Ndaundi aakarania na Afirisiti
27
1 Ndaundi eebîîra nkorooni yake, “Ntugû îmwe Saûrû akambûraga. Ûntû bûra bwega îîndî i gûtorooka na kûthi nthîgûrû ya Afirisiti. Rîru i rîo nkeegua nkuuma nthîgûrû ya Isiraeri na Saûrû agaatigana na gûnceria, na nkeegua ndî mayîîga.” 2 Kwoogu Ndaundi anjîîria rûgendo amwe na antû magana mathanthatû bara aarî nabo aakîra mwanka aathi kwa Akisi mwana wa Maoki mûnene wa Ngathi. 3 Ndaundi aakara Ngathi barî na mûnene Akisi, we na antû baake. Woora muntû n'aarî na antû ba mûciî wake. Ndaundi aarî na eekûrû baake barî baîrî, Ainoamu ûra wa kuuma Njesireeri na Abigairi wa kuuma Karimeri ûra mbereeni aarî mûka wa Nabari. 4 Rîra Saûrû eerirwe atî Ndaundi n'aratoorokire aathi bwa Ngathi, ataamûceria kaîrî.5 Ndaundi eera akisi ata rî, “Wegua i mboneete kwendeerwa kuuma kîrî woû, nnenkera bantû taûniini îmwe naara ntûûraani ntûûre ku bantû nkaraga taûni îno ya mûnene.” 6 Akisi aanenkera Ndaundi taûni ya Sikiragi ntugû wa înu. Na n'ûntû bwa ûûgû, Sikiragi yatuîka ya anene ba Njunda wana kinya îmunthî.
7 Ndaundi aatûûra nthîgûrû ya Afirisiti bantû a mwanka ûmwe na mîeri îna. 8 We na antû baake baumagarûkaga bakaithûkîra antû ba Ngesuri, Ngirisi na Aamareki bara baatûûraga kuuma gîteere gîa Teremu ûtarîîte bwa Suri mwanka nthîgûrû ya Miisiri. 9 Rîonthe rîra Ndaundi na antû baake baithûkagîra gîteere kîmwe kîa bibu baataaga ng'ondu, ng'ombe, mang'ooi, nkamîîra, na kinya nguo na bakaûraga antû bonthe, antû arûme na aka bara baatûûraga ku. Rîru bagacooka kaîrî kwa mûnene Akisi. 10 Nwe Akisi amûûria, “Kagiita gaka i baaû wauma kwithûkîra?” Nwe Ndaundi akamûcookeria akamwîra, “Bwa Negebu ya Njunda” kana “Gîteere kîa Negebu ya mûciî wa Njerameeri” kana “Gîteere kîa Negebu kîra Akeni baatûûraga.” 11 Ndaundi aûragire antû arûme na aka bonthe kaingo gûtakîgîta we akaathi Ngathi kuuga bûra Ndaundi na antû baake barûthire. Ûûgû i bu Ndaundi aarûthaga kagiita konthe kara aakarire nthîgûrû ya Afirisiti. 12 Akisi eetîgia Ndaundi na aathûgaania, “Antû ba Isiraeri i bathwîre Ndaundi mûno na kwoogu agaatûûra arî mûruti ngûgî wakwa tene na tene.”