Njonathani aateetheeria Ndaundi gûtoorooka
20
1 Ndaundi aatoorooka kuuma Nayothi naagu Rama aathi kîrî Njonathani amûûria, “N'ata ndûthîîte? Mabîtia maakwa i marîkû? Na meeyia maakwa i marîkû mara ndûthîîte abaagu, n'ûntû akwenda kûmbûraga?” 2 Njonathani amwîra, “Arî ûtiikua! Baaba atirûthaga ûntû nwa bûrîkû bûûniini kana bûûnene atambîrîîte. I mbi îgaatûma aambitha? Bûbu ûkuuga bûtirî oogo.” 3 Îndî Ndaundi athiîtia amwîra, “Abaagu naiyî bwega tûrî ûcoore naawe, na n'wa athûgaanie akauga, ‘Ntiîra Njonathani ntheto ino n'ûntû ikamûgwatithia kîeba.’ Amwe na ûgu i ka ngûkwîra, wa ta bûra Mwathani atûûraga mwoyo, na ta bûra wou wengwa ûtwîre mwoyo, rîtigeere îkinya rîmwe gatîgatî gaakwa na gîkuû.” 4 Njonathani eera Ndaundi, “Bûra bunthe ûkeenda, ngakûrûthîra bu.” 5 Nwe Ndaundi amwîra, “Rûû i ntugû ya kûyiûka kwa mweri na ntibatîîrue kûrega gûkara meethaani na mûnene; îndî ka nthi ndîîbithe naagu kîthakaani mwanka ntugû ya ithatû ûgoro. 6 Abaagu akaaya kûmenya ntirî oogo, ûmwîre ata rî, ‘Ndaundi n'andombire rûûtha augia rwîro mûciî kwao Bethireemu kaingo eeringanîra na mwîrîga wao n'ûntû kûrî na kîgongwana kîa mwanka.’ 7 Akaaya gwîtîgîîrîa akauga, ‘Yîî i bwega,’ ûmenye niû mûruti ngûgî waku agaakara mayîîga, îndî akaaya kûthûûra mma ûmenye n'erutanîrîîtie kûnthûûkia. 8 Îîndî ûûmbonie kwendeerwa niû mûruti ngûgî waku n'ûntû n'ûnthiîtîrîîtie mbere ya Mwathani, na ûkaaya kwîthîrwa kûrî ûthûûku ndî nabu mbûraga wengwa, kûrî na gîtûmi kîbi ûmbira kîrî abaagu?” 9 Njonathani amwîra, “Tiga kûthûgaania ûgu, ûkaaya kwîthîrwa mbiyî bwega baaba n'erutanîrîîtie gûkûthûûkia, n'ûkwona taka ntakwîra?” 10 Ndaundi amûûria ata rî, “N'ûû ûkaamenyîthia wegua abaagu agagûcookeria athûûri?” 11 Njonathani amwîra, “Tuumagarûke tûthi bwa kîthaka.” Baumagarûka barî baîrî baathi naagu kîthakaani.12 Rîru Njonathani eera Ndaundi, “Mwathani Ngai wa Isiraeri i mûnkûûyî. Na mma ndaarîîkia kûûria baaba mantû mathaa ta mama aûke, ndaamenya bûra abangîîte wegua mantû marî meega ngakûmenyithia. 13 Nkaaya kûmenya baaba n'abangîîte gûkûthûûkia, inkûthiîtia gûkwîra na gûgûteethia gûtoorooka ûtarî na thîîna. Ndaarega kûûyûria mûthiîtio ûyû Mwathani aroompa îkaanûkia rîînene. Mwathani arookara naawe tabûra aarî na baaba. 14 Mbonagia wendo ta bwa Mwathani bûra bûtathiraga, bunka ndî mwoyo ntikaaye kûûragwa, 15 na ûtigaatigithie wendo bûbû kîrî mûciî wakwa wana kinya rîra Mwathani akaathiria anthû ba Ndaundi bonthe nthîgûrû îno.” 16 Kwoogu Njonathani aiga kîrîîkanîro na Ndaundi gîkaaririkanagwa i nciarwa ciao. Aacooka auga, “Na Mwathani aroorîithia anthû ba Ndaundi.” 17 Njonathani aatûma Ndaundi athiîtia kaîrî atî akaiga wendo bwao n'ûntû Njonathani eendeete Ndaundi ta bûra ebeendeete wengwa.
18 Njonathani amwîra, “Rûû i ntugû ya kûyiûka kwa mweri na tûgakwaga n'ûntû gîtî gîaku ûkeegua kîrî kîtheri. 19 Aûke ûkaathi mathaa ma ûgoro n'aara webithîîte ntugû îra thîîna îno yambîîrie, na ûkare akubî na iiga rîa Eseri. 20 Naani nkaagera mîgwî îthatû akubî na iiga rîru ta kûrî kîo nkûratha. 21 Na ngaatûma kaana ga kaîyî nkeere, ‘Îthi woye mîgwî.’ Na rîra ûkeegua ndakeera, ‘Mîgwî îrî rûteere rûrû rwaku mîthûkie ûûye n'yo.’ Rîru na ûkaaya n'ûntû wa ta bûra Mwathani atûûraga mwoyo gûtirî na ûgwati. 22 Îndî nkaaya kwîra kaîyî gaku, ‘Mîgwî îrî naara mbere yaku,’ îthi. Mwathani nwe akwenda ûthi. 23 Îndî mantûûni mara twaria Mwathani i mûnkûûyî wetû tene na tene.”
24 Kwoogu Ndaundi eebitha naagu kîthakaani na mweri ûkûyiûka, mûnene akara nthîgûrû kûrîa kîatho. 25 Mûnene akara gîtîîni gîake wata wîthîre. Gîtî gîake kîarî akubî na rûgito na Njonathani akara rûteere rûra rûûngî mbere yake na Abuneri akara akubî na Saûrû, îndî gîtî kîa Ndaundi kîarî kîîtheri. 26 Îndî Saûrû gûtirî bu auga ntugû înu, n'ûntû aathûgaanagia, “Kûrî ûntû bûramûgwatire, ti mûtheru na mma arî na mûgiro.” 27 Îndî wana kinya rûûni ntugû ya ciîrî ya mweri, gîtî kîa Ndaundi kîarî kîîtheri. Saûrû aûria Njonathani mwan'wake ata rî, “I kî n'ûntû mwana wa Njesii atiraaya biakûrîani îgoro na îmunthî rîene?” 28 Njonathani amûcookeria amwîra, “Ndaundi n'arandombire rûûtha rwa mpwî athi Bethireemu. 29 Araambîîrire ata rî, ‘Mbîtîgîîria nthi n'ûntû mwîrîga wetû ûrî na kîgongwana taûni, na mûruayia aambathîîte nkinye. Kwoogu itû, mbîtîgîîria nthi nkoone aruayia.’ Na n'ûntû bwa gîtûmi gîkî atirî amwe naati aaga meethaani ya mûnene.”
30 Saûrû aankanwa mûno i mûthûûro n'ûntû bwa Njonathani na amwîra, “Woû mwana wa mûka ndemi na ntîîrîîka, n'ûû ataiyî n'ûgwatanîrîîte na mwan'wa Njesii, na n'ûkwîbira îgi wengwa na nyûkwe mwene! 31 Tatiga nkwîre, bunka mwan'wa Njesii arî mwoyo ûtikeerikîria na kinya ûnene bwaku bûtirûngama. Îîndî tûmana ûndetere we n'ûntû na mma nwa mwanka akue.” 32 Njonathani acookeria îthe Saûrû amûûria, “Aûragwe n'ûntû bwambi? N'ata arûthîîte?” 33 Rîru Saûrû amûgera îtumo akîenda kûmûûraga. Kwoogu Njonathani aamenya bwega îthe n'arabangîîte kûûraga Ndaundi. 34 Njonathani aûkîîra auma agu meethaani athûûri mûno na ataarûma nwa mbi ntugû înu ya ciîrî ya mweri n'ûntû bwa îthe kûmuira îgi n'ûntû bwa Ndaundi.
35 Rûûni rûkîîrî Njonathani aumagarûka aathi kîthakaani bûra baarîîkanîrîîte na Ndaundi, na n'aarî na kaana ga kaîyî. 36 Eera kaana gaku, “Ugia rwîro ûcerie mîgwî îno nkûgera.” Kathiîte agera mûgwî mbere yaako. 37 Rîra gaakinyire ara mûgwî ûrî akaugîîria akeera, “Mûgwî ûrî mbere yaku.” 38 Njonathani akeera, “Rûthanga bwa mpwî menya ûkaraanga.” Keethîrania mîgwî kamûreetera. 39 Kaana gaku, gûtirî bu kaamenyaga. Nwa Njonathani na Ndaundi baamenyaga bûra bakûrûtha. 40 Njonathani aanenkera kaana gaku mathaga maake ma ndûa, akeera kamaire taûni.
41 Warîru kaana gaku gakûthi, Ndaundi aumîîra ara eebithîîte rûteere rwa iiga eendamîîra Njonathani maita mathatû eenîkîîte ûthiû nthî, baacuncana, baarîranîra îndî Ndaundi aarîra mûno. 42 Njonathani eera Ndaundi, “Îthi mayîîga n'ûntû i tûrathiîtanîîrie riîtwani rîa Mwathani, Mwathani i mûnkûûyî wetû tiû na nciarwa cietû tene na tene.” Ndaundi aûkîîra aathi na Njonathani n'we aacooka bwa taûni.