Gûkua gwa Samweri
25
1 Samweri aakwire, Aisiraeri bonthe beethîrana, bamûrîrîra na bamûthika gwake mûciî Rama. Rîru Ndaundi aumagarûka eendama rwanda rwa Parani.aNdaundi aathûkia Abigairi ntigwa ya Nabari
2 I kwarî na muntû ûmwe naagu Maoni aarî na into taûni ya Karimeri, aarî gîtonga kîînene. Aarî na ng'ondu ngiri ithatû na mbûri ngiri îmwe. Kagiitaani gaku i noogo eenjagîra ng'ondu ciake guaya. 3 Muntû ûyu eetagwa Nabari na mwekûrû wake eetagwa Abigairi. Mwekûrû ûyû aarî ûmûûgî na ûmûthongi. Îndî mwene aarî muntû atarî gîtîîyo na ûmûkûûnu. Aarî wa mûciî wa Karebu.
4 Ndaundi arî naagu rwanda eegua Nabari n'akwenja ng'ondu ciake guaya. 5 Kwoogu Ndaundi aatûma nthaka îkûmi aciîra, “Îthiini Karimeri kîrî Nabari bûnkeetherie we. 6 Bûkaamûkeethia bûmwîre, ‘Ûkiri bûrookaraga naawe, na mûciî waku na bionthe bira ûrî nabio. 7 Îndî ndîîgua i kagiita ga kwenja ng'ondu guaya. Rîra arîîthi baaku baraarî amwe naati, gûtirî ûthûûku twabarûthîra na rîonthe rîra baarî Karimeri gûtirî gîntû kîao kîaûra. 8 Ta ûria nthaka ciaku na igakwîra. N'ûntû twaya ntugû ya thigûnkû ka nthaka ino ciakwa cione kwendeerwa meethooni maaku. Itû tûrûmie wa kîra ûrî nakîo tiû aruti ngûgî baaku na kinya mwana waku Ndaundi.’ ”
9 Nthaka inu cia Ndaundi ciakinyire ciera Nabari ntûmwa ya Ndaundi, rîru cieteera. 10 Nabari abacookeria abaûria ata rî, “Ndaundi n'ûû? Na mwana wa Njesii n'ûû? Kûri na aruti ngûgî baingî ntugû ino bara bagûtoorooka bakauma kîrî aathi baao. 11 Ntiithûkia irio biakwa, rûûyî na nyama ira nkûthînjîrîîte eenji guaya ba ng'ondu ciakwa nnenkera antû ntaiyî bûra baumîîte.” 12 Rîru nthaka inu cia Ndaundi ciaûndûka ciacooka. I gûkinya ciamwaa ntheto inu cionthe. 13 Ndaundi eera nthaka inu ciake, “Wa muntû ekundîke rûûyiû rwake.” Kwoogu woora muntû eekundîka rûûyiû rwake, wana kinya Ndaundi eekundîka rwake. Ndaundi eetia na ta antû magana mana na bara bangî magana maîrî baatigwa bakarîîtie mîrigo.
14 Îndî ûmwe wa aruti ngûgî baake eera Abigairi mwekûrû wa Nabari ata rî, “Ndaundi aratûmire atûmwa baake kuuma rwanda baaya gûkeethia mwathi wetû îndî abarumanga. 15 Nabo i baarî beega mûno kîrî tiû. Bataatûrûthîra ûthûûku na îgiita rîonthe rîra twarî nabo naagu kîthakaani gûtirî gîntû gîetû kîaûra. 16 Baraarî rûthiingo rwetû mûthenya na ûtugû kagiita konthe kara tûraarî nabo tûrîîthîîtie ng'ondu. 17 Îîndî tathûgaania wone bûra ûkûrûtha, n'ûntû mwathi wetû arî akubî kûrûthîrwa mantû maathûûku, na kinya mûciî wake unthe, n'ûntû i muntû ûmûthûûku na ûtaarîka n'we.”
18 Abigairi aarûtha bwa mpwî, aathûkia mîgaate magana maîrî, mathatwa maîrî ma ndibei, na ng'ondu itaano i nthînje, na mbakûri itaano cia irio biikarange na rûgîo, na ikûmbwa îgana bia ncabiibû inyaarie na ikûmbwa magana maîrî bia nkûyû inyaarie, abiogeera mang'ooini. 19 Eera nthaka ciake ata rî, “Îthiini bûrî mbere naani mbuume nyuma.” Îndî ateera mwene Nabari.
20 Mwekûrû ûyû aathi atwete îng'ooi aithîîtwe i kîrîma mbarî îmwe. Warîmwe baarîîkana na Ndaundi na antû baake beendamîîte bamûtarîîte. 21 Ndaundi n'aarî akuuga, “Wabu i ndararutire ngûgî ya mana ya gûkaria into bia muntû ûyû rwanda na gûtirî gîntû gîake nwa kîmwe kîaûra. Îndî we akûndea wega bwakwa na ûthûûku. 22 Ngai aroonkaanûkia nkûrûki, ndaatiga muntû mûrûme n'wa ûmwe wa bonthe bara barî baake arî mwoyo gwakea rûkîîrî.”
23 Rîra Abigairi oonire Ndaundi aakinyûka îng'ooini na mpwî, eendamîîra mwanka ûthiû bwatiira nthî. 24 Abigairi aturîîtie maru mbere ya Ndaundi amwîra ata rî, “Mwathi wakwa, ka mabîtia meegue marî maakwa ninka, ingûkûromba ûnthikîîrie niû mûruti ngûgî waku. 25 Itû mwathi wakwa menya ûgwata mantû ma Nabari i muntû ûmûthûûku na akari ta riîtwa rîake, riîtwa rîake i ta kuuga kîaa, na waa bûtimûrûmûkaga. Îndî niû mûruti ngûgî waku wa mûka ntoona nthaka ira watûmîîte. 26 Îîndî n'ûntû Mwathani ûra akûrigîîrîîtie ûtûûra nthakame îtarî na mabîtia, kana wîrîîria wengwa, wa ta bûra Mwathani atûûraga mwoyo na wa ta bûra woû wengwa ûtûûraga mwoyo, anthû baaku na bara bonthe bathûgaanagia gûkûrûthîra ûthûûku barookara ta Nabari. 27 Îndî îtîgîîria kîewa gîkî mûruti ngûgî waku akûretera kînenkerwe nthaka ciaku ira ûthiyanagia nacio. 28 Itû rekera îbîtia rîrî rîa mûruti ngûgî waku wa mûka. Na mma Mwathani agagûtuîkithia mûnene woû na nciarwa ciaku, n'ûntû ûrîrûa ndûa ya Mwathani, na ûthûûku bûtikooroonara kîrî woû ûtûûrooni bwaku bunthe. 29 Wana kinya ûkeegua muntû enganîîte naawe akûûraga, ûtûûro bwa mwathi wakwa bûkeegua bwoganîîrîîtue amwe na bara barî mwoyo ûmenyeerini bwa Mwathani Ngai, îndî anthû baaku Ngai akaabathiria ta muntû ûkûgera maiga na gîkûtha. 30 Na rîra Mwathani akaarûthîra mwathi wakwa mantû mara meega mara aariirie îgûrû rîake, rîra akaamûtuîkithia mûtongoria wa Isiraeri, 31 mwathi wakwa atiîgua arî na ûntû bwa kûmwinyîîria nkorooni n'ûntû atiîgua atûûrîîte nthakame îtarî na mabîtia kana aîrîîria n'wa mbi wengwa. Rîra Mwathani agaakûrûthîra mantû mama monthe ûndirikane niû mûruti ngûgî waku wa mûka.”
32 Ndaundi aacookeria Abigairi ata rî, “Mwathani Ngai wa Isiraeri arookumagua, ûra agûtûmire ûûya gûkomana naani îmunthî! 33 Ûrothaarimwa n'ûntû bwa mathûgaania meega woû watûma ntîîra gwîtûûra nthakame îmunthi, ntireerîîria na njara ciakwa ningwa. 34 N'ûntû, wa ta bûra Mwathani Ngai wa Isiraeri atûûraga mwoyo, ûra aatûma ntigaakûrûthîre ûthûûku, n'ûntû ûkîrega kûûya na mpwî ûkomana naani, na mma îmunthi gûkîereerûka, kwa Nabari gûtigîtigara muntû mûrûme n'wa ûmwe.” 35 Rîru Ndaundi etîgîîria kûthûkia biewa bira Abigairi aamûreterete na amwîra, “Înûka bwega. Nkwîgua bûra wauga na ndeetîgîîria îromba rîaku.”
36 Rîra Abigairi aacookire eethîîre Nabari arî na kîatho kîînene mûno ta kîa mûnene, agwîrîîtue mûno na arî ûmûtogoonu mûno. Gûtirî bu aamwîra mwanka gwakea. 37 Rûûni rûkîîrî Nabari agûtogoonoka, Abigairi amwîra mantû mamu monthe. Akûmeegua, aatemûka, aûmagara ng'û ta iiga. 38 Nyuma ya ntugû îkûmi, Mwathani aatûma Nabari akua.
39 Ndaundi akwîgua Nabari agûkua augire ata rî, “Mwathani arookumua n'ûntû akûndîîria irumi bira Nabari arandumaga na andigîîria niû mûruti ngûgî wake ntikaarûthe ûthûûku. Mwathani agûcookeria Nabari ûthûûku bwake.” Ndaundi aatûmana Abigairi aûrua atuîka mwekûrû wake. 40 Aruti ngûgî ba Ndaundi bagûkinya Karimeri naara Abigairi aarî bamwîra, “Ndaundi atûtûma tûkûûyîra kaingo ûtuîka mwekûrû wake.” 41 Abigairi aûkîîra eenîka kiongo bwa nthî auga, “Niû ndî mûruti ngûgî wake, na i ndîîthuuranîrîîte kinya kûthambia aruti ngûgî ba mwathi wakwa magûrû.” 42 Abigairi aumagarûka na mpwî aatwa îng'ooini agîteethagîîrua n'aruti ngûgî baake bataano ba aarî aathingata atûmwa babu ba Ndaundi aatuîka mwekûrû wake. 43 Ndaundi n'aarî akûthûkia Ainoamu wa Njesireeri, kwoogu barî baîrî baatuîka eekûrû baake. 44 Kagiitaani gaku, Saûrû n'arî akûnenkera Pariti mwana wa Raisi wa kuuma Ngarimu Mikari mwarî wake ûra aarî mwekûrû wa Ndaundi.