Njosua 16

Nthîgûrû îra yanenkeerwe mwîrîga wa Eburaimu na wa Manase

1 Mwanka wa mbarî ya naiti wa nthîgûrû îra rûrîîyo rwa Njosebu rwagaîrîîrwe wanjîrîîtie kuuma Njorondani akubî na Njeriko, bantû uumîîrooni bwa riûa bwa inyaka bia Njeriko, na wathi wathûngîra ng'arûûni. Waumire Njeriko wetia nthîgûrû ya irîma mwanka Betheri. 2 Rîru wauma agu Betheri, nwa yo Rusi, wakûrûka wakinya Atarothi, kûra antû ba Ariki baatûûraga. 3 Wauma agu wendama watara ûthwîrooni bwa riûa wakinya nthîgûrû ya Njaburetitesi mwanka nthîgûrû ya Bethi-Oroni ya naiti. Kuuma agu wakinya Ngeseri na wathûngîra îriani. 4 Kwoogu antû ba Njosebu, ba Manase, na ba Eburaimu bagaîrwa nthîgûrû yao.

5 Îno n'yo nthîgûrû ya antû ba mwîrîga wa Eburaimu kûringana na mariiko maao: mwanka wao waumîîte bwa Atarothi-Andari ûtarîîte bwa uumîîrooni bwa riûa wakinya Bethi-Oroni ya bwa îgûrû, 6 na kuuma agu wakinya îriani. Kuuma agu wathi bwa Mikimethathi ya bwa îgûrû werekera bwa uumîîrooni bwa riûa, wakîîgama ûtarîîte bwa Taanathi-Siro na wakûrûkania werekereete uumîîrooni bwa riûa mwanka wakinya Njanoa. 7 Rîru wacooka wendama kuuma Njanoa mwanka Atarothi na Naara, ûgîkinyaga Njeriko na ûkîthiragîra muurooni wa Njorondani. 8 Na kaîrî mwanka woyu wathi bwa ûthwîro bwa riûa kuuma Tapua wakinya kaurooni ga Kana, na mûthia wau warî îriani. Îno n'yo nthîgûrû îra yagaîrîîrwe mwîrîga wa Eburaimu kûringana na mariiko maao. 9 Antû ba Eburaimu baagaîrîîrwe taûni imwe amwe na ntûûra ciacio cionthe ndeeni ya nthîgûrû ya antû ba Manase. 10 Amwe na ûgu, bateengatia antû ba Kanaani bara batwîre Ngeseri, kwoogu wana îmunthî tûrî antû ba Kanaani batûûranagîîra na antû ba Eburaimu, îndî barutithagua ngûgî cia taka.