Ndaundi îkurunguuni rîa Anduramu
22
1 Ndaundi atoorooka kuuma Ngathi aathi îkurunguuni rîa Anduramu, na rîra aruagina na antû ba mûciî wa îthe beegiirue, baathi naagu aarî. 2 Muntû wonthe ûra aarî na kînyamaara, na muntû wonthe ûra aarî na îrandû, na muntû wonthe ûra ataaganagîrwa, beethîrana kîrî we, nwe aatuîka mûtongoria wao. Bonthe bara baarî kîrî we baarî ta antû magana mana. 3 Kuuma agu Ndaundi aathi Misipe ya Moabu eera mûnene wa Moabu ata rî, “Îtîgîîria baaba na taata baaye bakare naaga gwaku mwanka rîra nkaamenya bûra Ngai akaandûthîra.” 4 Abatiga kwa mûnene wa Moabu baakara noogo îgiita rionthe rîra Ndaundi aarî wîbithooni. 5 Rîru kîroria Ngandi eera Ndaundi, “Menya ûkara aaga wîbithooni, uma ûthi bwa nthîgûrû ya Njunda.” Kwoogu Ndaundi auma agu aathi mûthitûûni wa Erethi.Saûrû aûraga athînjîri ba Ngai naagu Nobu
6 Ntugû îmwe Saûrû arî Ngibea akari nthîgûrû karîmaani nkona ya mûtî wa mûgunye agwete îtumo na njara, na aruti ngûgî baake bonthe barûngi bamûthiûrûkîîrîîte, eegua Ndaundi na antû bara araarî nabo i baroonekire. 7 Saûrû abeera, “Ta nthikîîriani biû Abenjameni, nwaka mwana wa Njesii akaabûnenkera wora ûmwe wa cienu mûnda wa irio na wa mîcabiibû, akabûtuîkithia bwinthe atongoria ba kwathaga njûûrî cia acikaarî ngiri kana îgana, 8 kaingo bwinthe bûmbîndîra njûri? N'ûntû gûtirî we ûkûmbumbûrîra rîra mwana wakwa aarûtha kîrîîkanîro na mwana wa Njesii, kana n'wa ûmwe wa cienu ambîgîîrua kîao ambumbûrîra wegua mwana wakwa nareengîîre mûruti ngûgî wakwa akaraga angiitîrîîte ta îmunthî.” 9 Ndoegi Mûendomu ûra aarûngi amwe na aruti ngûgî ba Saûrû amûcookeria amwîra, “I mbonire mwana wa Njesii aaya Nobu kîrî Aimereki mwana wa Aitubu, 10 aûrithîria mantû kuuma kîrî Mwathani, amwaa irio na amûneenkera rûûyiû rûra rwarî rwa Ngoriathi Mûfirisiti.”
11 Mûnene aatûmana mûthînjîri wa Ngai Aimereki mwana wa Aitubu, antû bonthe ba mûciî wa îthe bara baarî athînjîri ba Ngai bara baarî Nobu bonthe baaya kîrî mûnene. 12 Saûrû amwîra, “Itû nthikîîria mwana wa Aitubu!” Amûcookeria amwîra, “Yîî mwathi wakwa.” 13 Saûrû amûûria, “I kî n'ûntû bûrambîndîîre njûrî bûrî na mwana wa Njesii? I kî n'ûntû ûramwere irio na rûûyiû na wamûûrîria mantû kuuma kîrî Ngai? Îîndî n'angarûkîîte na angiitîra îmunthî?” 14 Aimereki acookeria mûnene amûûria, “N'ûû ûngî kîrî aruti ngûgî baaku mwîtîgua ta Ndaundi, mûthonuue wa mûnene, na n'we mûtongoria wa acikaarî bara bagûkaragia na n'we ûtîîyîtwe mûciî ûyû waku? 15 Ka înu îraarî ntugû ya mbere ya kûmûûrîria mantû kuuma kîrî Ngai? Itû arî mûnene, menya ûmbaka ntheto, niû mûruti ngûgî waku, kana mûciî wetû n'ûntû niû mûruti ngûgî waku ntiiyî bûra gûgûkarîka.” 16 Mûnene amwîra, “Na mma, woû Aimereki amwe na mûciî wa abaagu bwinthe i bûgaakua!” 17 Mûnene eera akaria baake bara baarûngî akubî nwe, “Ûragaani athînjîri baba ba Mwathani bonthe n'ûntû barî kîmwe na Ndaundi. I baraiyî n'atoorokeete na batambîîra. Baûrageeni.” Îndî aruti ngûgî babu ba mûnene bateendaga gûtambûrûkia njara bakîûraga athînjîri baba ba Mwathani. 18 Saûrû agarûkîra Ndoegi Mûendomu amwîra, “Ûraga athînjîri baba ba Mwathani!” Ntugû înu Ndoegi aûraga athînjîri ba Ngai mîrongo înaana na bataano bara beekîrîte efondi ya gatani înthongi. 19 Saûrû aithûkîra taûni ya Nobu naara athînjîri ba Ngai baatûûraga, aûraga antû bonthe. Arûme, aka, twana na tûgenke. Aatemanga kinya ng'ombe, mang'ooi na ng'ondu.
20 Îndî kîrî aana ba Aimereki mwana wa Aitubu gwatigara muntû ûmwe wenka wetagwa Abiathari. N'we aamonyokire aûra aathi naara Ndaundi aarî. 21 Abiathari eera Ndaundi atî Saûrû akûûraga athînjîri ba Mwathani. 22 Ndaundi eera Abiathari, “I ndaamenyire ntugû îra ndoonire Ndoegi Mûendomu ara, ndaamenya na mma akeera Saûrû. Mûciî wenu unthe wathirua n'ûntû bwakwa. 23 Tûkare aaga na menya ûmaka, n'ûntû ûra ûkwenda kûmbûraga nwa we akwenda gûkûûraga, ûgaatûûra mayîîga ûrî amwe naani.”