Ndaundi aatuunyûkia taûni ya Keira
23
1 Rîru beera Ndaundi atarî, “Afirisiti i bakûrûa na antû ba taûni ya Keira bakîbaiyaga irio bira birî njaraani cia kûbûûrîra.” 2 Ndaundi aûria Mwathani ata rî, “Nthi nkarûe na Afirisiti baba?” Mwathani amûcookeria amwîra, “Îthi ûkarûe na Afirisiti ûteethie Keira.” 3 Îndî antû ba Ndaundi bamûûria, “Tûrî na ûguaya tûrî aaga Njunda, tûtiikuthûka nkûrûki twathi Keira kûrûa na njûûrî cia Afirisiti?” 4 Ndaundi aacooka kaîrî kûûria mantû kîrî Mwathani. Mwathani amûcookeria amwîra, “Îndama Keira, n'ûntû nkaanenkanîra Afirisiti njaraani ciaku.” 5 Kwoogu Ndaundi na antû baake baathi Keira, baarûa na Afirisiti babacinda mûno na baataa ng'ombe ciao, na boonokia antû ba Keira.6 Nyuma ya Abiathari mwana wa Aimereki gûtoorooka aathi kîrî Ndaundi, aathiire Keira akamatîîte efondi.
7 Saûrû akwîrwa Ndaundi n'arathiire Keira auga ata rî, “Mwathani akûmûnenkanîra njaraani ciakwa, akwîbingîra wengwa athiîte kûthûngîra taûni îrî na mîîrîga na ikongoro bia kwinga.” 8 Saûrû eethîrania njûûrî yonthe ya ndûa îthi Keira îkîîmbîîria Ndaundi na antû baake. 9 Rîra Ndaundi aamenyire Saûrû n'akûbanga mûbango ûmûthûûku îgûrû rîake, eera Abiathari mûthînjîri wa Ngai, “Reete efondi aaga.” 10 Rîru Ndaundi aaromba akiugaga, “Mwathani Ngai wa Isiraeri, niû mûruti ngûgî waku nkwîgua na mma atî Saûrû n'akwenda kûûya Keira kûthiria taûni îno n'ûntû bwakwa. 11 Antû ba Keira bakaannenkanîra njaraani ciake? We Saûrû akeendama wa bûra mbîgîîtue? Mwathani Ngai wa Isiraeri, ncookeria niû mûruti ngûgî waku.” Mwathani amwîra, “Akeendama.” 12 Rîru Ndaundi aûria kaîrî, “Antû ba Keira bakaa nenkanîra amwe na antû baakwa njaraani cia Saûrû?” Mwathani amûcookeria amwira, “Yîî bagakûnenkanîra.” 13 I rîo Ndaundi na antû baake barî ta magana mathanthatû baumire Keira baakara bakîangangaga kuuma bantû amwe kûthi ara angî. Rîra Saûrû eegiirue Ndaundi n'atoorokire atirî Keira aatîîra kûthi bûra aabaangîîte.
14 Ndaundi aakara wîbithooni rwanda na irîmaani bia rwanda rwa Sibu. Saûrû aamûceragia ntugû cionthe îndî Ngai ataanenkanîra Ndaundi njaraani ciake. 15 Ntugû îmwe Ndaundi arî Oresi rwanda rwa Sibu eegua Saûrû naayîîte noogo kûmûceria amûûraga. 16 Îndî Njonathani mwana wa Saûrû aathi kîrî Ndaundi naagu Oresi amûûmîîria amwîra Ngai akeegua arî amwe nwe. 17 Amwîra, “Menya ûmaka n'ûntû baaba Saûrû atikûgwatania. Ûgaatuîka mûnene wa Isiraeri, naani ndî mûniini waku. Wana kinya baaba Saûrû naiyî ûgu.” 18 Na barî baîrî baarikithia kîrîîkanîro mbere ya Mwathani. Njonathani eenûka bwa gwake îndî Ndaundi aatigwa Oresi.
19 Asifa bamwe beetia Ngibea kîrî Saûrû bamwîra, “Ndaundi eebithîîte gatîgatîîni geetû makurunguuni ma Oresi karîmaani ga Akira ûraithîîrîîtie Njesimoni. 20 Îîndî mûnene îndama noogo warîra ûkeenda na ngûgî yetû îkeegua îrî kûmûnenkanîra njaraani ciaku.” 21 Saûrû abeera, “Mwathani aroobûthaarima n'ûntû i bûkûmbîgîîrua kîao. 22 Îthiini bûmenye bwega na bwone ara a kwîbitha, na n'ûû ûramwonire noogo, n'ûntû ndîîgua i muntû wa ûbereera mûno. 23 Îthiini bûcûnkûûne bûmenye bwega kunthe kûra eebithaga, rîru bûndetere ntheto inu. Naani nkaathiyania naabi, wegua arî nthî înu. Nkaamûceria mûcerie mîîrîgaani yonthe ya Njunda.”
24 Rîru antû babu baûkîîra baathi bwa Sibu mbere ya Saûrû. Îgiita rîru Ndaundi na antû baake baarî rwanda rwa Maoni naagu Araba bwa iti ya Njesimoni. 25 Saûrû na antû baake baathi gûceria Ndaundi. Ndaundi akwîrwa eendama bwa rwara rûra rwarî naagu rwanda rwa Maoni na aakara noogo. Rîra Saûrû eegiirue ûgu aathingatana n'we mwanka naagu rwanda rwa Maoni. 26 Saûrû aathi bwa rûteere rûmwe rwa kîrîma, Ndaundi n'we na antû baake rûteere rûra rûngî rwa kîrîma; Ndaundi etharathara auma noogo n'ûntû Saûrû na antû baake i baarî bakûbarûmarûma akubî babagwatagwata. 27 Kagiitaani wa gaku, mûtûmwa aaya kîrî Saûrû amwîra, “Îyaanga na mpwî! Afirisiti bakuithûkîra nthîgûrû yetû.” 28 Warîru Saûrû aarekana na kwîngana na Ndaundi aathi kûrûa na Afirisiti. N'ûntû bwa ûgu bantû agu atua gwîtagwa Sera-Amarekothi.a 29 Ndaundi eetia kuuma agu aathi wîbithooni bwa Eni-Gendi.