Mîanka ya nthîgûrû înu
34
1 Mwathani aanenkera Musa 2 mawatho mama makûthingatwa n'antû ba Isiraeri: “Rîra bûkaathûngîra Kanaani, nthîgûrû îra nkûbûnenkera, mîanka ya gûntû kwenu îkeegua îkari ûûgû.”3 “Bwa iti nthî înu ûkeegua yankanîîte na Endomu na rwanda rwa Sini. Mwanka ûthiîte kuuma mûthia wa iti ya Îria rîa Mwonyo. 4 Rîru ûbîîndûke werekeere bwa iti ûthimîîte mwîtio wa Akirabimu, ûkaathi na mbere ûkîgiitagîîra Sini ûkîîndamaga mwanka Kandesi-Barinea. Rîru gwîtie ûraithîîte bwa ûthwîro bwa riûa kûthi Asara Andari na kûthi mwanka Asimoni 5 ara ûkaabîndûkîra werekeere kîbondeeni kîra kîrî mwankaani wa Miisiri, ûkîthiragîra Menditarîniani.”
6 Mwanka wa ûthwîro bwa riûa ûkeegua ûrî îria rîa Menditarîniani.
7 “Mwanka wa bwegûrû ûkanjîîria Menditarîniani na kûthi kîrîmaani kîa Ori. 8 Kuuma agu ûthi mwanyaani wa Amathi, ûkûrûkîîre Sendandi, 9 na Siburoni ûkîthiragîra Asari Enani.”
10 Mwanka wa uumîîro bwa riûa ûkambîîria Asari Enani mwanka Sefamu. 11 Rîru ûkeendama bwa Ribura, Mbarî ya uumîîro bwa riûa bwa Aini, mwanka tûrîmaani tûra tûrî mbarî ya uumîîro bwa riûa ya Îria rîa Kinerethi. 12 Rîru ûgaakuria na îkumbo rîa muuro wa Njorondani, mwanka îria Rîtarî Mwoyo. Înu n'yo mîanka îra îna ya nthîgûrû yenu.
Kûgaîwa gwa kîthaka
13 Kwoogu Musa eera antû ba Isiraeri, “Îno n'yo nthîgûrû yenu îra bûkaagaa na njîra ya kûringa kuura. N'yo nthîgûrû îra Mwathani aneenkereete mîîrîga kenda na nucu. 14 Mîîrîga ya Rubeni, Ngandi na nucu ya mwîrîga wa Manase i baagwatire rûgai rwao bagaanîrîtue kîîmîciî, 15 rûgoongo rwa uumîîro bwa riûa rwa Njorondani, mbarî îra îngî ya Njeriko.”
16 Mwathani aaria na Musa amwîra, 17 “Eriasari ûra mûthînjîri wa Ngai na Njosua mwana wa Nuni i bo bakaagaîra antû nthîgûrû. 18 Thuura mûtongoria ûmwe kuuma woora mwîrîga kaingo babateetheeria kûmîgaa.” 19 Antû baba i bo bakaabateetheeria;
Karebu mwana wa Njebune,
kuuma mwîrîga wa Njunda;
20 Semweri mwana wa Amiundi,
kuuma mwîrîga wa Simioni;
21 Erindandi mwana wa Kisironi,
kuuma mwîrîga wa Benjameni;
22 Mbuki mwana wa Njogiri,
kuuma mwîrîga wa Ndani;
23 Anieri mwana wa Efondi,
kuuma mwîrîga wa Manase mwana wa Njosebu;
24 Kemueri mwana wa Sifutani,
kuuma mwîrîga wa Eburaimu mwana wa Njosebu;
25 Erisafani mwana wa Parinaki,
kuuma mwîrîga wa Seburuni;
26 Paritieri mwana wa Asani,
kuuma mwîrîga wa Isakaari;
27 Ayiundu mwana wa Seromi,
kuuma mwîrîga wa Aseri;
28 Pendaeri mwana wa Amiundi,
kuuma mwîrîga wa Nabutarî.
29 Baba i bo antû bara Mwathani aneenkeere ngûgî ya kûgaîra antû ba Isiraeri ûtonga nthîgûrû ya Kanaani.