Ndaundi aarega kûûraga Saûrû rîa maîrî
26
1 Kaîrî Asifa bamwe baathi kîrî Saûrû Ngibea bamwîra ata rî, “Ndaundi eebithîîte karîmaani ga Akira kara karaitheene na Njesimoni.” 2 Kwoogu Saûrû na acikaarî ngiri ithatû ba Isiraeri bara beega beendama bwa rwanda rwa Sibu gûceria Ndaundi. 3 Saûrû aamba marema maake rûteere rwa barabara karîmaani ga Akira, kara karaitheene na Njesimoni. Îndî Ndaundi aakara naagu rwanda, na rîra aamenyire Saûrû namûthingatire naagu rwanda, 4 aatûma athigaani na aamenya bwega atî Saûrû n'akinyire. 5 Ndaundi aûkîîra aathi kambîîni ara Saûrû ambîîte marema, oona ara Saûrû na Abuneri mwana wa Neri mûtongoria wa njûûrî baamaami. Saûrû aamaami kambîîni na njûûrî yake îmûthiûrûkîrîîte.6 Ndaundi aûria Aimereki ûra Mûiti, na Abisai mûruagina wa Njoabu mwana wa Seruya ata rî, “N'ûû ûkûthiyania naani kambîîni ya Saûrû?” Abisai amûcookeria amwîra, “Nkaathiyania naawe.” 7 Kwoogu Ndaundi na Abisai baaciema njûûrî ya Saûrû ûtugû. Saûrû amaami kambîîni na îtumo eenjîrîte nthîgûrû waagu kîongooni, Abuneri na acikaarî bara bangî bamaami bamûthiûrûkîrîte. 8 Abisai eera Ndaundi ata rî, “Îmunthî Ngai n'anenkanîrîte mûnthû waku njaraani ciaku, itû tiga mmûmuntanîrie na nthî îmunta rîmwe rîonka na îtumo rîru rîake rîongwa, ntimûmunta maîrî.” 9 Îndî Ndaundi akaania Abisai amwira, “Tiga, menya ûmûringithia, n'ûntû gûtirî we ûûmba kûringithia mwîtûûrîrua maguta wa Mwathani atarwa atarî na mabîtia.” 10 Ndaundi auga, “Wa ta bûra Mwathani atûûraga mwoyo, Mwathani akamûûraga wengwa, kana ntugû yake ya gûkua îkinye, kana aumagarûke athi ndûani aûragîrwe noo. 11 Mwathani atikaareke ntambûrûkia njara nthûûkia mwîtûûrîrua maguta wake. Îndî thûkia îtumo rîru rîrî agu kiongooni gîake, na gakuru ka rûûyî tûthi.” 12 Ndaundi aathûkia îtumo na gakuru ka rûûyî gaku kaarî agu kiongooni gia Saûrû baathi nabio. Rîra mantû mama maarûthîkaga, gûtirî muntû wegua, kana amenya kana aûkîîra n'ûntû Mwathani n'aatûmîîte bamaama toro înene mûno.
13 Rîru Ndaundi aathi rûteere rûra rûngî rwa kîguuru aarûngama karîmaani gataaria nabo. 14 Ndaundi aringîra njûûrî yonthe gîtuma amwe na Abuneri mwana wa Neri akiugaga, “Abuneri! Mbîtîga!” Rîru Abuneri amwîtîga amûûria, “I ka ûrî ûû woû ûgwîta mûnene?” 15 Ndaundi aûria Abuneri ata rî, “Anga ûtirî ncamba îra nene mûno Isiraeri? I kî îîndî ûtirakaria mûnene, mwathi waku bwega? N'ûntû kûrî muntû araayîîte akîendaga kûmûûraga. 16 Ûntû bûbu ûrûthîîte ti bwega. Wa ta bûra Mwathani atûûraga mwoyo, bûbatîîrue bûkua n'ûntû bûtirakaria mwathi wenu mwîtûûrîrua maguta wa Mwathani bwega. Ta raitha wone. Rîrîkû îtumo rîa mûnene kana gakuru ka rûûyî bira bikûrî agu kîongooni gîake?”
17 Saûrû aamenya kayû ka Ndaundi amûûria, “Kayû gaku nkwîgua i gaaku, mwan'wakwa Ndaundi?” Ndaundi amûcookeria amwîra, “Yîî i kayû gaakwa mwathi wakwa mûnene.” 18 Ndaundi amûûria, “N'ata n'ûntû mwathi wakwa wînganîîte naani, niû mûruti ngûgî waku? N'ata ndûthîîte? I mabîtia marîkû ndî namo? 19 Îîndî ingûkûromba mûnene mwathi wakwa ûthikîîrie biugo bia mûruti ngûgî waku. Ûkeegua i Mwathani ûtûmîîte ûnthûûra na ûmbûkîîra na inya ûûgû, aroîtîgîîria kîgongwana. Îndî ûkeegua n'antû baroorumwa i Mwathani n'ûntû i bambîîngatîîtie ndauma kîthakaani kîra Mwathani angaîrîîte kîrî rûgai rwakwa na bauga, ‘Îthi ûkagonge ngai ciingî.’ 20 Menya ûreka nthakame yakwa îîtîga nthîgûrû îngeni kûûraaya na Mwathani, n'ûntû mûnene wa Isiraeri n'aumagarûkîîte gûceria nthuua ta niû, ta muntû ûgûceria kaumbuthûki kîrîmaani.”
21 Rîru Saûrû auga, “I mbîtîîtie, mwan'wakwa Ndaundi, cooka ntiigeria gûkûrûthîra ûthûûku kaîrî, n'ûntû n'woneete gûtûûra mwoyo gwakwa îmunthî kûrî na gîtûmi ûtirambûraga, na mma ndûthîîte ta kîaa na i mbîtîîtie mûno.” 22 Ndaundi amûcookeria amwîra, “Mûnene, îtumo rîaku rîrî aaga. Îra nthaka îmwe yaku îîyîre. 23 Mwathani arîaga muntû kûringana na ûtheru na gwîtîgîka gwake. N'ûntû Mwathani n'agûkûnenkanîrîte njaraani ciakwa îmunthî, îndî ntigîtambûrûkia njara yakwa ndingithia mwîtûûrîrua maguta wa Mwathani. 24 Wa ta bûra îmunthî mbonire mwoyo waku ûrî na gîtûmi Mwathani aroona mwoyo wakwa ûrî na gîtûmi agantuunyûkia thîînaani îno yonthe.” 25 Rîru Saûrû eera Ndaundi, “Ûrothaarimwa mwan'wakwa! Ûkaarûthaga mantû maingî na mma ûkîûmbanaga.” Ndaundi eethiîra na Saûrû n'we aacooka bwa gwake.