Anene bara baacindirwe i Musa
12
1 Baba i bo anene ba mbarî ya umîîro bwa riûa bwa muuro wa Njorondani bara baaturirwe na bara nthî yao yathûkiirue n'antû ba Isiraeri. Baathanaga kuuma kîbonde kîa Arinoni mwanka kîrîmaani kîa Erimoni, amwe na Araba kunthe kwerekera mbarî ya umîîro bwa riûa: 2 Sioni mûnene wa Amori, aathanaga arî Esiboni. Aathanaga kwanjîîria Aroeri îkumbo rîa muuro wa Arinoni kîbondeeni, mwanka muurooni wa Njaboku, mwankaani wa antû ba Amoni. Înu i kîringanîra na nucu ya Ngiriandi. 3 Kinya n'aathaga gîteere kîa umîîro bwa riûa kîa Araba kwanjîîria îriani rîa Kinerethi kûthi mwanka Îria rîa Mwonyo, mwanka Bethi-Njesimothi, na kaîrî kwîndama kûthi bwa naiti ya mîtûndûrûko ya Pisiga.4 Mûnene ûra ûngî aarî Ogu wa Mbasani, ûra aarî ûmwe wa bara baatigarîîte ba Arefaimu, aathanaga arî Asitarothi na Endirei. 5 Aathanaga kîrîmaani kîa Erimoni na Sareka na Mbasani kunthe gûkinya mwankaani wa Ngesuri na Maakathi na nucu ya gîcuncî kîa Ngiriandi agîkinyaga mwankaani wa Sioni mûnene wa Esiboni. 6 Musa, mûruti ngûgî wa Mwathani, na antû ba Isiraeri i baarî bakûbatura, na Musa mûruti ngûgî wa Mwathani aanenkanîra nthî ya antû babu kîrî Arubeni na kîrî Angandi na kîrî nucu ya mwîrîga wa Manase.
Anene ba mbarî ya ûthwîro bwa riûa bara Njosua aaturire
7 Na baba i bo anene ba nthî ira Njosua na antû ba Isiraeri baaturire mbarî ya ûthwîro bwa riûa bwa muuro wa Njorondani, kuuma Mbaari-Gandi kibonde kîa Rebanoni mwanka kîrîmaani kîa Araki, kîra gîtîîtie bwa Seiri. Njosua eeyanire nthî îno kîrî mîîrîga ya Isiraeri kûringana na rûgai rwao, 8 amwe na nthî ya irîma, mwaranthî, Araba, îra îrî gûntû kwa mîtûndûrûko, gûntû rwanda rûtarî antû, na Negebu. Antû bara baatûûraga gûntû gûkû baarî Aiti, Aamori, Akanaani, Aperisi, Aibi, na Anjebusi. 9 Antû ba Isiraeri baaturire anene ba taûni ino igweteetwe aaga:
mûnene ûmwe wa Njeriko;
mûnene ûmwe wa Ai, îra îrî akubî na Betheri,
10 mûnene ûmwe wa Njerusaremu;
mûnene ûmwe wa Eburoni;
11 mûnene ûmwe wa Njarimuthi;
mûnene wa Rakisi;
12 mûnene ûmwe wa Egironi;
mûnene ûmwe wa Ngeseri;
13 mûnene wa Ndebiri;
mûnene ûmwe wa Genderi;
14 mûnene ûmwe wa Orima;
mûnene ûmwe wa Arandi;
15 mûnene ûmwe wa Ribuna;
mûnene ûmwe wa Anduramu;
16 mûnene ûmwe wa Makenda;
mûnene ûmwe wa Betheri;
17 mûnene ûmwe wa Tapua;
mûnene ûmwe wa Eferi;
18 mûnene ûmwe wa Afeki;
mûnene ûmwe wa Rasaroni;
19 mûnene ûmwe wa Mandoni;
mûnene ûmwe wa Asori;
20 mûnene ûmwe wa Simuroni Meroni;
mûnene ûmwe wa Akisabu,
21 mûnene ûmwe wa Taanaki;
mûnene ûmwe wa Megindo;
22 mûnene ûmwe wa Kendesi;
mûnene ûmwe wa Njokineamu îra îrî Karimeri
23 mûnene ûmwe wa Ndori ndeeni ya Napothi-Ndori;
mûnene ûmwe wa Goyimu ndeeni ya Girigari;
24 mûnene ûmwe wa Tirisa.
Bonthe baarî anene mîrongo îthatû na ûmwe.