Ndaundi eengatua auma kîrî njûûrî ya Afirisiti
29
1 Afirisiti beethîrania njûûrî yao yonthe bantû eetagwa Afeki. Aisiraeri nabo baarûtha kambî yao akubî na kînyaka kîra kîrî Njesireeri. 2 Wa bûra anene ba Afirisiti baakûrûkaga barî ikundi bia magana na bia ngiri, Ndaundi na njûûrî yake baarî nyuma na Akisi. 3 Atongoria ba njûûrî cia Afirisiti baûria, “N'ata Aibirania baba bakûrûtha aaga?” Akisi abacookeria abeera ata rî, “Anga ûyû ti Ndaundi mûniini wa Saûrû mûnene wa Isiraeri? Ûra wîthîrîîtwe arî amwe naani nkûrûki ya mwanka kuuma akuuma kîrî Saûrû, na mwanka îmunthî niû ntoona ûthûûku bwake.” 4 Îndî atongoria ba njûûrî cia Afirisiti baathûûra nwe, bamwîra, “Cookia muntû ûyû n'ara wamwîrire akarage, tûtiithi n'we n'ûntû aûmba gûtuîka mûnthû wetû ndûani. N'ûntû n'ata muntû ûyû aûmba kûgwatanîra na mwathi wake tatiga akanenkanîra biongo bia antû baba? 5 Anga ûyû ti Ndaundi ûra bainaga nyîîmbooni ciao bakiugaga: ‘Saûrû akûûraga magiri maake, îndî Ndaundi makûmi ma magiri’?”6 I rîo Akisi eetire Ndaundi amwîra ata rî, “Wa ta bûra Mwathani atûûraga mwoyo, n'wîthîrîîtwe ûrî mwîtîgua, na inkwona bûrî bwega kuumagarûkania na gûcookania naani tûrî na Njûûrî; n'ûntû gûtirî ûntû bûthûûku ndaakwona nabu ntugû inu cionthe twakarania. Amwe na ûgu anene ba Afirisiti bagûkûrega. 7 Kwoogu, cooka na ûkiri na menya ûthûûria anene baba ba Afirisiti.” 8 Ndaundi amûûria, “N'ata ndûthîîte? Kûrî bu woneete ndûthîîte niû mûruti ngûgî waku kuuma rîra ndaanjîîrie gûkûrutîra ngûgî mwanka îmunthî, bûgiria nthi ndûani ndûa na anthû ba mûnene mwathi wakwa?” 9 Akisi amûcookeria amwîra, “Imbiyî ûrî muntû ûmwega meethooni maakwa wa ta Mûraîka wa Ngai, îndî amwe na ûgu, atongoria ba njûûrî ya Afirisiti bauga, ‘Atiithiiyania naati ndûani.’ 10 Kwoogu îîndî, raûka gûûkîîra rûkîîrî woû amwe na bara baarî aruti ngûgî ba Saûrû bara wayire nabo bûraûke kûthi rware rûgîtema.” 11 Kwoogu Ndaundi amwe na antû baake baaraûka kuuma rûkîîrî baacooka bwa nthîgûrû ya Afirisiti. Îndî Afirisiti beetia bwa Njesireeri.