Samweri aatûûrîria Ndaundi maguta atuîka mûnene wa Isiraeri
16
1 Mwathani aûria Samweri ata rî, “I mwanka rî ûkaarîrîra Saûrû? Iimûregeete atuîka mûnene wa Isiraeri. Ûyûria rûgoci rwaku maguta ngûtûme Bethireemu kwa Njesii. I ndîîthuurîrîte ûmwe wa nthaka ciake atuîka mûnene.” 2 Samweri aûria, “N'ata nkaathiyanga? Saûrû akaaya kwîgua akambûraga.” Mwathani amwîra, “Thûkia moori ya ng'ombe ûthi n'yo uuge, ‘Indaaya kûrutîra Mwathani kîgongwana.’ 3 Ûthookie Njesii kîgongwanaani gîku rîru ngakwonia bûra ûkaarûtha. Ûgaatûûrîria ûra ngakûonia maguta.”4 Samweri aarûtha wa bûra Mwathani aamwîrîîte. Rîra aakinyire Bethireemu, akûrû ba taûni înu bamûthagaana bakîthetemaga, bamûûria, “Ûûyîîte na wega?” 5 Samweri abacookeria abeera, “Yîî, mbûyîîte na ûkiri kûrutîra Mwathani kîgongwana. Îîtherieni na bûthiiyanie naani kîgongwanaani.” Rîru aatheria Njesii na nthaka ciake na abathookia kîgongwanaani.
6 Rîra baayire, akûona Eriabu eebîîrire na nkoro, “Waabu mwîtûûrîrua maguta wa Mwathani n'ûyû.” 7 Îndî Mwathani eera Samweri, “Ûtikaaraithe ûthongi kana mûrûngamo wake, n'ûntû i mûregeete. Mwathani atiraithaga ta bûra muntû araithaga, n'ûntû muntû araithaga ome Mwathani n'we akaraitha nkoro ndeeni.” 8 Rîru Njesii eeta Abinandabu, amûkûrûkîîria mbere ya Samweri. Îndî Samweri auga, “Wana kinya ûyû, Mwathani atimûthuurîîte.” 9 Rîru Njesii areeta Sama amûkûrûkîîria mbere ya Samweri îndî Samweri auga, “Wana kinya ûyû, Mwathani atimûthuurîîte.” 10 Njesii aakûrûkîîria nthaka ciake mûgwanja mbere ya Samweri, îndî Samweri auga, “Gûtirî we Mwathani athuurîîte kîrî baba.” 11 Samweri aûria Njesii, “Ino n'wa cio nthaka ciaku cionka?” Njesii amûcookeria amwîra, “Arî, kûrî na kangî kaniini, îndî i ko karîîthîîtie ng'ondu.” Samweri eera Njesii, “Tûmana eetwe aaye n'ûntû tûtiikara nthî mbere atirakinya.” 12 Kwoogu Njesii aatûmana Ndaundi aaya na amwira mbere ya Samweri. Aarî ûmûtuune, ûthiû bwega na ûmûthongi akîoneka. Mwathani eera Samweri, “Ûkîîra ûmûtûûrîrie maguta n'ûntû n'ûyû.” 13 Samweri aathûkia rûgoci rwa maguta, na amûtûûrîria aruagina bakionaga, na Kîrundu wa Mwathani endamîîra Ndaundi nainya mûno kuuma ntugû înu kûthi bwa mbere. Samweri auma agu aathi bwa Rama.
Ndaundi arî nyomba ya Saûrû
14 Kîrundu wa Mwathani auma kîrî Saûrû, na kîrundu kîîthûûku kuuma kîrî Mwathani gîatua kûmûnyamaaragia. 15 Aruti ngûgî ba Saûrû bamwîra, “Itûkwona i kîrundu kîîthûûku kuuma kîrî Ngai gîgûkûnyamaaria. 16 Îîndî mwathi wetû, atha ateetheeria baaku baba barî aaga bacerie muntû wiyî kûringa wandîndî ya ndigi imbingî bwega, kaingo rîra kîrundu kîthûûku kuuma kîrî Ngai gîgakûûyagîîra akaringa wandîndî ya ndigi imbingî ûkeegua bwega.” 17 I rîo Saûrû eerire ateetheeria baake, “Itû ncereriani muntû wiyî kûringa wandîndî ya ndigi imbingî bwega, bûûndetere.” 18 Mûruti ngûgî ûmwe acookia auga, “Inkûmenya nthaka îmwe ya Njesii wa naara Bethireemu wiyî kûringa wandîndî ya ndigi imbingî. Îrî ûcamba na aiyî kûrûa. Aaragia bwega na ûmûthongi. Na Mwathani arî amwe n'we.” 19 Saûrû aatûma atûmwa baake kîrî Njesii amwîra, “Ntûmîra nthaka yaku Ndaundi îra îrîîthagia ng'ondu îîye naaga gwakwa.” 20 Njesii aathûkia îng'ooi arîaîkia mîgaate na îthatwa rîa ndibei na kabûri kaniini. Eera Ndaundi airîre Saûrû. 21 Ndaundi agûkinya gwa Saûrû na aanjîîria kûmûrutîra ngûgî, Saûrû amwenda mûno na amûtuîkithia mûkamati wa mathaga maake ma ndûa. 22 I rîo Saûrû atûmanire kwa Njesii amwîra, “Îtîgîîria Ndaundi akare naaga n'ûntû i mwendeete.” 23 Na wa rionthe rîra kîrundu kîîthûûku kuuma kîrî Ngai kîendamaga kûnyamaaria Saûrû, Ndaundi aathûkagia wandîndî ya ndigi imbingî akanjîîria kûringa, kîrundu gîku gîgatigana na Saûrû na akeegua bwega.