Nthîgûrû îra yanenkeerwe mwîrîga wa Simioni
19
1 Rîra baaringire kuura, nthîgûrû ya ciîrî yagaîrîîrwe mwîrîga wa Simioni kûringana na mariiko maao. Rûgai rwao rwa nthîgûrû rwarî gatîgatî ka rûgai rwa nthîgûrû rwa antû ba Njunda. 2 Nthîgûrû yao yarî na taûni ino: Beeriseba, Seba, Moranda, 3 Asari-Suari, Bara, Esemu, 4 Eritorandi, Bethuri, Orima, 5 Sikiragi, Bethi-Marikabothi, Asari-Susa, 6 Bethi-Rebaothi, na Sarueni; cionthe ciarî taûni îkûmi na ithatû amwe na ntûûra cia cio; 7 cingî ciarî Aini, Rimoni, Etheri na Asani; cionthe ciarî taûni inya amwe na ntûûra cia cio; 8 amwe na ntûûra cionthe ira ciathiûrûkîîrîîte taûni ino mwanka Baarathi-Beeri kana Rama ndeeni ya Negebu. Rûrû i ru rwarî rûgai rwa antû ba mwîrîga wa Simioni kûringana na mariiko maao. 9 Rûgai rwa antû ba Simioni rwarutirwe rûgaini rwa antû ba Njunda, n'ûntû rûgai rûru rwa antû ba Njunda rwarî rûnene kîrî bo nkûrûki ya kîthimi, kwoogu antû ba Simioni baagaîrîîrwe rûgai rwao kuumania na nthîgûrû ya antû ba Njunda.Nthîgûrû îra yanenkeerwe mwîrîga wa Seburuni
10 Rîra baaringire kuura, nthîgûrû ya ithatû yagaîrîîrwe mwîrîga wa Seburuni kûringana na mariiko maao. Na mwanka wa rûgai rwao wakinyîîte Sarindi. 11 Kuuma agu mwanka ûyu werekera bwa ûthwîro bwa riûa wakinya Mareari, ûkîringithagia Ndabesethi na kauro kaarî na rûûyî uumîîrooni bwa riûa bwa Njokineamu. 12 Kuuma agu Sarindi mwanka ûyu werekera rûteere rûûngî, wathi ûtarîîte uumîîrooni bwa riûa wakinya mwankaani wa Kisirothi-Tabori, na kuuma agu wakinya bwa Ndaberathi, rîru wetia wakinya Njafia. 13 Rîru wathi mbere ûtarîîte umîîro bwa riûa wakinya Ngathi-Eferi, Ethi-Kasini, na Rimoni wacooka wabîndûka wakinya bantû eetagwa Nea. 14 Bwa mbarî ya îgûrû mwanka ûyu wakûrûkîîre Anathoni na wathirîra kîbondeeni kîa Ibuta-Eri. 15 Taûni ira ciarî nthîgûrû înu ciarî: Katathi, Naarari, Simuroni, Indara, na Bethireemu; cionthe ciarî taûni îkûmi na ciîrî amwe na ntûûra cia cio. 16 Taûni ino amwe na ntûûra cia cio i cio ciarî rûgai rwa antû ba mwîrîga wa Seburuni, kûringana na mariiko maao.
Nthîgûrû îra yanenkeerwe mwîrîga wa Isakaari
17 Rîra baaringire kuura, nthîgûrû ya inya yagaîrîîrwe mwîrîga wa Isakaari kûringana na mariiko maao. 18 Nthîgûrû yao yarî na taûni ino: Njesireeri, Kesurothi, Sunemu, 19 Afaraimu, Sioni, Anaarathi, 20 Rabithi, Kisioni, Ebesi, 21 Remethi, Eni-Nganimu, Eni-Anda, Bethi-Pasesi; 22 na mwanka woyu n'wakinyîîte Tabori, Saasuma, na Bethi-Semesi, na wakinyûka muurooni wa Njorondani. Na cionthe ciarî taûni îkûmi na ithanthatû, amwe na ntûûra cia cio. 23 Taûni ino amwe na ntûûra cia cio i cio ciarî rûgai rwa antû ba Isakaari, kûringana na bûra mariiko maao makari.
Nthîgûrû îra yanenkeerwe mwîrîga wa Aseri
24 Rîra baaringire kuura, nthîgûrû ya itaano yagaîrîîrwe mwîrîga wa Aseri kûringana na mariiko maao. 25 Nthîgûrû yao n'amwe na: Erikathi, Ari, Beteni, Akisabu, 26 Aramereki, Amandi, na Misari. Na rûteere rwa ûthwîrooni bwa riûa wakinyaga Karimeri na Siori-Ribunathi, 27 rîru waûndûka ûtarîîte uumîîrooni bwa riûa, werekereete Bethi-Ndagoni, na wakûrûka wakinya Seburuni na kîbondeeni kîa Ibuta-Eri werekera bwa îgûrû kaîrî wakinya Bethi-Emeki na Neieri; wakûrûkîîra Kaburi bwa ûmotho, 28 Eburoni, Reobu, Amoni, Kana, mwanka ntûûra îra nene ya Sindoni; 29 Nau wacooka wagarûka ûtarîîte Rama, wakinya taûni ya Turo îra yarî mbirigîre na nthingo cia maiga; na wagarûka werekera Osa, na wathi wakinyûka îriani, bantû eetagwa Maarabu, Akisibu; 30 Uma, Afeki Reobu. Na cionthe ciarî taûni mîrongo îîrî na ciîrî, amwe na ntûûra cia cio. 31 Taûni inu amwe na ntûûra cia cio i cio ciarî rûgai rwa antû ba mwîrîga wa Aseri kûringana na mariiko maao.
Nthîgûrû îra yanenkeerwe mwîrîga wa Nabutarî
32 Rîra baaringire kuura, nthîgûrû ya ithanthatû yagaîrîîrwe mwîrîga wa Nabutarî kûringana na mariiko maao. 33 Na mwanka wao wanjîrîîtie kuuma Erebu, mûtîîni wîtagwa mûpuru nau warî gûntû gwetagwa Saananimu, na Andami-Nekebu, na Njabuneeri, mwanka Rakumu, na wakinyûka muurooni wa Njorondani. 34 Rîru mwanka ûyu wagarûka watara bwa ûthwîrooni bwa riûa wakûrûkîîra Asinothi-Tabori, wacooka waumîîra Ukoki, na ûkîringithagia Seburuni mbarî ya naiti, Aseri ûthwîrooni bwa riûa, na Njunda uumîîrooni bwa riûa rûteere rwa Njorondani. 35 Taûni ira ciarî mbirigîre na rûthingo nacio; i Sindimu, Seri, Amathi, Rakathi, Kinerethi, 36 Andama, Rama, Asori, 37 Kendesi, Endirei, Eni-Asori, 38 Yironi, Migindari-Eri, Oremu, Bethi-Anathi, na Bethi-Semesi. Na cionthe ciarî taûni îkûmi na kenda amwe na ntûûra cia cio. 39 Rûru i ru rûgai rwa antû ba mwîrîga wa Nabutarî kûringana na mariiko maao; taûni ciao amwe na ntûûra cia cio.
Nthîgûrû îra yanenkeerwe mwîrîga wa Ndani
40 Rîra baaringire kuura, nthîgûrû ya mûgwanja yagaîrîrwe mwîrîga wa Ndani, kûringana na mariiko maao. 41 Nthîgûrû yao yarî: Sora, Esitaori, Iri-Semesi, 42 Sarabini, Aiyaroni, Ithira, 43 Eroni, Timuna, Ekironi, 44 Eriteke, Ngibethoni, Baarathi, 45 Njeundi, Mbene-Beraki, Ngathi-Rimoni, 46 Me-Njarikoni, na Rakoni amwe na nthî îra yeerekanîrîîte na Njopa. 47 Antû ba Ndani bagûtuunywa nthî yao baathiire kûrûa na antû ba Resemu. Baamîgwatire, baûraga antû ba noogo na mpiû, bamîthûkia yatuîka yao na baatûûra ku. Nabo batuîrîîra taûni înu riîtwa rîa biûyûyû biao bamîîta, Ndani. 48 Rûrû i ru rûgai rwa antû ba mwîrîga wa Ndani, kûringana na mariiko maao.
49 Bakûrîîkia kûgaana nthîgûrû, antû ba Isiraeri i banenkeere Njosua mwana wa Nuni gacuncî kamwe ka nthîgûrû înu gatuîka gaake. 50 Wa ta bûra Mwathani aathanîîte, baamwere taûni wa îra aarombeete ta yo Timunathi-Sera îra yarî nthîgûrû ya irîma ya Eburaimu. Njosua aaka taûni înu kaîrî na aatûûra ku.
51 Ino i cio nthîgûrû ira mûthînjîri wa Ngai, Eriasari, Njosua mwana wa Nuni na atongoria ba mariiko ma antû ba Isiraeri baaganiirie na njîra ya kûringa kuura, naagu Siro mbere ya Mwathani, mwîrîgaani wa îrema rîa kûrîîkanaga. Kwoogu barîîkia kûgaa kîthaka.