17
1 Gîcuncî kîngî kîa nthîgûrû kîanenkeerwe mwîrîga wa Manase n'ûntû aarî kîîmbere kîa Njosebu. Kîanenkeerwe riiko rîa Makiri kîîmbere kîa Manase na aarî îthe wa Ngiriandi. Antû ba Makiri barî ncamba cia ndûa kwoogu baanenkerwa nthîgûrû ya Ngiriandi na Mbasani. 2 Antû bara bangî ba Manase baanenkeerwe nthîgûrû kûringana na mariiko maao. Baarî: Abieseri, Ereki, Asirieri, Sekemu, Eferi na Seminda. Baba baarî arûme ba rûrîîyo rwa Manase mwana wa Njosebu na i bo baarî atongoria ba mariiko maao.3 Îndî Serofeandi mwana wa Eferi, mwana wa Ngiriandi, mwana wa Makiri, mwana wa Manase, ataarî na aana ba antû arûme îndî n'aarî akî. Nabo mariîtwa maao maarî: Maara, Nuu, Ogira, Mirika na Tirisa. 4 Aarî babu baathiire kîrî Eriasari mûthînjîri wa Ngai na kîrî Njosua mwana wa Nuni na kîrî atongoria, babeera, “Mwathani aarutire watho eera Musa tûgaîrwe rûgai rwetû n'ûntû baaba atirî na nthaka.” Kwoogu Njosua aathîkîra Mwathani na aagaîra wa kîra mwarî rûgai akîgaîra antû arûme ba mûciî wao. 5 N'ûntû bwa gîtûmi gîku Manase aagaîrwa mînda îîngî îkûmi tûtakûgweta nthîgûrû ya Ngiriandi na Mbasani rûgongo rûra rûûngî rwa muuro wa Njorondani, 6 n'ûntû aarî ba Manase baanenkeerwe rûgai aana ba arûme ba rûrîîyo rwake bakîewa. Nthîgûrû ya Ngiriandi n'yo yanenkeerwe antû bara bangî ba rûrîîyo rwa Manase.
7 Nthîgûrû ya antû ba Manase yanjîîrîîtie kuuma mwankaani wa Aseri wakinya Mikimethathi, îra îrî uumîîrooni bwa riûa bwa Sekemu. Rîru wendama ûtarîîte bwa mbarî ya naiti kuuma Mikimethathi werekereete mbarî ya antû bara baatûûraga akubî na kînyaka kîa Eni-Tapua. 8 Nthîgûrû ya Tapua yarî ya Manase, îndî taûni ya Tapua îra yarî mwankaani wa Manase yarî ya rûrîîyo rwa Eburaimu. 9 Kaîrî mwanka wendama wakinya kaurooni ga Kana. Taûni ira ciarî naiti ya kauro gatîgatî ga taûni cia Manase, ciarî cia antû ba Eburaimu. Mwanka wa Manase wathiîte ûtarîîte bwa îgûrû ya kauro gaku ga Kana na mûthia wayo wakinya îriani. 10 Kûthi bwa mbarî ya iti kwarî kwa Eburaimu na kûthi bwa mbarî ya îgûrû kwarî kwa Manase. Nthîgûrû ya Manase yathiîte îgakinya îriani na yankana na nthîgûrû ya Aseri mbarî ya bwa îgûrû, na mbarî ya uumîîrooni bwa riûa kwarî kwa Isakaari. 11 Kaîrî Manase n'aarî na taûni ciake ndeeni ya nthîgûrû ya Isakaari na ya Aseri, nacio i cio ino: Bethi-Seani, Ibureamu, Ndori, Eni-Ndori, Taanaki, Megindo na ntûûra cia cio cionthe. (Na ya ithatû i Napothi.)a 12 Îndî amwe na ûgu antû ba Manase bataûmba kwîngatia antû bara baatwîre taûniini inu, kwoogu antû ba Kanaani i baathiire na mbere gûtûûra gûntû gûku. 13 Îndî Aisiraeri bakûgîa inya, bateengatia antû ba Kanaani, babatuîkithiirie nkombo ciao cia kûbarutagîra ngûgî na taka.
14 Na nyuma ya ûgu antû ba Njosebu baaria na Njosua, bamûûria, “I kî n'ûntû watûnenkera gacuncî kamwe akî ka nthîgûrû rûrî rûgai rwetû? Tûrî antû baingî mûno n'ûntû Mwathani n'atûthaarimîîte.”
15 Njosua abacookeria abeera, “Ûkaaya kwîgua bûrî baingî mûno, îthiini bûûnge mûthitû ûra Aperisi na Arefaimu batûûraga gûtuîke kwenu, n'ûntû nthîgûrû înu ya irîma ya Eburaimu îtikûbûgana.” 16 Antû ba mwîrîga wa Njosebu bacookia, “Nthîgûrû înu îrî na irîma îtitûgana, na kaîrî antû ba Kanaani bonthe bara batwîre gûku mwaranthî barî na nkaarî cia ndûa ira ikururagua i mbaraathi, bonthe kinya bara barî Bethi-Sani na nteere ira imîthiûrûkîîte na bara batwîre kîbondeeni kîa Njesireeri.”
17 Rîru Njosua eera antû ba mûciî wa Njosebu, wa Eburaimu na wa Manase, “Wabu bûrî antû baingî na barî na inya înene, bûtiigaîrwa gacuncî kamwe akî, 18 nthîgûrû înu ya irîma îgaatuîka yenu, wana wegua îrî na kîthaka kîînene bûgakîûnga gîtuîke kîenu bûkinye wa ara mwanka wakîo ûkinyîîte. Bûkeengatia antû ba Kanaani baume ku, wana wegua barî na inya na barî na nkaarî cia ndûa na mathaga ma ndûa mara makururagua i mbaraathi.”