1 Samweri 18

Ûcoore bwa Njonathani na Ndaundi

1 Ndaundi akûthiria kwaria na Saûrû nkoro ya Njonathani yamwenda mûno. Njonathani eendire Ndaundi ta bûra eebendeete wengwa. 2 Kuuma ntugû înu Saûrû aiga Ndaundi na ataamwîtîgîîria acooka kwa îthe. 3 Njonathani aiga kîrîîkanîro na Ndaundi n'ûntû n'amwendeete wa bûra eebendeete wengwa. 4 Njonathani aruta nguo yake îra ndaaya eekîrîîte aanenkera Ndaundi, na aacooka amûneenkera into biake bia ndûa, rûûyiû, ûta na mûcibi.

Saûrû eegua rûriitho n'ûntû bwa kûûmbana kwa Ndaundi

5 Ûntû bunthe bûra Ndaundi aatûmagwa i Saûrû kûrûtha aaburûthaga bwega mûno, mwanka Saûrû amûtuîkithia mûtongoria njûûrîîni yake ya ndûa. Ûntû bûbû bwoneka bûrî bwega mûno n'antû bonthe na kinya atongoria ba acikaarî ba Saûrû.

6 Rîra acikaarî baacookeete baumîîte kûrûa na Afirisiti na Ndaundi akûûraga Ngoriathi, eekûrû bauma taûni cionthe cia Isiraeri bakiinaga na bakîgoyagia bakîriingaga tamburini na inanda bathagaanîîte Saûrû. 7 Bainaga bakiugaga, “Saûrû akûûraga magiri maake, îndî Ndaundi akûûraga makûmi ma magiri.” 8 Saûrû aathûûra mûno; rwîmbo rûru rwamûthûûria mûno, aûria, “Î bariuga Ndaundi aûraga makûmi ma magiri, naani magiri, i mbi îîngî îtigeere îîndî tatiga kûmûthuura mûnene?” 9 Na kuuma ntugû înu Saûrû anjîîria kwîgîîrua Ndaundi rûriitho.

10 Rûûni rûkîîrî, kîrundu kîîthûûku kuuma kîrî Ngai kîathûngîra Saûrû anjîîria kwarûrûka ta muntû arî na nkoma arî nyomba agwete îtumo na njara. Ndaundi n'we naaringaga kînanda gîake wa bûra aarûthaga ntugû ira ciingî. 11 Saûrû aagera Ndaundi îtumo maita maîrî akîthûgaanagia akamûmuntanîria na rûthiingo îndî Ndaundi eebera maita maîrî woogu. 12 Saûrû akuthûka Ndaundi n'ûntû Mwathani n'arî amwe n'we, îndî n'arî agûtiga Saûrû. 13 Kwoogu Saûrû aarutaruta Ndaundi aakubî n'we amûtuîkithia mûtongoria wa acikaarî ngiri. Ndaundi n'we aatongoragîîria njûûrî yake ndûani. 14 Ndaundi n'aûmbanaga mantûûni maake monthe, n'ûntû Mwathani n'arî amwe n'we. 15 Rîra Saûrû oonire bûra Ndaundi akûûmbana mantûûni maake monthe amûkuthûka mûno. 16 Îndî Isiraeri bonthe na Njunda i beendeete Ndaundi mûno n'ûntû nwe aatongoragîîria njûûrî yake ndûani.

Ndaundi aagûra mwarî wa Saûrû

17 I rîo Saûrû eerire Ndaundi ata rî, “N'ûyû mwarî wakwa ûra mûkûrû eetagwa Merabu; ngakûnenkera we atuîke mwekûrû waku; bunka akî ndutîra ngûgî na ûcamba na ûrûe ndûa ya Mwathani.” Saûrû aathûgaanagia nkorooni yake, “Niû ntimûringithia na njara ciakwa îndi nakaûragwe n'Afirisiti.” 18 Ndaundi acookeria Saûrû amwîra, “Niû ndî ûû, kana mûciî wetû i baaû mwîrîgaani wa baaba ndeeni ya Isiraeri kaingo mbûmba gûtuîka mûthoni wa mûnene?” 19 Îndî rîra kagiita gaakinyire ka Merabu mwarî wa Saûrû kûnenkanîrwa kîrî Ndaundi, aanenkanîîrwe kîrî Andirieri ûra warî Mûmeora. 20 Îndî mwarî wa Saûrû ûra eetagwa Mikari we neendaga Ndaundi, rîra Saûrû eegiirue ntheto inu aakena. 21 Saûrû aathûgaania nkorooni yake auga, “I nkûmûnenkera Mikari atuîke mûtego kîrî we kaingo aûragwa n'Afirisiti.” Kwoogu Saûrû eera Ndaundi rîa maîrî, “Îmunthî ûgaatuîka mûthonua.” 22 Saûrû aatha aruti ngûgî baake ata rî, “Ariani na Ndaundi na witho bûmwîre ûûgû, ‘Mûnene n'akeneete i woû, na kinya aruti ngûgî baake bonthe i bakwendeete; tuîka mûthonuue.’ ” 23 Aruti ngûgî ba Saûrû beera Ndaundi ntheto inu, abaûria, “Ka bûkwona ta ûntû bûûthû gûtuîka mûthoni wa mûnene ûrî nkîa na muntû ûtarî îgweta ta niû?” 24 Aruti ngûgî ba Saûrû bamwîra bûra bungwa Ndaundi augire. 25 Saûrû eera aruti ngûgî baake beere Ndaundi ûûgû, “Gûtirî rûraayio mûnene akwenda, kîra akwenda n'ikonde îgana bia aîyî ba Afirisiti, kaingo eerîîria kîrî anthû baake.” Mûbango wa Saûrû warî Ndaundi aûragwe n'Afirisiti. 26 Rîra aruti ngûgî ba Saûrû beerire Ndaundi ûgu aakena na eenda gûtuîka mûthoni wa mûnene. Mbere ya kagiita kara aanenkereetwe kathira, 27 Ndaundi na njûûrî yake îra aatongoragîîria baumagarûka baathi baûraga Afirisiti magana maîrî. Ndaundi aaya na ikonde magana maîrî aanenkera mûnene bionthe kaingo atuîka mûthonuue. Kwoogu Saûrû amûneenkera Mikari aatuîka mûk'wake.

28 Rîra Saûrû aaraithire na aamenya Mwathani ari amwe na Ndaundi, na mwarî wa Saûrû Mikari n'amwendeete 29 amûkuthûka nkûrûki. Saûrû atuîka mûnthû ûtûûrooni bwake. 30 Warîra atongoria ba njûûrî ya Afirisiti baithûkaga, Ndaundi n'we aûmbanaga mûno nkûrûki ya aruti ngûgî bara bangî bonthe ba Saûrû. Na n'ûntû bwa ûgu riîtwa rîake riagîta îgweta mûno.