Ndaundi aarega kûûraga Saûrû
24
1 Saûrû akuuma kûthingata Afirisiti, eerwa Ndaundi arî rwanda rwa Eni-Gendi. 2 Saûrû aathûkia acikaarî bara beega mûno Isiraeri yonthe ngiri ithatû, aathi gûceria Ndaundi na antû baake naagu Njaraani cia Mbûri cia Kîthaka. 3 Beethîra biugû bîa ng'ondu rûteere rwa njîra bantû kwarî na îkurungu, Saûrû aathûngîra îkurunguuni ndeeni gwîteethia. Ndaundi na antû baake baakari îkurunguuni rîru naagu ndeeni. 4 Antû ba Ndaundi bamwîra ata rî, “Îmunthî n'yo ntugû îra Mwathani aakwîrire agakûnenkera mûnthû waku njaraani ciaku, na ûkamûrûtha wa bûra ûkoona bûkîbua.” Ndaundi aûkîîra aathi agiita gîcûrî kîa nguo ya Saûrû atakwîgua. 5 Nyumaani Ndaundi eegua akîgambîthua nkorooni n'ûntû bwa kûgiita gîcûrî kîa nguo ya Saûrû. 6 Eera antû baake, “Mwathani atikaareke ndûthîra mwathi wakwa mwîtûûrîrua maguta wa Mwathani ûntû bûbû ntambûrûkia njara yakwa mûthûûkia n'ûntû i mûthuure wa Mwathani.” 7 Ndaundi eereka antû baake mûno na mîgambo îno, na ataabeetîgîîria baringithia Saûrû. Saûrû aûkîîra aumagarûka îkurunguuni aathi.8 Ndaundi n'we aûkîîra aumagara îkurunguuni, eeta Saûrû nainya, “Mwathi wakwa mûnene!” Rîra Saûrû aaraithire nyuma, Ndaundi eenîka ûthiû bwake nthî amwînyiîria. 9 Ndaundi aûria Saûrû, “I kî n'ûntû ûkûthikîîria ntheto cia antû bara bakuuga Ndaundi n'akwenda gûkûthûûkia? 10 Îmunthî ûkwîbonera na meetho maaku bûra Mwathani agûkûnenkanîrîte njaraani ciakwa rîra ûkûrî îkurunguuni. Bamwe i bakûmbîîraga nkûûrage îndî ndaatigana naawe wathi. I ka mbugire ntiitambûrûkia njara yakwa nkûthûûkia n'ûntû ûrî mwîtûûrîrua maguta wa Mwathani. 11 Ta raitha baaba, ene i gîcûrî kîa nguo yaaku ngwete, ngiitire kamûthia ka nguo yaaku îndî ntirakûûraga. Menya bwega gûtirî ûthûûku kana kûrega kwathîka ndî na ku. Na gûtirî bu nkûbîtîrîîtie nabu. Îndî woû n'ûgûceria kûûmbûraga. 12 Mwathani atûgiitîre îgamba niû na woû. Mwathani andîîrie kîrî woû. Îndî njara yaakwa îtitambûrûka îgûrû rîaku. 13 Wa ta bûra njuno ya karaaya yuugaga, ‘Kîrî bara bathûûku kuumaga ûthûûku,’ kwoogu njara yakwa nîû îtikûringithia. 14 Mûnene wa Isiraeri aumîîte athingatîîte ûû? N'ûû we aguîmîîte? I kurû înkuû kana i nthuua? 15 Mwathani arootûgambîra na agatûgiitîra îgamba niû naawe, Mwathani aroondaithîîria na akantheteera na aganteethia kuumania naawe.”
16 Rîra Ndaundi aarîîkiirie kwaria mîgambo înu kîrî Saûrû, Saûrû amûûria, “I kayû gaaku gaku Ndaundi mwan'wakwa?” Rîru Saûrû aûkîîrîa kayû aarîra. 17 Eera Ndaundi ata rî, “Woû ûrî ûmwega nkûrûki yakwa, n'ûntû ûndûthîrîîte mantû meega naani ndakûrûthîra maathûûku. 18 Na ûkwonania îmunthî wega bûra wandûthîra n'ûntû ûtirambûraga rîra Mwathani aannenkanîîre njaraani ciaku. 19 N'ûntû muntû akoona mûnthû wake î, aareka akathi atamûthûûkîîtie? Mwathani nakûrîe na wega n'ûntû bwa bûra wandûthîra îmunthî. 20 Îîndî nkûmenya na mma atî ûgaatuîka mûnene na ûnene bwa Isiraeri bûkaarika njaraani ciaku. 21 Îîndî nthiîtîria riîtwani rîa Mwathani uuge ûtiithiria nciarwa ciakwa giria riîtwa rîakwa na rîa mûciî wetû rîîya kûriganîria.” 22 Ndaundi athiîtîria Saûrû. Rîru Saûrû eenûka. Îndî Ndaundi na antû baake beetia wîbithooni bwao.