Taûni cia kwîbithagwa
20
1 Kwoogu Mwathani eera Njosua, 2 “Îra antû ba Isiraeri beethuurîre taûni cia kwîbithaga wa ta bûra ndaabwathire gûkûrûkîîra Musa. 3 Kaingo muntû wonthe ûra akaûraga muntû atakûbangîîte kûmûûraga akaumaga agatoorokera noogo, na gûtuîke gûntû kwenu gwa kwîbithaga n'ûntû bwa muntû ûra akeegua akîenda kûreania mantû ta mamu na njîra ya gûtûûra nthakame.4 “Muntû ta ûyu aakinya kîrî taûni îmwe ya inu, akaathi mbere ya atongoria agu mwîrîgaani wa taûni înu na eere akûrû bûra mantû ta mamu maakarîkangire. Nwa mwanka beetîgîîrie muntû ûyu athûngîre taûni înu na bamûnenkere bantû agûkara, na batûûranîîre n'we. 5 Na wegua kûrî muntû wa ba muntû ûyu mûûrage akaaya akîendaga mûûragani ûyu, atongoria batibatîîrue bamûneenkanîra, n'ûntû twaka arabaangîîte kûûragana. 6 Muntû ûyu ûûraganîîte agaakara taûni înu mwanka rîra akagaambithua i mwingî boone wabu kana atirî na mabîtia. Rîru aarîîkia kwonekana atirî na mabîtia, akaathi na mbere gûkara taûniini înu mwanka rîra mûthînjîri ûra mûnene wa Ngai agaakua. Nyuma ya ûgu i rîo muntû ûyu atarî na mabîtia aûmba gûcooka mûciî gwake.”
7 Kwoogu taûni ino i cio ciathuurirwe irî taûni cia kwîbithaga: Nacio i Kendesi ya Gariiri nthîgûrû ya irîma ya Nabutarî, Sekemu nthîgûrû ya irîma ya Eburaimu, na Kiriathi-Ariba na nwa yo Eburoni, nthîgûrû ya irîma ya Njunda. 8 Na rûgongo rûra rûûngî rwa muuro wa Njorondani uumîîrooni bwa riûa bwa Njeriko, taûni ino nacio i cio ciathuurirwe irî taûni cia kwîbithaga: Beseri îra îrî rwanda rûtunguruuni rwa antû ba Rubeni; Ramothi îra îrî Ngiriandi, ndeeni ya nthîgûrû ya antû ba Ngandi, na Ngorani îra îrî Mbasani, kuuma kîrî antû ba mwîrîga wa Manase. 9 Inu i cio taûni ira ciathuurîîtwe cia kwîbitha n'ûntû bwa antû ba Isiraeri bonthe, na ageni bara batwîre kîrî bo bara baûraganaga batakwenda. Bakîûmba kûthi kwîbitha taûniini inu mwanka ntugû ya kûgambithua i mwingî.