Ndaundi arûa na Aamareki
30
1 Ntugû ya îthatû Ndaundi na njûûrî yake baakinya Sikiragi, beethîra Aamareki i baarî bakûbaaria gîteere kîa naiti kîa Njunda baithûkîra Sikiragi bamîtura na bamîbîîthia na mwanki. 2 Baacooka baataa aka bonthe bara baarî ku, baakûrû na baaniini baathi nabo îndî gûtirî we baûraga. 3 Rîra Ndaundi na njûûrî yake baakinyire taûni, beethîîre îbîîthiirue na mwanki na eekûrû baao, nthaka na aarî baao bagwatirwe mîgwate. 4 Ndaundi na antû baake bara aarî nabo bauga mbu nainya mûno bakîrîraga mwanka baaga inya ya kûrîra nkûrûki. 5 Na kinya eekûrû ba Ndaundi barî baîrî ibaagwetwe mîgwate, Ainoamu wa kuuma Njesireeri na Abigairi ntigwa ya Nabari wa Karimeri. 6 Ndaundi ainyîîrîka mûno, n'ûntû antû i beendaga kûmûûraga na maiga n'ûntû antû bonthe i baathûûri n'ûntû bwa gûtaîwa kwa nthaka na aarî baao. Îndî Ndaundi aagîta inya n'ûntû bwa Mwathani Ngai wake.7 Rîru Ndaundi eera mûthînjîri wa Ngai Abiathari mwana wa Aimereki ata rî, “Ndetera efondi.” Abiathari amûretera efondi. 8 Ndaundi aûrithîria kîrî Mwathani, “Nthingate gîkundi gîkî kîa aithûki? Nkabagwatagwata?” Mwathani amûcookeria amwîra, “Yîî bathingate n'ûntû na mma ûkaûmbana, ûgaatuunyûkia bara bagwate.” 9 Kwoogu, Ndaundi na antû bara aarî nabo magana mathanthatû bauma. Bagûkinya kîguuruuni kia Mbesori kûrî bo baatigirwe oogo, 10 n'ûntû antû magana maîrî ibaarî bakûnoga mûno baaremwa i kûringa kîguuru kîa Mbesori. Îndî Ndaundi aathi mbere kwîngana nabo, arî na antû magana mana.
11 Beethîra Mûmiisiri naagu kîthakaani, bamûreeta kîrî Ndaundi. Bamûrûmia irio aarîa na bamûkundia rûûyî aanyua. 12 Bamûrûmia gîkûmbwa gîa nkûyû inyaarie na makûmbwa maîrî ma ncabiibû inyaarie. Akûthiria kûrîa na kûnyua aagîta inya n'ûntû ataarîîte biakûrîa kana anyua rûûyî bantû a ntugû ithatû mûthenya na ûtugû. 13 Ndaundi aûria mûthaka ûyu ata rî, “Uumîte kû? Na ûrî waû?” Amûcookeria amwîra, “Niû ndî mûthaka ûmwîthî Mûmiisiri, na ndî nkombo ya Mûamareki i ka mwathi wakwa aatigire anta ntugû ithatû nthiru nkwayua. 14 Itûraithûkîrîîte gîteere kîa Negebu naara Akerethi batûûraga na rûteere rwa naiti rwa Njunda na gîteere kîa Negebu naara mûciî wa Karebu ûtûûraga na kinya twabîîthia Sikiragi na mwanki.” 15 Ndaundi amûûria, “Ûkambira mwanka ngwatagwate gîkundi gîku kîa aithûki?” Mûthaka ûyû amûcookeria amwîra, “Nthiîtîria na riîtwa rîa Ngai, atî ûtiimbûraga kana ûnenkanîra njaraani cia mwathi wakwa, naani ngakwira mwanka ara barî.”
16 Mûthaka ûyu aatongoreeria Ndaundi beendama mwanka kambîîni ya Aamareki. Ndaundi na antû baake bagûkinya beethîra Aamareki banyegeere agu kîeniini bakari nthîgûrû bakîrîîyaga na kûnyua na kwina bagwîrîîtue n'ûntû bwa into biingî bira baataîte kuuma nthîgûrû ya Afirisiti na ya Njunda. 17 Ndaundi na njûûrî yake babaûraga kuuma rûkîîrî, mwanka ûgoro. Gûtirî muntû watigara tatiga nthaka magana mana ira ciatwere nkamîîra ciaugia rwîro. 18 Ndaundi atuunyûkia bonthe na bionthe bira Aamareki baataîte, na kinya eekûrû baake barî baîrî. 19 Gûtirî we waûra, ûmûniini kana ûmûkûrû, nthaka kana aarî. Bionthe bira biataîtwe Ndaundi naacookiirie. 20 Ndaundi aathûkia ndîîthia cionthe, ng'ondu, mbûri na ng'ombe, antû baithingatîria irî mbere ya nyamû ira ciarî ciao bakiugaga, “Rîrî nîîtaa rîa Ndaundi.”
21 Ndaundi agûkinya akubî na bara magana maîrî baatigirwe bakûnoga baaremwa i kûringa kîguuru kîa Mbesori, baûkîîra bamûthagaana amwe na antû bara aarî nabo. Na rîra Ndaundi aakinyire akubî nabo abakeethia. 22 Bamwe gatîgatî ka bara Ndaundi baarî nabo baarî maruruuthi maarî na nkoro inthûûku na bauga, “N'ûntû batirathiiyania naati gûtirî kîo tûkaabaa, îndî i bathûkie eekûrû na aana baao bathi.” 23 Ndaundi abeera, “Bûtikaarûthe ûgu itû aruayia, n'ûntû i Mwathani atûnenkera into bibi atûmenyeera na atûnenkera anthû bara baratuithûkîrîîte njaraani cietû. 24 N'ûû ûbûthikîîria bûkîaragia ûgu bûkwaria? Ûra akaragia into na ûra athiiyaga ndûani bagaagîrwa into biganeene.” 25 Na kuuma ntugû înu, Ndaundi aatuîkithia ûntû bûbû watho bwa kûthingatagwa Isiraeri kinya îmunthî tûrî.
26 Na rîra Ndaundi aakinyire Sikiragi, aatûma gîcuncî kîmwe gîa into bira baataîte kîrî acoore baake akûrû ba Njunda, akiugaga, “Gîkî i kîewa kîenu kuuma kîrî into bira anthû ba Mwathani barataîte.” 27 Kîewa gîku kîarî kîa bara baarî Betheri, Ramothi ya Negebu na Njatiri, 28 Aroeri, Sibumothi na Esitemoa, 29 Rakari na bara baarî taûni cia Anjerameeri, na taûni cia Akeni, 30 Orima na Mbori-Asani na Athaki, 31 na Eburoni. Aatûma kîrî gûntû kunthe kûra Ndaundi na antû baake baariûngîîte.