Saûrû acûûgia kûûraga Ndaundi
19
1 Ntugû îmwe Saûrû aaria na mwan'wake Njonathani amwe na aruti ngûgî baake bonthe abeera baûrage Ndaundi. Îndî Njonathani neendeete Ndaundi mûno. 2 Kwoogu Njonathani eera Ndaundi, “Baaba Saûrû n'agûcwa bûra akûûraga. Kwoogu wîmenyeere mûno rûû rûûkîîrî, ûthi wîbithe bantû atakûmenyeka ûkare noo, 3 naani nkaumagarûka ndûngame rûteere waagu kîrî baaba arî naara kîeniini naara ûkeegua ûrî, mbarie n'wee mantû maaku, na bûra nkeegua ngakwîra.”4 Njonathani aaria ntheto imbega cia Ndaundi kîrî îthe Saûrû amwîra ata rî, “Menya mûnene aaya kûbîtîria mûruti ngûgî wake Ndaundi n'ûntû gûtirî ûthûûku amûrûthîrîîte, ngûgî ciake cionthe ira arutîîte i cia gûgûteethia mûno. 5 Neerutîîte ûtûûro bwake rîra aûragire Mûfirisiti, Mwathani aretera Isiraeri ûûmbani bûûnene mûno; woû wengwa wona ûgu na wakena. Îîndî i kî n'ûntû ûkaabîtîria Ndaundi muntû atarî na mabîtia, ûmûûraga gûtarî na gîtûmi?” 6 Saûrû athikîîria Njonathani na athiîtia auga, “Wa ta bûra Mwathani atûûraga mwoyo, Ndaundi atiûragwa.” 7 Njonathani aathi eeta Ndaundi amwaa ntheto cionthe, acooka amûreeta kîrî Saûrû atua kûmûrutagîra ngûgî wa ta mbereeni. 8 Nyuma ya mantû mamu kwaumîîra ndûa kaîrî na Afirisiti. Ndaundi aumagarûka aarûa nabo mwanka abacinda nainya mûno bamûkuthûka baugia.
9 Rîru kîrundu kîîthûûku kuuma kîrî Mwathani kîendamîîra Saûrû akari nthî nyomba yake agwete îtumo rîake na njara. Ndaundi n'arî waagu akîriingaga wandîndî ya ndigi imbingî. 10 Saûrû ageria kûmuntanîra Ndaundi na îtumo rûthingooni, îndî Ndaundi eebera îtumo rîamunta rûthiingo. Ndaundi auma, augia na aûra. 11 Ûtugû wa bûbu Saûrû aatûma antû bakaria nyomba ya Ndaundi kaingo bamûûraga rûkîîrî. Mikari mwekûrû wa Ndaundi amûng'unyîria amwîra, “Ûkarega kûûra îmunthî ûtugû, ûkaûragwa rûû.” 12 Kwoogu Mikari aumagarûkia Ndaundi amûkinyûkîîria ndîrîcaani aûra. 13 Mikari aathûkia ngai ya mûbuanaano amîmaamia ûrîrî amîîkîra nkoobia ya guaya ya mbûri kiongo amîguîka na nguo. 14 Rîra Saûrû aatûmire antû bathi kûgwata Ndaundi, Mikari abeera, “N'ûmwayie.” 15 Saûrû aatûma antû wa bara kaîrî bathi kwona Ndaundi na abaatha abeera, “Mûreeteeni akamatîîtwe na ûrîrî mmûûrage.” 16 Rîra antû babu baathûngîîre nyomba, beethîîre i mûbuanano ûrî ûrîrî, wîkîrîtwe nkoobia ya guaya ya mbûri kiongo.
17 Rîru Saûrû aûria Mikari, “I kî n'ûntû wambenia wareka mûnthû wakwa aûra?” Mikari amûcookeria amwîra, “N'ambîîrire akambûraga ndaarega kûreka athi.”
18 Ndaundi aûra aathi Rama kîrî Samweri amwîra mantû monthe mara Saûrû amûrûthîrîîte. Samweri aathûkia Ndaundi baathi bwa Nayothi gûkaraga noogo. 19 Ntheto ciaya gûkinyîra Saûrû aamenya Ndaundi aakaraga Nayothi naara Rama. 20 Saûrû aatûma antû noogo baathi kûgwata Ndaundi. Rîra baakinyire boona gîkundi kîa iroria gîkîgoyagia na gîgîkururaga na Samweri arî mûtongoria wao, Kîrundu wa Ngai abeendamîîra baanjîîria kûgoyia na gûkurura. 21 Rîra Saûrû eerirwe bûra gwakara aatûma atûmwa bangî, wana bo baanjîîria kûgoyia na gûkurura. Saûrû aatûma atûmwa bangî rîa mathatû îndî wana bo baanjîîria kûrûtha wa ta bu. 22 I rîo Saûrû aathiire Rama wengwa agûkinya kîthimaani kîra kînene kîrî Seku aûrithîria, “I nakû Samweri na Ndaundi barî?” Muntû ûmwe amûcookeria amwîra, “Barî Nayothi naara Rama.” 23 Saûrû aathî Nayothi naagu Rama. Îndî Kîrundu wa Ngai amwîndamîîra aathi akîroragia mwanka aakinya Nayothi. 24 Aaruta nguo ciake na aagoyia agîkururaga mbere ya Samweri, na aamaama akari ûgu ntugû yonthe, mûthenya na ûtugû. Gîkî i kîo gîtûmi antû baugaga, “Ga Saûrû nwe aratuîkire ûmwe wa iroria?”