Ndaundi na Ngoriathi
17
1 Afirisiti i baûnganiirie njûûrî ciao ithi kûrûa, beethîrana Soko taûni ya Njunda na baaka kambî yao Efesi-Ndamimu gatîgatî ga Soko na Aseka. 2 Saûrû na njûûrî ya Isiraeri nabo beethîrana baaka kambî yao kîbondeeni kia Era na beebîthîrania kûrûa na Afirisiti. 3 Afirisiti beebanga karîmaani rûteere rûmwe na Aisiraeri nabo beebanga karîmaani rûteere rûra rûngî, na kîguruma i kîarî gatîgatî. 4 Kwaumîîra ncamba înene ya ndûa kambîîni ya Afirisiti yeetagwa Ngoriathi yarî na ûraaya bwa nkûrûki ya biiti kenda. Yaarî ya kuuma taûni ya Ngathi. 5 Yeekîrîîte nkoobia ya rûthuku kîongo na mwîrî eekîra nguo ya rûthuku yarî na ûrito bwa kiirû mîrongo îtaano na mûgwanja.a 6 Magûrû maake imaakunîkîrîîtwe na rûthuku, na aakamata mûthîrî wa rûthuku aucuurîîtie gîturo. 7 Na mûtî wa kîano gîa îtumo rîake waagana ta mûtî wa mûtumi wa nguo. Îtumo rîongwa rîarî na ûrito bwa kirob mûgwanja. Mûkamati wake wa rong'o aathiiyaga arî mbere yake. 8 Ngoriathi aumîîra augîîria Aisiraeri akîbeeraga, “N'ata bûkûrûtha agu îîndî, bwîbanganîîtie ta bûthiîte kûrûa? Niû ndî Mûfirisiti naabi bûrî aruti ngûgî ba Saûrû! Thuuraani ncamba yenu îra îkeendama îrûe naani. 9 Ûkaaya kwîgua agaankîria inya ambûrage tûgaatuîka nkombo cienu, îndî nkaaya kûmûkîria inya nkamûûraga, bûgaatuîka nkombo cietû bûtûrutagîre ngûgî.” 10 Mûfirisiti ûyu auga, “I nkûruma njûûrî ya Isiraeri îmunthî, rutaani muntû ndûe n'we.” 11 Rîra Saûrû na njûûrî yonthe ya Isiraeri yegiirue ûgu, yagwatwa n'ûguaya mûno.12 Ndaundi aarî mwana wa Njesii, Mûeburathi wa kuuma Bethireemu ya Njunda. Njesii aarî na nthaka înyaanya. Ntugûûni inu cia wathani bwa Saûrû Njesii n'arî agûkûra mûno. 13 Aana ba Njesii bathatû, ûra mûkûrû Eriabu, wa baîrî Abinandabu, na wa bathatû Sama i baarî bakûthiiyania na Saûrû ndûani. 14 Ndaundi n'we aarî mûniini, babu bakûrû bathatû i baarî bakûthingata Saûrû. 15 Ndaundi we aathiiyaga gwa Saûrû na agacooka Bethireemu kûrîîthia ng'ondu cia îthe.
16 Mûfirisiti ûyu aumagîîra akeebonania kîrî Aisiraeri ntugû mîrongo îna rûkîîrî na ûgoro.
17 Ntugû îmwe Njesii eera mwana wake Ndaundi ata rî, “Thûkia efa îmwe ya irio bikarangîîtwe na rûgîo na mîgaate îno îkûmi wirîre aruanyûkwe naara kambîîni na mpwî. 18 Na wirîre mûtongoria wa gîkundi kîao gîa acikaarî ngiri irebûrû bibi îkûmi bia maguta ma rûthuko maûmithie. Wone bûra aruanyûkwe bakari ûcooke ûûmenyithie na ûûye na gîntû gîa kwonania barî oogo. 19 Baarî na Saûrû na njûûrî ya Isiraeri yonthe kîbondeeni kia Era bakîrûaga na Afirisiti.”
20 Ndaundi aaraûka gûkîîra rûkîîrî aatiga ng'ondu irî na mûrîîthi, aathûkia into bionthe bira îthe Njesii aamwathîîte aathi. Aakinyire kambîîni eethîra warîra njûûrî ya Isiraeri yuumagarûkîîte îthiîte mbarî îra bakaarûa barî îkiinaga nyîmbo cia ndûa. 21 Aisiraeri na Afirisiti baumanîîra wa njûûrî yerekereete îra îîngî. 22 Ndaundi aatiga into bira aarî nabio kîrî mûmenyeeri wa into augia rwîro naara acikaarî baarî, aakeethia aruagina. 23 Ndaundi akîaragia na aruagina woogu, ncamba ya Afirisiti înu yetagwa Ngoriathi yaumîîte Ngathi yaumîra njûûrîîni ya Afirisiti na yaaria wa bûra yaaragia. Ndaundi amwîgua. 24 Rîra antû ba Isiraeri boonire muntû ûyu baugia bamûkuthûka. 25 Antû bonthe ba Isiraeri beerana, “Bûkwona muntû ûyu aumîîra agu? Wabu ariumîîrîîte aruma Isiraeri. Muntû ûra akaamûûraga mûnene akamwaa ûtonga bwingî mûno na amûnenkere mwarî wake na atuîkithie mûciî wa îthe ûmûthaûre mantûûni ma ûgooti bwa Isiraeri.” 26 Ndaundi aûria bara arûngi nabo, “Muntû ûra akaûraga Mûfirisiti ûyû î, n'ata akaarûthîrwa, ûra akaaruta îgi rîrî kîrî Isiraeri? Ka mwîyî ûyû Mûfirisiti arî ûû, akûruma njûûrî ya Ngai ûra atûûraga mwoyo?” 27 Antû bamwîra bûra gûkaarûthwa kîrî muntû ûra akaamûûraga.
28 Îîndî Eriabu mûruagina ûra mûkûrû eegua rîra Ndaundi aaragia na antû aankanwa i mûthûûro nwe amûûria, “I mbi wîndamîrîîte naaga? Ng'ondu ira na wegua n'inkai n'ûû ûtigîîre rwanda? Imbiyî wîkumia na ûthûûku bwa nkoro yaku, n'ûntû wîndamîîte kwona ndûa.” 29 Ndaundi aûria, “Ka ndaarûtha ata? Ga ntaûmba nwa kûûria kîûria?” 30 Aûndûka eerekera muntû ûngî amûûria kîûria wa gîku, na antû bonthe bamûcookeria kaîrî wa bûra.
31 Rîra antû beegiirue ntheto inu Ndaundi aariirie beera Saûrû, n'we aatûma muntû athi kûmwîta. 32 Ndaundi eera Saûrû ata rî, “Gûtikaagîte muntû akua nkoro n'ûntû bwa muntû ûyû, niû mûruti ngûgî waku nkaathi kûrûa na Mûfirisiti ûyû.” 33 Saûrû eera Ndaundi ata rî, “Ûtiûmba kûrûa na Mûfirisiti ûyû n'ûntû ûrî kaana, n'we i muntû wa ndûa kwanjîîria wîthî bwake.” 34 Îndî Ndaundi amûcookeria amwîra, “Niû mûruti ngûgî waku ntûûraga kûrîîthia ng'ondu cia baaba, na rîra cimba kana ndûba ciayaga ikagwata ng'ondu ûrîîthiini, 35 ndeenganaga n'yo nkamîringa na ngatuunyûkia ng'ondu kuuma kanyuani ga cimba na îkîngarûkîra ndaamîgwataga ruuri nkamîringa na nkamîûraga. 36 Mûruti ngûgî waku naûragîîte cimba na ndûba, kwoogu wana kinya mwîyî ûyû Mûfirisiti nkamûrûtha ta îmwe yacio, n'ûntû narumîîte njûûrî ya Ngai ûra atûûraga mwoyo. 37 Mwathani ûra ambonokiirie kuuma nkunyûûni cia cimba na ndûba, akambonokia njaraani cia Mûfirisiti ûyû.” Saûrû eera Ndaundi, “Îthi na Mwathani akeegua arî amwe naawe.” 38 Rîru Saûrû aakundîka Ndaundi mathaga maake ma ndûa amwîkîra nkoobia ya rûthuku na amwîkîra îgooti rîa îthaga. 39 Ndaundi ekundîka rûûyiû îgûrû rîa into bibu ageria kûthi bwarema n'ûntû ataabimenyereetie. Ndaundi eera Saûrû, “Ntiûmba kûthi na into bibi n'ûntû ntibimenyereetie.” Aaruta. 40 Rîru aathûkia mûraagi wake aacooka ooya maiga mataano maatenderu agu kaurooni eekîra kathetiini gaake kara aarîîthagia nako, arî na gîkûtha gîake njaraani aathiiyanga akubî na Mûfirisiti.
41 Nwe Mûfirisiti ûyu amwe na mûkamati wake wa rong'o atongoreetie nwaka ayaangîîte akubî na Ndaundi. 42 Rîra Mûfirisiti ûyû aaraithire oona Ndaundi amûbûthia mûno, n'ûntû kaarî kaana kaniini, gaatuune na kaathongi gakîoneka. 43 Mûfirisiti aûria Ndaundi, “Ka ndî kurû n'ûntû ûmbumîîrîîte na kamûtî?” Mûfirisiti aaruma Ndaundi akîrabaga ngai ciake. 44 Mûfirisiti eera Ndaundi, “Ncû aaga wone wegua nyama ciaku ntikuinenkera nyoni na nyamû cia kîthaka.” 45 Îndî Ndaundi aacookeria Mûfirisiti amwîra, “Ûmbumîîrîîte na rûûyiû, îtumo na mûthîrî, naani mbûyîîte na riîtwa rîa Mwathani wa Njûûrî, Ngai wa Njûûrî cia Isiraeri ira ûkûruma. 46 Îmunthî Mwathani agakûnenkanîra njaraani ciakwa nkûûrage, nkûgiite kiongo, na biimba bia njûûrî ya Afirisiti îmunthî nkabinenkanîra kîrî nyoni na nyamû cia kîthaka, kaingo nthîgûrû îmenya kûrî Ngai Isiraeri. 47 Na kaingo antû bonthe bara beethîranîîte aaga bamenya atî Mwathani atitûmagîra rûûyiû kana îtumo kûûmbana, n'ûntû ndûa îno n'ya Mwathani akabûnenkanîra njaraani cietû.”
48 Rîra Mûfirisiti aayaangire akubî Ndaundi augia rwîro eerekereete ara kûrûagîrwa kaingo akomana n'we. 49 Ndaundi aira njara kathetiini aruta iiga arîîkîra gîkûthaani, arîgera rîaringa kîreera kîa Mûfirisiti. Aagwa nthî na nda. 50 Ndaundi acinda Mûfirisiti amûûraga na iiga rîa gîkûtha. Ndaundi ataarî na rûûyiû njaraani ciake.
51 Ndaundi augia rwîro aarûngama îgûrû rîa Mûfirisiti, aakûûra rûûyiû rwa Mûfirisiti ûyu amûgiita naru kiongo. Afirisiti bakwona ncamba yao îgûkua baugia rwîro baakuthûka. 52 Antû ba Isiraeri na Njunda baûkîîra bagîkururaga beengana na Afirisiti mwanka Ngathi na mîgaani ya Ekironi. Afirisiti bara bonthe baûragîîtwe baanyageere njîraani kuuma Saaraimu kûthi Ngathi mwanka Ekironi. 53 Rîra antû ba Isiraeri baacookire nyuma ya kwîngana na Afirisiti nainya mûno, baataire into bionthe bira biarî kambîîni ya Afirisiti. 54 Ndaundi aathiire na kîongo kîa Mûfirisiti ûyu aacooka akiira Njerusaremu. Îndî into biake bia ndûa aiga îremaani rîake.
55 Rîra Saûrû oonire Ndaundi athiîte gûkomana na Mûfirisiti ûra, aûria Abuneri mûtongoria wa njûûrî ata rî, “Mûthaka ûyû i mwana waû?” Abuneri amûcookeria amwîra, “Mûnene, wa ta bûra ûtûûraga mwoyo ntikûmenya.” 56 Mûnene amwîra, “Îthi ûmenye mwana ûra n'waû!” 57 Rîra Ndaundi aacookeete akûrîîkia kûûraga Mûfirisiti, Abuneri amûthûkia amwira kîrî Saûrû na kîongo kîa Mûfirisiti akamatîîte. 58 Saûrû amûûria, “Ûrî mwana waû?” Ndaundi amûcookeria amwîra, “Ndî mwana wa mûruti ngûgî waku Njesii wa kuuma Bethireemu.”