Njosua 18

Njosua aagaa gûntû kûra gwatigeere

1 Nyuma ya ûgu, kîrîndî kîonthe kîa antû ba Isiraeri kîethîrana amwe naagu Siro, na baamba îrema rîa gûkomanagîra ku. Na nthîgûrû înu n'yo n'yarîkîîtie gûturwa i bo. 2 Îndî i gwatigeere mîîrîga mûgwanja ya antû ba Isiraeri bara bataarî bakûgaîrwa rûgai rwao. 3 Kwoogu Njosua eera antû ba Isiraeri, “I mwanka rî bûgaakara bûtakûthi bûthûkia nthîgûrû îra Mwathani Ngai wa biûyûyû bienu aabûnenkeere îtuîka yenu? 4 Thuuraani antû arûme bathatû kuuma kîrî wa kîra mwîrîga. Nkabatûma bathi bathiûrûûke nthîgûrû înu yonthe, bakîandîkaga bûra îkagaanua. Rîru bancookere bambîîre bûra gûkarakari. 5 Na bûkagaania nthîgûrû înu icuncî mûgwanja. Njunda akeegua arî bwa iti na antû ba Njosebu nabo beegue barî bwa îgûrû. 6 Naabi bwandîke mantû ma icuncî bibu mûgwanja, bûcooke bûndetere mo aaga; naani nkabûgaanîria na njîra ya kûringa kuura mbere ya Mwathani Ngai wetû. 7 Antû ba Rawi batirî na gîcuncî kîao gatîgatîîni keenu, n'ûntû bo rûgai rwao i gûtûûra bakîrutaga ngûgî ya ûthînjîri. Antû ba Ngandi na ba Rubeni nabo na nucu ya mwîrîga wa Manase mwanka agu bo i banenkeretwe rûgai rwao rûteere rwa uumîîrooni bwa riûa bwa muuro wa Njorondani. Musa mûruti ngûgî wa Ngai n'we aabeere.”

8 Kwoogu mbere antû babu bathi, Njosua abaa watho abeera, “Îthiini bûthiûrûûke nthîgûrû înu na bwandîke mantû maayo monthe, na bûndetere aga, na nkamîringithîria kuura aaga Siro mbere ya Mwathani.” 9 Kwoogu antû babu bauma agu baathi, baathiûrûûka nthîgûrû înu baandîka mantû îbukuuni, bakîonanagia taûni cionthe ndeeni ya icuncî bibu mûgwanja. Rîru bacooka kîrî Njosua kambîîni yake Siro. 10 Na Njosua aaringa kuura n'ûntû bwao naagu Siro mbere ya Mwathani; agu noo Njosua aagaîrîîre antû ba Isiraeri nthîgûrû înu wa ta bûra beegaanîîtie kî mîîrîga.

Nthîgûrû îra yanenkeerwe mwîrîga wa Benjameni

11 Rîra baaringire kuura, nthîgûrû ya mbere yagaîrîîrwe mwîrîga wa Benjameni kûringana na mariiko maao. Nthîgûrû îra baanenkeerwe yarî gatîgatî ka mwîrîga wa Njunda na wa Njosebu. 12 Mbarî ya bwegûrû, mwanka wao wanjîrîîtie muurooni wa Njorondani, wathi wakinya mûtûndûrûkooni ûra warî bwa mbarî ya îgûrû ya Njeriko, rîru watara bwa ûthwîrooni bwa riûa gûkûrûkîîra nthîgûrû îra yarî ya irîma wakinya rwanda rwa Bethi-Abeni. 13 Kuuma agu mwanka ûyu watara bwa iti wakinya taûni ya Rusi, na nwa yo Betheri, wendama mwanka Atarothi-Andari wetia kîrîmaani îgûrû kîra kîrî naiti ya Bethi-Oroni. 14 Mwanka ûyu werekera rûteere rûngî, wagarûka mbarî ya iti uumîîte bwa ûthwîrooni bwa riûa bwa rûteere rwa kîrîma gîku na wathi wakinyûka Kiriathi-Mbaari, na nwa yo Kiriathi-Njearimu. Taûni îno n'îmwe ya taûni cia antû ba Njunda. Ûyû n'uu warî mwanka wa ûthwîrooni bwa riûa. 15 Na mwanka wa mbarî ya bwa iti wanjîrîîtie mûthiani wa Kiriathi-Njearimu; wauma agu wathi bwa Epuroni, mbarî ya ûthwîrooni bwa riûa wakinya inyakaani bia Nebutoa. 16 Rîru mwanka wendama wakinya mûthiani wa kîrîma kîra kîerekereete kîbonde kîa Inomu, kîra kîrî mbarî ya îgûrû mûthiani wa kîbonde kîa Refaimu; wacooka wendama kîbondeeni kîa mwana wa Inomu na wakerania bwa naiti werekereete bwa taûni ya Anjebusi ûtarîîte Eni-Rongeri. 17 Rîru wagarûka watara bwa mbarî ya îgûrû wakinya Eni-Semesi na Gerirothi, îra yeerekanîrîte na Andumimu; rîru wendamîîra agu wakinya kiigaani kîa Boani mwana wa Rubeni. 18 Kuuma agu wakûrûka wîtîîtie bwa îgûrû wakinya rûgongo rûra rûûngî rwerekanîrîte na Bethi-Araba, na wendama wakinya Araba. 19 Rîru mwanka ûyu wathi na mbere wakinya mûthiani wa Bethi-Ogira. Mwanka wa mbarî ya bwa iti nau wathirîra mûthûngîîrooni wa bwa îgûrû ya Îria rîa Mwonyo ara muuro wa Njorondani ûthûngîîrîîte. 20 Muuro wa Njorondani nau warûtha mwanka wayo rûteere rwa uumîîrooni bwa riûa. Rûrû i ru rûgai rwa antû ba Benjameni kûringana na mariiko maao, mbarî cionthe.

21 Îîndî taûni cia antû ba Benjameni kûringana na mariiko maao ciarî Njeriko, Bethi-Ogira, Emeki-Kesisi, 22 Bethi-Araba, Semaraimu, Betheri, 23 Abimu, Para, Obura, 24 Kefari-Amoni, Obuni, Ngeba; cionthe ciarî taûni îkûmi na ciîrî na ntûûra cia cio. 25 Cingî ciarî Ngibeoni, Rama, Beerothi, 26 Misipe, Kefira, Mosa, 27 Rekemu, Iripeeri, Tarara, 28 Sera, Aerebu, Anjebusi nwa yo Njerusaremu, Ngibea, na Kîrîathi-Njearimu, cionthe ciarî taûni îkûmi na inya, amwe na ntûûra cia cio. Rûru i ru rûgai rwa antû ba Benjameni kûringana na mariiko maao.