Nthîgûrû îra yanenkeerwe mwîrîga wa Njunda
15
1 Mariiko ma mîîrîga ya Njunda baapeerwe gîcuncî kîa nthîgûrû yao ta ûûgû: Nthîgûrû yao yendamaga bwa iti îgakinya nthîgûrû ya Endomu, na rwanda rwa Sini rûrî bwa iti mûthiani cwe. 2 Mwanka ûyû wa mbarî ya iti, waumîîte mûthiani wa îria rîtarî mwoyo.a 3 Mwanka ûyû wendama bwa iti uumîîte bwa mwîtio wa Akirabimu na wakûrûka wakinya Sini. Na wacooka wetia wakinya naiti ya Kandesi-Barinea watambûrûka gwakûrûkîîra Esironi, wakinya Andari, wabîndûka watara Karika. 4 Kuuma agu waakûrûkîîra Asimoni, na wendama na kauro kara karî mwankaani wa Miisiri wakinyûka Îriani. Na agu noogo mwanka ûyu wathirîîre. Ûyu n'uu warî mwanka wa mbarî ya bwa iti ya Njunda. 5 Na mwanka ûra warî mbarî ya uumîîrooni bwa riûa n'Îria rîtarî Mwoyo. Na wathiîte ûgakinya ara muuro wa Njorondani ûthûngîîrîîte îriani rîru. Mwanka wa neegûrû wanjîrîîtie agu Njorondani îthûngîrîte îriani, 6 na mwanka woyu watambûrûka mwanka Bethi-Ogira, na wacooka watara rûteere rwa n'egûrû rwa Bethi-Araba mwanka iigaani rîa Boani mwana wa Rubeni. 7 Kuuma agu mwanka ûyu wetiirie wakinya Ndebiri uumîîte kîbondeeni kîa Akori, wagarûka bwa îgûrû ûtarîîte Girigari, îra yeerekanîrîte na mwîtio wa Andumimu bwa iti ya kibonde. Mwanka woyu wacooka wakûrûka wakinya rûûyîîni rwa Eni-Semesi, na waumîîra Eni-Rongeri. 8 Rîru mwanka ûyu wakûrûkîîra kîbondeeni kîa Inomu, wataamba bwa iti ûtarîîte rwaruuni rwa Anjebusi t'yo Njerusaremu; na wathi wetia kûra îgûrû kîrîmaani kîra kîarî rûgombeni rwa kibonde kîa Inomu, uumîîrooni bwa riûa, mbarî ya bwa îgûrû mûthiani wa kîbonde kîa Refaimu. 9 Nau mwanka ûyu warutirwe kwanjîîria kîrîmaani kathûmbîri wendama wanka inyakaani bia Nebutoa na waumîîra taûniini ira ciarî akubî na kîrîma kîa Eburoni. Ûgûkinya agu wabîndûka ûtarîîte Baara t'yo Kiriathi-Njearimu. 10 Wacooka wakîîgama werekereete ûthwîro bwa riûa bwa Baara wakinya Kîrîmaani gîa Seiri, mîtûndûrûkooni ya neegûrû ya kîrîma kîa Njearimu ta kîo Kesaroni, na wendama wakinya Bethi-Semesi na wathi mwanka Timuna. 11 Mwanka woyu wauma agu, wathi waumîîra mwîndamooni wa Ekironi mbarî ya îgûrû, ûgûkinya agu waûndûka ûtarîîte bwa Sikeroni na kîrîmaani kîa Baara. Wakûrûkîîre bantû eetagwa Njabuneeri na wathûngîra Îriani. 12 Na mwanka wa mbarî ya ûthwîro bwa riûa, n'îkumbo rîa îria rîa Menditarîniani. Mîanka înu n'yo yathiûrûkîrîte antû ba Njunda kûringana na mariiko maao.Nthîgûrû îra yanenkeerwe mwîrîga wa Karebu
(Agiiti 1:11-15)
13 Njosua aanenkera Karebu mwana wa Njebune gacuncî kamwe ka nthîgûrû ya Njunda. Kwoogu Karebu aanenkerwa taûni ya Kiriathi-Ariba na riîtwa rîngî Eburoni. Ariba aarî kîûyûûyû kîa Anaki. 14 Karebu n'we eengatiirie aana bathatû ba Anaki bauma ku. Nabo baarî Sesai, Aimani, na Tarumai. 15 Kuuma agu aithûkîîre antû ba taûni ya Ndebiri îra agu mbereeni yeetagwa Kiriathi-Seferi. 16 Rîru Karebu n'we auga, “Muntû ûra agaatura taûni ya Kiriathi-Seferi na amîtae, n'we nkaanenkera mwarî wakwa Akisa amûgûre atuîke mwekûrû wake.” 17 Othinieri mwana wa Kenasi, mûruagina wa Karebu n'we aamîgwatire. Kwoogu Karebu n'we amwaa mwar'wake Akisa amûgûra. 18 Akisa akûgûrwa n'Othinieri, Akisa eerire Othinieri eere mûthonuue amwongeere kîthaka. Akisa akûgûrûka auma mûgongooni wa îng'ooi, îthe Karebu amûûria, “N'ata ûkwenda nkûrûthîra?” 19 Amûcookeria amwîra, “Inkwenda ûnthaarima. Na n'ûntû n'ûnenkerete nthîgûrû ya Negebu, îîndî ûkeegua wenda, nwa ûnenkere kinya gûntû kûrî na inyaka.” Kwoogu Karebu amwaa inyaka bira biarî mbarî ya bwa îgûrû na bira biarî mbarî ya bwa iti.
Taûni ira cianenkeerwe mwîrîga wa Njunda
20 Rûrû i ru rûgai rûra rwagaîrîîrwe antû ba Njunda kûringana na mariiko maao. 21 Taûni cia Njunda ira ciakîîtwe mîankaani ya Endomu ira ciarî mbarî ya bwa iti mûthiani cwe, ciarî Kabuseeri, Enderi, Njaguri, 22 Kîna, Ndimona, Andanda, 23 Kendesi, Asori, Ithinani, 24 Sibu, Teremu, Bearothi, 25 Asori-Andata, Keriothi-Esironi,b 26 Amami, Sema, Moranda, 27 Asari-Ganda, Esimoni, Bethi-Pereti, 28 Asari-Suari, Beeriseba, Bisiothia, 29 Baara, Rimu, Esemu, 30 Eritorandi, Cesiri, Orima, 31 Sikiragi, Mandimana, Sanisana, 32 Rebaothi, Siriimu, Aini, na Rimoni, cionthe ciarî taûni mîrongo îîrî na kenda, amwe na ntûûra cia cio.
33 Na taûni ira ciarî mwaranthî i Esitaori, Sora, Asina, 34 Sanoa, Eni-Nganimu, Tapua, Enamu, 35 Njarimuthi, Anduramu, Soko, Aseka, 36 Saaraimu, Andithaimu Ngendera, na Ngenderothaimu: cionthe ciarî taûni îkûmi na inya, amwe na ntûûra cia cio.
37 Ira ingî ciarî Senani, Andasa, Migindari-Gandi, 38 Ndireani, Misipe, Njokitheeri, 39 Rakisi, Mbosikathi, Egironi, 40 Kaboni, Ramasi, Kitirisi, 41 Ngenderothi, Bethi-Ndagoni, Naama, na Makenda: cionthe ciarî taûni îkûmi na ithanthatû amwe na ntûûra cia cio.
42 Ciingî ciarî: Ribuna, Etheri, Asani, 43 Ibutha, Asina, Nesibu, 44 Keira, Akisibu, na Maresa: cionthe ciarî taûni kenda amwe na ntûûra cia cio.
45 I kwarî na Ekironi, amwe na tûtaûni twayo na ntûûra ciayo, 46 na taûni na ntûûra cionthe ira irî akubî na Asindondi kuuma Ekironi mwanka îriani rîa Menditarîniani.
47 I kwarî na Asindondi na Gasa, irî na taûni na ntûûra cia cio ithiîte mwanka mwankaani wa Miisiri na îkumbo rîa îria rîa Menditarîniani.
48 Na taûni ira ciarî nthîgûrû îra yarî na irîma i: Samiri, Njatiri, Soko, 49 Ndana, Kiriathi-Sana na nwa yo Ndebiri, 50 Anabu, Esitemo, Animu 51 Ngoseni, Oroni, na Giro: cionthe ciarî taûni îkûmi na îmwe, amwe na ntûûra cia cio.
52 I kwarî na Arabu, Nduma, Esani, 53 Njanimu, Bethi-Tapua, Afeka, 54 Ûmuta, Kiriathi-Ariba nwa yo Eburoni, na Siori: cionthe taûni kenda, amwe na ntûûra cia cio.
55 Na i kwarî na Maoni, Karimeri, Sibu, Njuta, 56 Njesireeri, Njokindeamu, Sanoa, 57 Kaini, Ngibea, na Timuna; cionthe taûni îkûmi, amwe na ntûûra cia cio.
58 Na kaîrî i kwarî na Aruri, Bethi-Suri, Ngendori, 59 Maarathi, Bethi-Anothi, na Eritekoni: cionthe ciarî taûni îkûmi na îthanthatû, amwe na ntûûra cia cio.
60 Kaîrî i kwarî na Kiriathi-Mbaari na nwa yo Kiriathi-Njearimu na Raba: taûni ciîrî, na ntûûra cia cio.
61 Naagu rwanda, naku i kwarî na taûni ino: Bethi-Araba, Mindini, Sekaka, 62 Nibusani, taûni ya Mwonyo, na Eni-Gendi: cionthe taûni ithanthatû na ntûûra cia cio.
63 Îndî antû ba Njunda bataûmba kwîngatia Anjebusi, bara baatûûraga Njerusaremu. Wana îmunthî tûrî Anjebusi batûûraga amwe na antû ba Njunda.