Nthîgûrû îra îtigeere îtarî nthûkie
13
1 Rîra Njosua aarî agûkûra mûno, Mwathani amwîra, “Ûgûkûra mûno, na kûrî gûntû kûûnene mma gûtigeere gûtarî kûthûkie. 2 Îno n'yo nthîgûrû îra îtigeere: nthî yonthe ya Afirisiti na ya Angesuri 3 yanjîîrîîtie kuuma muurooni wa Siori, îra îrî mbarî ya umîîro bwa riûa bwa Miisiri, kûthi bwa îgûrû gûkinya mwankaani wa Ekironi n'yo îtaragwa îrî ya Akanaani (nthîgûrû ya anene bataano ba Afirisiti nabo baathanaga Gasa, Asindondi, Asikeroni, Ngathi, na Ekironi, kûra watûûraga Aabimu). 4 Kuuma bwa naiti nthîgûrû yonthe ya Kanaani, na Meara ya Asindoni, werekereete Afeki, mwanka mwankaani wa Amori. 5 Nthîgûrû înu yonthe ya Angebari, na ya Rebanoni yonthe, kwerekera mbarî ya umîîro bwa riûa, kuuma Mbaari-Gandi mwaranthî wa kîrîma kîa Erimoni mwanka mwîrîgaani wa Amathi. 6 Nthîgûrû îno n'amwe na nthîgûrû ya Asindoni bara batwîre nthîgûrû ya irîma îra îrî gatîgatî ka irîma bia Rebanoni na Misirefothi-Maimu. Niû ningwa nkeengatia antû babu bonthe baume ku wa bûra Aisiraeri bakaathi mbere kûûya. Nwa mwanka ûgaanîrie antû ba Isiraeri nthîgûrû îno îtuîke yao, wa ta bûra ndaakwathîîte ûrûthe. 7 Kwoogu, ûcooke ûmîgaanie kîrî mîîrîga înu îîngî kenda na kîrî nucu ya mwîrîga wa Manase.”Kûgaanua kwa nthîgûrû ya mbarî ya umîîro bwa riûa bwa Njorondani
8 Mwîrîga wa Rubeni na wa Ngandi na nucu îra îîngî ya mwîrîga wa Manase bo ibaarî bakwegwa rûgai rwao rûra baagaîrîîrwe i Musa mûruti ngûgî wa Mwathani. Nthîgûrû înu beerwe yarî uumîîrooni bwa riûa bwa muuro wa Njorondani. 9 Nthîgûrû yao yanjîîrîîtie kuuma Aroeri mûthiani wa kîbonde kîa Arinoni, na taûni îra îrî gatîgatî ga kibonde, amwe na nthîgûrû ya rûtunguru yonthe kuuma Mendeba mwanka Ndiboni. 10 Nthîgûrû yao yathiîte mwanka taûniini cionthe cia Sioni mûnene wa Aamori, ûra aathanaga arî Esiboni, gûkinya mwankaani wa Amoni. 11 Na kinya Ngiriandi, nteere cia Ngesuri, Maakathi, kîrîma kîa Erimoni kîonthe, na Mbasani yonthe mwanka gûkinya Sareka, 12 na kûra kunthe kwathagwa i mûnene Ogu ndeeni ya Mbasani, ûra aathanaga Asitarothi na Endirei. Nwa we wenka aatigarîîte wa Refaimu. Musa n'aarî akûbatura abeengatia bauma ku. 13 Amwe na ûgu, antû ba Isiraeri bateengatia antû ba Ngesuri na ba Maakathi, wana îmunthî tûrî nwa batûûraga nthîgûrû ya Isiraeri.
14 I kîrî mwîrîga wa Arawi unka akî Musa ateeyana nthîgûrû îrî rûgai. Banenkeerwe igongwana bira biabîîthagîrua Mwathani Ngai wa Isiraeri kîthînjîrooni, birî rûgai rwao wa ta bûra Mwathani aaberîrîte.
Nthîgûrû îra yanenkeerwe mwîrîga wa Rubeni
15 Musa n'we n'eeyanire rûgai rwa nthîgûrû kîrî mwîrîga wa Rubeni kûringana na mariiko maao. 16 Nthîgûrû yao yanjîîrîîtie kuuma Aroeri, îra îrî rûteere rwa kîbonde kîa Arinoni, na taûni îra îrî gatîgatî ga kîbonde, amwe na nthîgûrû îra mbaranîru yonthe îra yankanîîte na Mendeba. 17 Wa amwe na Esiboni na taûni cionthe ira irî nthîgûrû înu mbaranîru, ta cio: Ndiboni, Mbamothi-Mbaari; Bethi-Baari-Meoni, 18 Njaasa, Kendemothi, Mefaathi, 19 Kiriathaimu, Sibuma, na Serethi-Saari îra îrî karîmaani îgûrû rîa kîbonde gîku, 20 Bethi-Peori, mîtûndûrûkooni ya Pisiga, na Bethi-Njesimothi. 21 Nthîgûrû înu n'amwe na taûni cionthe ira ciarî rûtunguruuni, gîteere kîonthe kîra kîathagwa kuuma taûni ya Esiboni i Sioni mûnene wa Aamori. Musa n'aamûturîîte amwe na anene ba Mindiani bara batûûraga nthîgûrû înu. Atongoria baba i Ebi, Rekemu, Suri, Uri, na Reba, bonthe baathagwa i mûnene Sioni na baatûûraga nthîgûrû yake. 22 Mbaraamu ûra aarî mûringia, mwana wa Mbeori aarî ûmwe wa antû bara baûragirwe n'antû ba Isiraeri. 23 Na mwanka wa antû ba Rubeni warî muuro wa Njorondani. Rûrû rwarî rûgai rwa antû ba Rubeni, kûringana na mariiko maao amwe na taûni na ntûûra ciao.
Nthîgûrû îra yanenkeerwe mwîrîga wa Ngandi
24 Na Musa eeyana rûgai kinya kîrî mwîrîga wa Ngandi kûringana na mariiko maao. 25 Banenkeerwe nthîgûrû ya Njaseri, na taûni cionthe cia Ngiriandi, na nucu ya nthî ya Amoni, mwanka gûkinya Aroeri, îra îrî mbarî ya umîîro bwa riûa bwa Raba. 26 Yanjîîrîîtie kuuma Esiboni mwanka Ramathi-Misipe na Betonimu na kuuma Maanaimu kûthi mwanka nthî ya Ndebiri. 27 Amwe na taûni cia Bethi-Aramu, Bethi-Nimura, Sukothi, na Safoni ira ciarî kîbondeeni, na moonene mara mangî maarî ma Sioni mûnene wa Esiboni. Muuro wa Njorondani n'uu warî mwanka wa mbarî ya umîîro bwa riûa, ûra ûthiîte ûgakinya bwa rûteere rwa îgûrû mwanka îriani rîa Kinerethi. 28 Taûni inu na ntûûra inu i cio cieyanirwe irî rûgai kîrî mariiko ma mwîrîga wa Ngandi.
Nthîgûrû îra yanenkeerwe mwîrîga wa Manase
29 Musa n'eeyanire rûgai rwa nthîgûrû kîrî nucu ya mwîrîga wa Manase kûringana na mariiko maao. 30 Nthîgûrû yao yanjîîrîîtie kuuma Maanaimu, gûkûrûkîîra Mbasani kunthe, ûneneeni bunthe bwa mûnene Ogu wa Mbasani, na ntûûra cionthe cia Njairi, ira irî Mbasani. Nacio ciarî mîrongo îthanthatû. 31 Amwe na nucu ya Ngiriandi, na Asitarothi, na Endirei, taûni cia wathani bwa Ogu gûku Mbasani; taûni inu cionthe ciagaîrîîrwe antû ba Makiri mwana wa Manase, kûringana na mariiko maao.