28
1 Gwakarire ata rî, ntugûûni inu Afirisiti beethîrania njûûrî yao kaingo bathi kûrûa na Aisiraeri. Akisi eera Ndaundi ûûgû, “Ndîenda ûmenye ata rî, wou na njûûrî yaku bûkaathiyania naani ndûani.” 2 Ndaundi amûcookeria amwîra, “Yîî na ûkoona ngûgî îra mûruti ngûgî waku akaaruta.” Akisi amûcookeria amwîra, “Ngagûtuîkithia wa gûnkaragia ûtûûrooni bwakwa bunthe.”Saûrû na mwekûrû wonaga mantû na kiongo
3 Ata rî, Samweri n'arî agûkua na Aisiraeri baathiria kûmûrîrîra na kûmûthika Rama taûni yake. Saûrû n'arî akwîngatia antû bonthe bara boonaga mantû na biongo na arogi bauma nthîgûrû ya Isiraeri.
4 Kwoogu Afirisiti bakwîthîrana baayire baamba marema maao Sunemu. Saûrû n'we eethîrania Aisiraeri bonthe nabo baamba marema maao Ngiriboa. 5 Rîra Saûrû oonire njûûrî ya Afirisiti, aagwatwa n'ûguaya bûûnene mûno. 6 Na rîra Saûrû aathiire kûûria Mwathani mantû, Mwathani ataamûcookeria na njîra nwa îrîkû kinya ya kîrooto, Urimu na Thumimu* kana iroria. 7 I rîo Saûrû eerire aniini baake, “Ncereriani mwekûrû ûmwe wonaga mantû na kiongo kaingo nthi kîrî we ambîîra mantû.” Aniini baake bamûcookeria bamwîra, “Kûrî na ûmwe naara Eni-Ndori.”
8 Saûrû eerûtha bûra atakîmenyeka na njîra ya gwîkîra nguo ciingî itarî cia ûnene, aathûkia antû baîrî aathi nabo kîrî mwekûrû ûyu ûtugû. Saûrû amwîra, “Mbûûrîria kîrî irundu bira ûûragia na ûûndetere ûra ngakwîra.” 9 Mwekûrû ûyu amûcookeria amwîra, “Na mma nûkûmenya bûra Saûrû arûthîîte, eengatia ariingia na antû bara bonthe boonaga mantû na biongo bauma nthîgûrû ya Isiraeri. I kî n'ûntû ûkûmbaigîra mûtego bûmbûragithia?” 10 Îndî Saûrû athiîtîria mwekûrû ûyu na riîtwa ria Mwathani akîmwîraga, “Wa ta bûra Mwathani atûûraga mwoyo, ûtiona îkaanûkia n'wa rîrîkû n'ûntû bwa kûndûthîra ûntû bûbû.” 11 Rîru mwekûrû ûyu amûûria, “N'ûû ûkwenda nkûreetera?” Saûrû amûcookeria amwîra, “Ndeetera Samweri.” 12 Rîra mwekûrû ûyu oonire Samweri aarîra nainya mûno, aûria Saûrû, “I kî n'ûntû wambeneeria? I wou Saûrû!” 13 Mûnene amûcookeria amwîra, “Tiga gûkuthûka, mbîîra i mbi ûkwona.” Mwekûrû ûyu amûcookeria amwîra, “Ndîona kîrundu gîkiuma bwa nthîgûrû gîgeetia.” 14 Saûrû amûûria, “Arîonekana akari ata?” Mwekûrû ûyu amûcookeria amwîra, “I mûkûrû ûmûkûûrû eekîrîîte nguo îndaaya n'we ûkuumîîra.” Rîru Saûrû aamenya i Samweri. Aakuamîîria eenîka ûthiû bwake nthîgûrû amûtîîya.
15 Rîru Samweri aûria Saûrû, “I kî n'ûntû ûkûnthîînia ûkîmbûkagîîria îgûrû?” Saûrû amûcookeria amwîra, “I ndî kînyamaarani kîînene mûno. Afirisiti i bakûrûa naani. Ngai n'we n'andûûkîrîîte. Atigûncookeria mantû gûkûrûkîîra iroria kana irooto ndamûûria. Îîndî ndagwîta aaga ûmbîîra bûra nkaarûtha.” 16 Samweri amûûria ata rî, “Aabu ûrîmbûûria mbi wegua Mwathani n'aakûrûkîîre aatuîka mûnthû waku? 17 Kwoogu Mwathani aarûtha wa bûra augire na kanyua gaakwa. Akûthûkia ûnene bwa Isiraeri kuuma njaraani ciaku na abunenkanîra kîrî muntû ûngî ta we Ndaundi. 18 N'ûntû ûtaathîkîra Mwathani, wonania mûthûûro wake ûmûnene kîrî Aamareki, i kîo gîatûma Mwathani akûrûthîra ûûgû îmunthî. 19 Nkûrûki ya ûgu agakûnenkanîra amwe na Isiraeri njaraani cia Afirisiti, na rûû wou na nthaka ciaku bûkeegua bûrî amwe naani. Mwathani akaanenkanîra njûûrî ya Isiraeri njaraani cia Afirisiti.”
20 Warîru Saûrû agwatwa n'ûguaya n'ûntû bwa biugo bibu bia Samweri amaama mûtumbaara, aathirîrwa n'inya kûrû n'ûntû ataarîîte nwa mbi mûthenya na ûtugû bunthe. 21 Mwekûrû ûra akûûya kîrî Saûrû oona bûra aamakîîte nainya amwîra ata rî, “Niû mûruti ngûgî waku wa mûka înkwathîkîîre ndeekîra ûtûûro bwakwa ûgwatiini ndaarûtha bûra ûmbîîrire. 22 Îîndî wana woû athîkîra mûruti ngûgî waku wa mûka, ûmbîtîgîîrie nkûreetere twirio ûrîe kaingo ûgîta inya ya kûthi.” 23 Saûrû arega auga, “Ntiirîa.” Îndî mwekûrû ûyu na aniini ba Saûrû bamwereka mwanka eetîgîîria. Aûkîîra kuuma nthîgûrû ara amaami aakara nthî ûrîrî. 24 Mwekûrû ûyu n'arî na kayaû kaanoru gwake mûciî, aathi na mpwî akathînja aacooka aathûkia mûtu aakima aaruga mîgaate îtarî miimbithie. 25 Airîra Saûrû na aniini baake baarîa. Rîru baacooka bûra baumîîte ûtugû wa bûbu.