Taûni cia Arawi
35
1 Mwathani aaria na Musa barî iboondeeni bia Moabu îkumbo rîa muuro wa Njorondani rûgongo rûra rûngî rwa Njeriko, amwîra, 2 “Îra antû ba Isiraeri baneenkere Arawi taûni imwe kuuma gîcuncîîni kîao kaingo Arawi batûûraga ku, na babaneenkere ithaka bira bithiûrûkîrîîtie taûni inu bituîke gûntû kwao gwa kûrîîthia. 3 Taûni ira bagaapewa ikeegua irî ciao cia gûtûûra na ithaka bira bicithiûrûkîrîtie bikeegua birî bia kûrîîthia ng'ombe na nyamû inu ingî ciao cia ndîîthia.4 “Ithaka bibu bia kûrîîthia bithiûrûkîrîîte taûni inu bira bûkaanenkera Arawi, bikeegagua birî na wariî bwa biiti ngiri îmwe ya magana mataano kuuma rûthingooni rwa taûni kûthiûrûkîîria mbarî cionthe. 5 Bûthime biiti ngiri ithatû mbarî ya uumîîro bwa riûa, biiti ngiri ithatû mbarî ya iti, mbarî ya ûthwîro bwa riûa na mbarî ya bwa îgûrû. Taûni îkeegua îrî gatîgatî na noogo ithimi bikaanjagîîria. Gûntû gûku i ku gûgaatuîka wa kûrîîthia.
Taûni cia kwîbithaga
(Kûri 19:1-13; Njosua 20:1-9)
6 “Ibûbatîîrue bûneenkera Arawi taûni ithanthatû cia kwîbitha rîra muntû aûraganîîte atakwenda akaathiyaga kwîbitha. Îgûrû ya inu, bûboongeere taûni iingî mîrongo îna na ciîrî 7 amwe na ithaka biacio bia kûrîîthia kaingo taûni ciao cionthe ituîka mîrongo îna na inyanya. 8 Taûni ira bûkaanenkera Arawi kuuma woora mwîrîga wa Isiraeri ikaaringana na bûra mwîrîga ûyu ûrî na taûni inyiingî nkûrûki ya ûra ûrî na i niini.”
9 Mwathani eera Musa, 10 “Îra antû ba Isiraeri, ‘Bwaringa muuro wa Njorondani bwathûngîra Kanaani, 11 bûthuure taûni cia gûtoorokera ira muntû aûmba gûtoorokera akathi kwîbitha rîra aûraga muntû atakwenda. 12 Muntû eebithîîte ta gûku atiîgua arî ûgwatiini bwa kûûragwa i muntû wa ba muntû ûra aûragîîte. Muntû aûragîîte muntû atakwenda atibatîîrue aûragwa mbere ya agaambithua. 13 Thuuraani taûni ithanthatû, 14 ithatû rûgoongo rwa mbarî ya uumîîro bwa riûa rwa Njorondani na ithatû inu iingî nthîgûrû ya Kanaani. 15 Inu i cio ikeegua irî taûni cia kwîbitha cia antû ba Isiraeri na ageni bara barî Isiraeri gwa kagiita gaakubî kana bara batwîre ku. Muntû ûra akaûragana atakwenda akaathiyaga taûni inu akeebitha.
16 “ ‘Îndî akaringa muntû na gîntû gîa cuuma muntû ûyu aaringwa agakua, ûyu aaringana i mûûragani na abatîîrue aûragwa. 17 Kana muntû akeegua arî na iiga rîûmba kûûraga njaraani, akaringa muntû narîo na muntû ûyu aaringwa agakua, ûyu aaringana i mûûragani na abatîîrue aûragwa 18 kana ûkeegua muntû arî na gîntû kîûmba kûûraga muntû kîa mûtî njarani akaringa muntû nakîo agakua, ûyu i mûûragani na abatîîrue aûragwa 19 Muntû wa mûciî wa muntû ûra aûragîîtwe nabatîîrue aûraga muntû ûra amûûragîrîte muntû. Rîra akaarîîkana na mûûragani ûyu abatîîrue amûûraga. 20 Ûkegua muntû arî ûthû na ûra ûngî na akamûûraga na njîra ya kûmûthûgûria kana akagera gîntû akamûriinga nakîo, 21 kana akamûriinga na nkundi agakua, ûyu aûragana akeegua arî na mabîtia ma kûûragana na abatîîrue kûûragwa. Muntû wa mûciî wa muntû ûra aûragîîtwe nabatîîrue aûraga mûûragi wa muntû wake wa ara akaamwona. Rîra akaarîîkana n'we abatîîrue amûûraga.
22 “ ‘Î gûkarîîte ata rî, muntû akaûraga muntû atakwenda na batirî ûthû n'we, na njîra ya kûmûtugutia kana kûmûgera gîntû 23 kana rîmwe muntû akagera iiga atakwenda rîkaûraga muntû atakwendaga kûthûûkia na tika barî ûthû na muntû ûyu aûraga, 24 gûkari ûgu, antû babatîîrue bagwatîra muntû ûyu aûragana atakwenda na ti muntû wa mûciî wa ba mûûragwa ûra akeegua akîenda kwîrîîria. 25 Antû babatîîrue boonokia muntû ûra aûragana atakwenda kuuma kîrî ûra akwenda kwîrîîria, na bamûcookia taûniini ira cia kwîbitha naara aarî akûthi. Abatîîrue akara naagu taûni înu mwanka rîra muntû ûra akeegua arî mûthînjîri ûra mûnene wa Ngai gwa kagiita gaku agaakua.
26 “ ‘Muntû aûraganîîte atakwenda akaaya kuuma taûni ya kwîbitha îra aathiire gûtûûra 27 na muntû wa ba muntû ûra aûragire akarîîkana n'we akamûûraga akîîrîîria muntû wake, muntû ûyu eerîîria atiitarwa arî mûûragani. 28 Muntû ûra aûraganîîte atakwenda abatîîrue akara taûni îra aathi kwîbitha mwanka rîra muntû ûra akeegua arî mûthînjîri ûra mûnene wa Ngai gwa kagiita gaku agaakua. Na nyuma ya ûgu muntû ûyu nwa acooke gwake mûciî.
29 “ ‘Bûbatîîrue bûthingataga mawatho mama biû na nciarwa cienu bantû onthe ara bûkeegagua bûtwîre.
30 “ ‘Muntû ûra aûraganîîte agaatuîrwa kûûragwa rîra kûrî na ûkûûyî bwa antû baîrî kana nkûrûki. Ûkûûyî bwa muntû ûmwe ti bûganu bwa gûtûma muntû atuîrwa aûraganîîte.
31 “ ‘Mûûragani nwa mwanka aûragwe. Gûtirî îrîi aûmba kûrea atîîra gûtuîrwa kûûragwa.
32 “ ‘Ûkeegua muntû naakuthûkire aathi taûni ya kwîbitha atibatîîrue eetîgîîrua kûnenkanîra îrîi kaingo acooka mûciî mbere ya muntû ûra aarî mûthînjîri ûra mûnene wa Ngai kagiita gaku akua.