Njosua 14

Kûgaanua kwa nthîgûrû ya Kanaani

1 Gûkû i ku gûntû kûra antû ba Isiraeri baanenkeerwe rûrî rûgai rwao ndeeni ya nthîgûrû ya Kanaani. Mûthînjîri wa Ngai Eriasari, Njosua mwana wa Nuni, na atongoria ba mîîrîga ya nthîgûrû ya Isiraeri baagaîra antû ba mîîrîga ya Isiraeri nthîgûrû înu. 2 Nthîgûrû yanenkanîîrwe kîrî mîîrîga înu kenda na nucu ya Isiraeri na njîra ya kûringa kuura wa ta bûra Mwathani aathîîte Musa. 3 Musa n'aarî akweyana nthîgûrû îra yarî uumîîrooni bwa riûa bwa muuro wa Njorondani kîrî mîîrîga îîrî na nucu. Ataagaîra Arawi nwa mbi. 4 Rûrîîyo rwa Njosebu rwagaanîîtue maita maîrî: Mwîrîga wa Manase na wa Eburaimu. Gûtirî kîo antû ba Arawi bagaîrwa, bantû akûgaîrwa nthîgûrû, baagaîrîîrwe taûni batûûra ku, na ithaka bia kûrîîthia ng'ombe na mbûri ciao. 5 Antû ba Isiraeri baagaanire nthîgûrû înu wa ta bûra Mwathani aathîîte Musa. 6 Ntugû îmwe antû bamwe kuuma mwîrîgaani wa Njunda i baayire kîrî Njosua naagu Girigari. Ûmwe wao, Karebu mwana wa Njebune ûra aarî Mûkenisi amwîra, “N'ûkûmenya bûra Mwathani eerire Musa, mûruti ngûgî wa Ngai îgûrû rîakwa na îgûrû rîaku naara Kandesi-Barinea. 7 Ndaarî na ûkûrû bwa mîanka mîrongo înna mûruti ngûgî wa Ngai Musa agîîntûma kuuma Kandesi-Barinea kûthigaana nthîgûrû înu. Nkûûya kuuma noogo ndamûreteere mantû wa ta bûra ndeegagua nkorooni yakwa. 8 Antû bara ndaathiire nabo i baatûmire antû beetû bamaka. Îndî niû i ndaathîkîîre Mwathani Ngai wakwa na nkoro yakwa yonthe. 9 N'ûntû bwa kûrûtha ûgu, Musa aaneenkera wîrane, ‘Na mma ga ngûkwîra bantû onthe ara ûkinyire na magûrû maaku, agaatuîka rûgai rwaku na aana baaku tene na tene, n'ûntû bwa kwathîkîra Mwathani Ngai waku na nkoro yaku yonthe.’ 10 Ta raitha îîndî wone, mîanka mîrongo înna na îtaano n'îmîthiru kuuma Mwathani akwîra Musa mantû mamu. Rîru n'îgiita rîra antû ba Isiraeri baakûrûkîîrîîte ng'arûûni îtarî rûûyî, na wa ta bûra Mwathani eeranîîte, n'ambaigîîte mwoyo kuuma rîru. Ta ndaitha ûmbone! Ndî na ûkûrû bwa mîanka mîrongo înaana na îtaano îmunthî. 11 Wana îmunthî tûrî inya îra ndî n'yo, nwa ta îra ndaarî n'yo ntugû îra Musa aantûmaga. Ndî na inya ya kûgana ya kûthi ndûani wa ta ntugû inu. 12 Kwoogu îîndî nnenkera nthî îno ya irîma îra Mwathani aanenkeere wîrane bwa yo ntugû îra. Wou wengwa n'wegiirue atî Aanaki i baarî ku na taûni ciao bûra ciairigîîtwe na nthingo cia maiga: nwa wîgue Mwathani akeegua arî amwe naani na nkeengatia Aanakimu baume ku wa ta bûra Mwathani augire.” 13 Rîru Njosua aathaarima Karebu mwana wa Njebune na amûgaîra taûni ya Eburoni rûrî rûgai rwake. 14 Kwoogu taûni ya Eburoni wana îmunthî tûrî n'ya rûrîîyo rwa Karebu mwana wa Njebune Mûkenisi, n'ûntû bwa kwathîkîra Mwathani, Ngai wa Isiraeri na nkoro yake yonthe. 15 Mbereeni Eburoni yetagwa Kiriathi-Ariba. Ariba n'we aarî ûmûnene nkûrûki ya antû bonthe ba Anaki.

Na nthîgûrû înu yathira ndûa yagîa na ûkiri.