Ndaundi atoorooka aathi bwa Nobu
21
1 Rîru Ndaundi aathi bwa Nobu kwa Aimereki mûthînjîri wa Ngai. Aimereki amûthagaana akiinainaga amûûria, “N'ata waya ûrî wenka gûtarî we bûrî n'we?” 2 Ndaundi aacookeria Aimereki amwîra, “I mûnene ûrantûmire mûrutîra ngûgî nna, na ambîîra, ‘Ûtikang'unyîrie muntû kinya ûrîkû mantû ma ngûgî îno ngûtûmîîte.’ Naani i mbîîrîîte nthaka ciakwa tûkomane bantû ana. 3 Îndî rî, i mbi ûrî n'yo njaraani yaku? Ndûmia mîgaate îtaano kana kîonthe kîra kîrî oogo.” 4 Mûthînjîri wa Ngai amûcookeria amwîra, “Ntirî na mîgaate ya kîîwîthîre tatiga îra mîtheru yonka. N'wa mbûnenkere bunka wegua nthaka ciaku itithenganîîrîîte na aka.” 5 Ndaundi amûcookeria amwîra, “Wa ta wîthîre i twîmenyeereete kîrî aka wa ta bûra twîmenyagîîra tûthiîte ngûgîîni. Into bia nthaka ino biîgagua birî bitheru kinya rîra bathiîte ngûgîîni îra tûmenyereetie, îmunthî beethereetie bûgana ata!” 6 Kwoogu mûthînjîri wa Ngai amûneenkera mîgaate înu mîtheru n'ûntû gûtaarî na mîgaate îîngî tatiga înu yaarutîrîîtwe mbere ya Mwathani kaingo îgaakûûranua na îîngî yaimbia ntugû wenu. 7 Ntugû înu i kwarî na ûmwe wa aruti ngûgî ba Saûrû wetagwa Ndoegi Mûendomu aarigîîrîîtue mbere ya Mwathani. N'we aarî mûrûngamîîri wa arîîthi ba Saûrû.8 Ndaundi aûria Aimereki ata rî, “Ûrî na îtumo kana rûûyiû aaga? Ntiraaya na rûûyiû rwakwa kana îthaga n'wa rîmwe rîa ndûa n'ûntû ntûmwa ya mûnene îkûrî ya mpwî.” 9 Mûthînjîrî wa Ngai amûcookeria amwîra, “Îtumo rîa Ngoriathi Mûfirisiti ûra waûragîîre kîbondeeni kîa Era, rîrî aaga riogeetwe na nguo agu nyuma ya efondi. Wegua nûkûrîenda thûkia rîo n'ûntû gûtirî rîngî rîrî aaga tatiga rîo.” Ndaundi amûcookeria amwira, “Gûtirî rîngî ta rîo, nenkera rîo.”
Ndaundi arî Ngathi
10 Ntugû înu Ndaundi atoorooka Saûrû aathi wa Akisi mûnene wa Ngathi. 11 Aruti ngûgî ba Akisi bamûûria, “Anga ûyû ti Ndaundi mûnene wa nthîgûrû? Anga t'we eekûrû bainaga na nyîmbo bakiugaga, ‘Saûrû akûûraga magiri maake îndî Ndaundi akûûraga makûmi ma magiri?’ ”
12 Ntheto ino ciagîa Ndaundi nkoro mûno aatua gûkuthûka Akisi mûnene wa Ngathi mûno. 13 Aagarûra mûkarîre wake rîra arî meethooni maao. Rîra arî njaraani ciao aatua gûkaraga ta muntû ûmûthûûku kiongo, aatua gûkaraga agîkururagia mîkururio mûrangooni wa mwîrîga na akîruaga mata makendama na kîreru. 14 Akisi aûria aruti ngûgî baake, “Muntû ûyû arî na nkoma î, n'wakî bûndeterete? 15 I mbagîîte antû ba nkoma kaingo bûûndetera muntû ûyû aaya kûrûthaga ûûgû aaga mbere yaakwa? Ûyû akaathûngîra nyomba yakwa?”