioni, na kuuma kîrî antû ba Benjameni. 5 Antû bara bangî ba mwîrîga wa Akoathi baagaîrîîrwe taûni îkûmi kuuma kîrî antû ba mîîrîga ya Eburaimu, Ndani na kuuma kîrî nucu ya mwîrîga wa Manase.

6 Antû ba rûrîîyo rwa Ngerisoni baagaîrîîrwe taûni îkûmi na ithatû kuuma mîîrîgaani ya antû ba Isakaari, Aseri, Nabutarî, na kuuma kîrî nucu ya mwîrîga wa Manase naagu Mbasani.

7 Na antû ba rûrîîyo rwa Merari nabo bagaîrwa taûni îkûmi na ciîrî kuuma kîrî antû ba mwîrîga wa Rubeni, Ngandi, na kuuma kîrî antû ba mwîrîga wa Seburuni.

8 Kwoogu na njîra ya kûringa kuura antû ba Isiraeri banenkera Arawi taûni ino amwe na ithaka bia kûrîîthia nyamû ciao, wa ta bûra Mwathani abaathîîte gûkûrûkîîra Musa.

9 Mama i mo mariîtwa ma taûni cia kuuma mîîrîgaani ya Njunda na Simioni, 10 ira cianenkanîîrwe kîrî rûrîîyo rwa Arûni, bara baarî ba mwîrîga wa Koathi wa antû ba Rawi n'ûntû i bo bagwîrîîrwe i kuura barî ba mbere. 11 Banenkeerwe Kiriathi-Ariba, na nwa yo Eburoni, nthîgûrû ya irîma ya Njunda, amwe na ithaka biayo bia kûrîîthia bira biamîthiûrûkîrîîte. Ariba aarî kîûyûûyû kîa Aanaki. 12 Îndî mînda na ntûûra ira ciathiûrûkîrîîte taûni ya Eburoni i ciarî ikûgaîrwa Karebu mwana wa Njebune rûrî rûgai rwake.

13 Na kîrî rûrîîyo rwa Arûni mûthînjîri wa Ngai banenkeerwe Eburoni, îrî taûni ya kwîbithaga, wa amwe na ithaka biayo bia kûrîîthia, na bacooka bagaîrwa Ribuna amwe na ithaka biayo birî bia kûrîîthia; 14 Njatiri, Esitemoa, 15 Oroni, Ndebiri, 16 Aini, Njuta, na Bethi-Semesi amwe na ithaka biacio bia kûrîîthia: cionthe ciarî taûni kenda kuuma mîîrîgaani înu îîrî.

17 Kuuma kîrî mwîrîga wa Benjameni athînjîri ba Ngai banenkerwe taûni wa amwe na ithaka bira biacithiûrûkîrîîte birî bia kûrîîthia, ta ûûgû: Ngibeoni, Ngeba, 18 Anathothi, na Arimoni; cionthe ciarî taûni inya. 19 Kwoogu rûrîîyo rwa Arûni, mûthînjîri wa Ngai banenkerwe taûni îkûmi na ithatû amwe na ithaka bira biacithiûrûkîrîîte birî bia kûrîîthia.

20 Bara bangî ba mîîrîga ya Koathi kuuma kîrî Arawi baagaîrîîrwe taûni na ithaka bia kûrîîthia kuuma kîrî mwîrîga wa Eburaimu. 21 Baagaîrîîrwe Sekemu taûni ya kwîbithaga, amwe na ithaka biayo bia kûrîîthia nthîgûrû ya irîma ya Eburaimu, Ngeseri amwe na ithaka biayo bia kûrîîthia; 22 Kibusaimu, na Bethi-Oroni, amwe na ithaka biacio bia kûrîîthia cionthe ciarî taûni inya. 23 Taûni ino nacio na ithaka biacio bia kûrîîthia, cianenkeerwe athînjîri ba Ngai kuuma kîrî antû ba Ndani: Eriteke, Ngibethoni, 24 Aiyaroni, na Ngathi-Rimoni na ciarî taûni inya. 25 Na kuuma kîrî nucu ya antû ba mwîrîga wa Manase athînjîri ba Ngai banenkerwe taûni ino amwe na ithaka biao bia kûrîîthia: Taanaki, na Ngathi-Rimoni cionthe taûni ciîrî. 26 Taûni cionthe amwe na ithaka biacio bia kûrîîthia ira cianenkeerwe antû ba mwîrîga wa Akoathi ciarî îkûmi.

27 Rûrîîyo rwa Ngerisoni, mwîrîga ûngî ûrî ndeeni ya antû ba Rawi, banenkerwe taûni ciîrî amwe na ithaka biacio bia kûrîîthia kuuma kîrî nucu ya mwîrîga wa antû ba Manase: Ngorani ndeeni ya Mbasani taûni ya kwîbitha na Beesitera. 28 Kuuma kîrî mwîrîga wa Isakaari, banenkerwe Kisioni na Ndaberathi, 29 Njarimuthi, na Eni-Nganimu; cionthe ciarî taûni inya amwe na ithaka biacio bia kûrîîthia. 30 Kuuma kîrî mwîrîga wa Aseri banenkerwe Misari, Abundoni, 31 Erikathi, na Reobu; cionthe ciarî taûni inya amwe na ithaka biacio bia kûrîîthia.

32 Kuuma kîrî mwîrîga wa Nabutarî banenkerwe Kendesi ndeeni ya Gariiri taûni ya kwîbitha, Amothi-Ndori na Karitani, cionthe ciarî taûni ithatû amwe na ithaka biacio bia kûrîîthia. 33 Kwoogu taûni cionthe cia antû ba Ngerisoni ira banenkerwe ciarî îkûmi na ithatû amwe na ithaka biacio bia kûrîîthia.

34 Arawi bara bangî ba mwîrîga wa Merari banenkerwe rûgai rwao kuuma kîrî antû ba Seburuni. Banenkerwe: Njokineamu, Karita, 35 Ndimuna, na Naarari na cionthe ciarî taûni inya amwe na ithaka biacio bia kûrîîthia. 36 Kuuma kîrî antû ba mwîrîga wa Rubeni banenkerwe Beseri, Njaasa, 37 Kendemothi, na Mefaathi, amwe na ithaka biacio bia kûrîîthia, cionthe ciarî taûni inya. 38 Na kuuma kîrî antû ba mwîrîga wa Ngandi banenkerwe Ramothi ndeeni ya Ngiriandi taûni ya kwîbithaga, Maanaimu, 39 Esiboni, na Njaseri, amwe na ithaka biacio bia kûrîîthia cionthe ciarî taûni inya. 40 Kwoogu taûni cionthe ira cianenkeerwe antû ba riiko rîa Merari bara baarî ba mwîrîga wa Arawi ciarî îkûmi na ciîrî.

41 Taûni cionthe cia antû ba Isiraeri ira cianenkeerwe Arawi ciarî mîrongo înna na inyanya amwe na ithaka biacio bia kûrîîthia. 42 Wa kîra îmwe ya taûni inu, yathiûrûkîrîîtwe nteere ciayo cionthe n'iithaka bia kûrîîthia.

43 Kwoogu Mwathani n'anenkeere antû ba Isiraeri nthîgûrû yonthe îra aathiîtîîrie biûyûyû biao auga akabaa. Nabo bamîthûkia yatuîka yao na baatûûra ku. 44 Na Mwathani abanenkera kînogoko nteere cionthe, wa ta bûra aathiîtîîrie biûyûyû biao. Gûtirî mûnthû nwa ûmwe akîûmîîria kûrûa nabo n'ûntû Mwathani n'aanenkanîrîte anthû baao bonthe njarani ciao. 45 Gûtirî wîrane bwega nwa bûmwe Mwathani aigîîte na antû ba Isiraeri bûtaingîka.