Rûgai rwa aka baagûre
36
1 Atongoria ba mîciî ya mwîrîga wa Ngiriandi mwana wa Makiri na mwan'wa mwana wa Manase mwana wa Njosebu, baathi kîrî Musa na atongoria bara bangî ba Isiraeri. 2 Bauga, “Mwathani naakwathire ûgaîre antû ba Isiraeri nthîgûrû na njîra ya kûringa kuura. Na akwîra ûneenkere aarî ba Serofeandi into bia îthe. Serofeandi aarî muntû wa mûciî wetû. 3 Îndî ririkana, aarî babu bakaaya kûgûrwa n'antû arûme ba mîîrîga îngî ya Isiraeri, into bibu biao bigaatuîka bia mwîrîga ûyu. Na kwoogu mûgana wa rûgai rwetû ûkaanyiia. 4 Na rîra mwanka wa gûcookanîrua kwa mînda kîrî eene ndeeni ya Isiraeri ûgaakinya, into bia aarî ba Serofeandi bikaaringanîrwa na bia mîîrîga îra bakaagûrwa na biume mwîrîgaani wetû.”5 Kwoogu Musa aanenkera antû ba Isiraeri yathana rîrî kuuma kîrî Mwathani. Auga, “Ûgu antû ba mwîrîga wa antû ba Njosebu bakuuga i bwagîrîte, 6 na Mwathani ariuga aarî ba Serofeandi nwa beethûrîre antû bara bakwenda babagûra îndî nwa mwanka beegue barî ba mwîrîga wao. 7 Into bia muntû wonthe wa Isiraeri i bia mwîrîga wao. 8 Mûka wonthe ûra akaagaîrwa into kuuma mwîrîgaani wa Isiraeri abatîîrue agûrwa i muntû mûrûme wa mwîrîga woyu. Na mantû makîthiyaga ûgu i rîo antû ba Isiraeri bakaûmbaga kwîgua bakîîgaa into bia biûyûûyû biao. 9 Na gûtirî rûgai rûkaumaga mwîrîgaani ûmwe rûthi mwîrîgaani ûngî. Gûkari ûgu, woora mwîrîga wa Isiraeri ûkeegagua ûrî na into biau rîonthe.”
10 Kwoogu aarî ba Serofeandi baarûtha wa ta bûra Mwathani aathîîte Musa. 11 Aarî babu ba Serofeandi baarî; Maara, Tirisa, Ogira, Mirika na Nuu, na baagûrirwe n'aruagina ba mwîrîga wa ba îthe. 12 Baagûrwa mîîrîgaani ya rûrîîyo rwa Manase mwana wa Njosebu na rûgai rwao rwakara mûciî na mwîrîgaani wa ba îthe.
13 Mama i mo maathana na mawatho mara Mwathani eerire Musa eere antû ba Isiraeri barî iboondeeni bia Moabu îkumbo rîa muuro wa Njorondani rûgoongo rûra rûngî kuuma Njeriko.